ឧត្តរមានជ័យ៖ ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានជំរុញស្ថាប័នពាក់ព័ន្ធនានាឱ្យសហការគ្នាលើកស្ទួយស្ត្រីឱ្យផុតពីបញ្ហាប្រឈម។ មានប្រសាសន៍ថ្លែងបែបនេះខណៈឯកឧត្តមបានអញ្ជើញចូលរួមក្នុងកិច្ចប្រជុំបូកសរុបលទ្ធផលការងារបញ្ជ្រាបយេនឌ័រ និងលទ្ធផលការងារ គ ក ស ក (គណៈកម្មការពិគ្រោះយោបល់កិច្ចការស្រ្តី និងកុមារ) ប្រចាំឆ្នាំ២០២២ លើកទិសដៅ សម្រាប់អនុវត្តបន្តឆ្នាំ២០២៣ នៃរដ្ឋបាលខេត្តឧត្តរមានជ័យនាព្រឹកថ្ងៃទី១៥ ខែធ្នូ ឆ្នាំ២០២២។
ក្នុងកិច្ចប្រជុំនោះដែរឯកឧត្តម ប៉ែន កុសល្យ អភិបាលខេត្តឧត្តរមានជ័យ បានធ្វើការវៃតម្លៃ និងកោតសសើរខ្ពស់ចំពោះមន្ទីរកិច្ចការនារីខេត្តឧត្តរមានជ័យ និងក្រុមការងារយេនឌ័រដែលជាគ្រូបង្គោលមកពីតាមបណ្តាលក្រុងស្រុកទាំងអស់ពិសេសនោះក្រុមការងារគណៈកម្មការពិគ្រោះយោបល់កិច្ចការស្រ្តី និងកុមារដែលកន្លងមកតែងតែធ្វើសកម្មភាពការងារយ៉ាងសកម្មគ្រប់ពេលវេលាក្នុងការដោះស្រាយចំពោះបញ្ហាប្រឈមនានាពាក់ព័ន្ធនឹងបញ្ហាបញ្ជ្រាបយេនឌ័រ លើស្រ្តី និងកុមារ។
ទន្ទឹមគ្នានោះដែរឯកឧត្តមអភិបាលខេត្តឧត្តរមានជ័យ បានក្រើនរំលឹកដល់ក្រុមការងារដែលជាមន្រ្តីបញ្ជ្រាបយេនឌ័រទាំងអស់នៅតាមបណ្តាលក្រុងស្រុករួមទាំងអាជ្ញាធរមូលដ្ឋានត្រូវបន្តរួមសាមគ្គីពង្រឹងសហការគ្នាបន្ថែមទៀតឲ្យបានល្អប្រសើរ ដើម្បីលើកកម្ពស់តម្លៃស្រ្តី និងកុមារដែលងាយរងគ្រោះឲ្យរួចផុតពីបញ្ហាប្រឈមនានា ដើម្បីសង្គមកាត់បន្ថយបានច្រើននូវការប្រើអំពើហឹង្សា និងការជួញដូរក្នុងសង្គមផងដែរ៕ អត្ថបទ៖ សារិទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
