ភ្នំពេញ៖ នៅថ្ងៃទី២៩ខែធ្នូ ឆ្នាំ២០២២នេះ ក្រសួងការពារជាតិ ​ នឹងរៀបចំពិធីប្រារព្ធខួបលើកទី២៤ ទិវានយោបាយ ឈ្នះ ឈ្នះ នៅវិមានឈ្នះ ឈ្នះ ដើម្បីរម្លឹកដល់នយោបាយឈ្នះ ឈ្នះ ដែលបានបញ្ចប់សង្គ្រាមស៊ីវិលទាំងស្រុងនៅកម្ពុជា។

ក្នុងសន្និសីទសារព័ត៌មានស្តីពីការរៀបចំពិធីប្រារព្ធខួបលើកទី ២៤ ទិវានយោបាយ ឈ្នះ ឈ្នះ នៅ​ថ្ងៃទី១៥ ខែធ្នូនេះ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការ​ចម្រុះ​នៃកងយោធពលខេមរភូមិន្ទ ​បានលើកឡើងថា នាថ្ងៃទី២៩ ខែធ្នូខាងមុខ សម្តេចពិជ័យសេនា ទៀ បាញ់ ​ឧបនាយករដ្ឋមន្ត្រីរដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់សម្តេចអគ្គមហាសេនា​បតី​តេជោ ហ៊ុន សែន នឹងធ្វើជាអធិបតីប្រារព្ធទិវានយោបាយឈ្នះ ឈ្នះ ​ដើម្បីអបអរសាទរខួបលើកទី ២៤ ឆ្នាំ នៃការបញ្ចប់សង្រ្គាមស៊ីវិល នៅកម្ពុជា និងការអនុវត្តប្រកបដោយជោគជ័យនយោបាយឈ្នះ ឈ្នះ របស់សម្តេចតេជោ ហ៊ុន សែន។

ឯកឧត្តមនាយឧត្តមសេនីយ៍ បន្តថា ​ការរៀបចំពិធីប្រារព្ធខួបនយោបាយ ឈ្នះ ឈ្នះ លើកទី២៤ ក៏មាន​គោលបំណងឲ្យប្រជាពលរដ្ឋចងចាំ ​និងចូលរួមថែរក្សាកេរដំណែលប្រវត្តិសាស្រ្ត និង​សន្តិភាពដែលបាន ​មកដោយលំបាក ​និងឆ្លងកាត់នូវដំណាក់កាល​អភិវឌ្ឍន៍​ និង​អូសបន្លាយវែងឆ្ងាយ ។

នាយឧត្តមសេនីយ៍ ឥត សារ៉ាត់ បន្ថែមទៀតថា ក្នុងឱកាសអបអរសាទរទិវានយោបាយ ឈ្នះ ឈ្នះ លើកទី២៤ ​នៅបរិវេណវិមានឈ្នះ ឈ្នះ នឹងរៀបចំ​ស្តង់ពិព័រណ៍ ​ដើម្បបង្ហាញការដឹងគុណ និង​តឹកតាង​ប្រវត្តិសាស្រ្តរាល់សកម្មភាពរបស់អង្គភាពទាំងឡាយ​ដែលបាន​ចូលរួម​អនុវត្តនយោបាយ ឈ្នះ ឈ្នះ ​ក៏ដូចជាប្រតិបត្តិករដែលពលីជីវិត​ និងខ្លះនៅរស់រានមានជីវិត។

ទន្ទឹមគ្នានេះ ដើម្បីបង្កភាពសប្បាយរីករាយជាមួយ​សុខ​សន្តិភាព ​នៅវិមានឈ្នះ ឈ្នះ នឹងមានការ​បាញ់​កាំជ្រួចពីរលើក​ នៅថ្ងៃទី២៩ ​និងថ្ងៃទី៣១​ ខែធ្នូ ​នៃថ្ងៃឆ្លងឆ្នាំថ្មី សម្រាប់បងប្អូន​ប្រជាពលរដ្ឋ​ដែលអញ្ជើញទៅកម្សាន្តនៅវិមាន​ ឈ្នះ ឈ្នះ ផងដែរ៕អត្ថបទ សេក ឧត្តម