ភ្នំពេញ៖ លោកជំទាវវេជ្ជបណ្ឌិត យក់ សម្បតិ្ត រដ្ឋលេខាធិការប្រចាំការ ក្រសួងសុខាភិបាល និងជានាយកគម្រោងអាហារូបត្ថម្ភនៅកម្ពុជា បានអៈអាងថា មកដល់ពេលនេះ មានអ្នកជំងឺកូវីដ-១៩ ជិត៤០នាក់ កំពុងសម្រាកព្យាបាលតាមមនី្ទរពេទ្យ ប៉ុន្តែមិនមានអ្នកស្លាប់ដោយសារជំងឺកូវីដ-១៩ នោះទេ។
ការថ្លែងរបស់លោកជំទាវ វេជ្ជបណ្ឌិត យក់ សម្បតិ្ត យ៉ាងដូច្នេះក្នុងពិធីបើកសិក្ខាសាលា ស្តីពីការពិនិត្យលទ្ធផលប្រចាំឆ្នាំ២០២២ នៃការអនុវត្តម្រោងអាហារូបត្ថម្ភនៅកម្ពុជា, រយៈពេល២ថ្ងៃ ចាប់ពីថ្ងៃទី១៥-១៦ ខែធ្នូ ឆ្នាំ២០២២នេះ។
លោកជំទាវ វេជ្ជបណ្ឌិត យក់ សម្បតិ្ត បានលើកឡើងទៀតថា ប្រមុខរាជរដ្ឋាភិបាល មានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ជាអគ្គមគ្គុទេសក៍បញ្ជាផ្ទាល់ ក្នុងការប្រយុទ្ធប្រឆាំងនឹងជំងឺកូវីដ-១៩។ ដោយកន្លងមកមានប្រទេសមួយចំនួនបានមើលស្រាលដល់ប្រទេសកម្ពុជា ថាប្រព័ន្ធសុខាភិបាល អន់ថយ ថាកម្ពុជា មិនមានលទ្ធភាពក្នុងការគ្រប់គ្រង។
លោកជំទាវរដ្ឋលេខាធិការប្រចាំការ បានធ្វើការអំពាវនាវដល់មន្ត្រីសុខាភិបាល និងប្រជាពលរដ្ឋទាំងអស់ បន្តអនុវត្តន៍វិធានការ៣កុំ ៣ការពារ ឲ្យខានតែបាន។ បើទោះបីជាការឆ្លងមេរោគកូវីដ-១៩ មានកម្រិតតិចតួចក៏ដោយ អ្វីដែលជាការព្រួយបារម្ភ គឺការបំប្លែងថ្មី នៃមេរោគកូវីដ-១៩ ដែលមានបណ្តាប្រទេសមួយចំនួនកំពុងជួបករណីបំប្លែងថ្មីនេះ។ ដូច្នេះយើងត្រូវបន្តការទប់ស្កាត់ការនាំចូល ក៏ដូចជាជៀសវាងការឆ្លងក្នុងសហគមន៍។ ជាពិសេសក្នុងនាមលោកជំទាវវេជ្ជបណ្ឌិត ជានាយកគម្រោងអាហារូបត្ថម្ភ សូមលើកទឹកចិត្តដល់មន្ត្រីក៏ដូចជាសហការីបន្តការការពារខ្លួន ហើយបន្តណែនាំដល់បងប្អូនប្រជាពលរដ្ឋ ក្មេង ចាស់ ប្រុស ស្រី ដែលមិនទាន់ទទួលការចាក់វ៉ាក់សាំងបង្ការជំងឺកូវីដ-១៩ ឲ្យទៅចាក់វ៉ាក់សាំងកូវីដ១៩ ដូសជំរុញទី៣ ទី៤ និងទី៥ឲ្យបានគ្រប់ៗគ្នា៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
