ភ្នំពេញ៖ គ្រូបង្រៀននៅតាមបណ្ដារាជធានី-ខេត្ត រួមទាំងមន្ត្រីអង្គការសង្គមស៊ីវិលមួយចំនួន កំពុងបង្កើន និងពង្រីកចំណេះដឹងបែបអក្ខកម្មឌីជីថល ដើម្បីយកទៅបង្រៀនបន្តដល់​សិស្សានុសិស្ស​ រួមទាំងប្រជាពលរដ្ឋ ​នៅតាមសហគមន៍ ​ខណៈវិស័យនេះ កំពុងអភិវឌ្ឍន៍​ខ្លាំង​នៅ​លើពិភពលោក ។

ក្នុងវគ្គបណ្ដុះបណ្ដាល ស្តីពីអក្ខកម្មឌីជីថលអាស៊ាន នៅថ្ងៃទី១៥ ខែធ្នូ នេះ លោក ស សុផាណាក់ ប្រធានសម្របសម្រួលផ្នែកបច្ចេកវិទ្យាអប់រំ ​នៃអង្គការខេប ​បានលើកឡើងថា នាប៉ុន្មានឆ្នាំចុង​ក្រោយនេះ​ រាជរដ្ឋាភិបាលកម្ពុជា ​មានការយកចិត្តដាក់ខ្លាំងទៅវិស័យឌីជីថល​ ក៏ដូចជាបានជំរុញ និង​អំពាវនាវដល់ស្ថា ប័នរដ្ឋ​ និងអង្គការដៃគូ ​ជួយពង្រីកចំណេះដឹងឌីជីថល ឲ្យមានការទទួល​បាន​យ៉ាង​ទូលំទូលាយ ។

លោក បានបន្តថា ទន្ទឹមនឹងគោលបំណងរបស់រាជរដ្ឋាភិបាល ទើបអង្គការខេប និងដៃគូ បានរៀប ចំវគ្គនេះឡើង ដើម្បីផ្ដល់ចំណេះដឹងបន្ថែមដល់គ្រូបង្រៀន​ និងបុគ្គលិកអង្គការមួយចំនួន ពាក់ព័ន្ធ​នឹងអក្ខកម្មឌីជីថល ​អក្ខកម្មព័ត៌មាន ​ដើម្បីឲ្យពួកគាត់យកទៅបង្រៀនបន្តដល់សិស្ស និងពលរដ្ឋ​នៅតាមសហគមន៍ ឲ្យចេះប្រើប្រាស់បច្ចេកវិទ្យានេះ ​និងចេះថ្លឹងថ្លែងព័ត៌មាន ដែលត្រូវបាន​បង្ហោះ​លើប្រព័ន្ធឌីជីថល មុននឹងចែកចាយបន្ត ។

ក្នុងនាមជាអង្គការដៃគូលើការងារអភិវឌ្ឍវិស័យអប់រំ លោក ស សុផាណាក់ ​បានបង្ហាញការគាំទ្រ ដល់ក្រសួងអប់រំ យុវជន និងកីឡា ចំពោះការបង្រៀនសិស្សតាមអនឡាញ ពិសេសនៅអំឡុង​ការឆ្លងរីករាលដាល នៃជំងឺកូវីដ-១៩ ដែលមានការថតជាវីដេអូផ្សព្វផ្សាយតាមប្រព័ន្ធឌីជីថល​ជា​ដើមនោះ ខណៈអង្គការខេប ក៏បានចូលរួមក្នុងការងារនេះមួយចំនួនផងដែរ ។

វគ្គបណ្ដុះបណ្ដាលនេះ ធ្វើឡើងរយៈពេល២ថ្ងៃ គឺចាប់ពីថ្ងៃទី១៥-១៦​ ខែធ្នូ នេះ​ ដែលរៀបចំដោយ អង្គការខេប ​សហការជាមួយមូលនិធិអាស៊ាន គាំទ្រដោយ Google​ ហើយវគ្គបណ្ដុះបណ្ដាលនេះ មិនមែន​ នៅតែកម្ពុជាមួយប៉ុណ្ណោះទេ ​គឺធ្វើនៅគ្រប់ប្រទេសជាសមាជិកអាស៊ាន ៕អត្ថបទ៖ បាន សុខរិទ្ធិ