ភ្នំពេញ៖ ក្នុងឱកាសដ៏នក្ខត្តឫក្ស នៃខួបចម្រើនជន្មាយុដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នាថ្ងៃទី ១៥ ខែធ្នូ ឆ្នាំ២០២២នេះ នៅទីស្នាក់ការកណ្តាល កាកបាទក្រហមកម្ពុជា មានសប្បុរសជនពីរក្រុមផ្សេងគ្នា បាននាំយកអំណោយជូនដល់ កាកបាទ​ក្រហមកម្ពុជា រួមមាន៖ ទី១សិប្បកម្ម វីភី ផ្ទះចល័ត អង្ករចំនួន៥តោន ត្រីខ៧៥កេស, ទី២ក្រុមហ៊ុន ស្តារីត (ខេមបូឌា) ឯ.ក កាបូបស្ពាយ ចំនួន ៨០០ កាបូប ជូនដល់កាកបាទក្រហមកម្ពុជា សម្រាប់ធ្វើសកម្មភាពមនុស្សធម៌តាមតម្រូវការ។

ក្នុងឱកាសទទួលជួបសវនាការនោះ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា បានពាំនាំ​ប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម​កម្ពុជា ផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅ ចំពោះទឹកចិត្តសប្បុរសធម៌ របស់​សិប្បកម្ម វីភី ផ្ទះចល័ត និងក្រុមហ៊ុនស្តារីត(ខេមបូឌា) ឯ.ក ដែលបានបរិច្ចាគអំណោយទាំង​នេះ ដល់កាកបាទក្រហមកម្ពុជា ​សម្រាប់ទុកជួយទៅដល់ប្រជាពលរដ្ឋ ដែលងាយរងគ្រោះបំផុតនៅ​ក្នុង​ប្រទេសកម្ពុជា។

លោកជំទាវបន្តថា អំណោយក្នុងថ្ងៃនេះ ជាអំណោយដ៏ពិសេសថ្លៃថ្លាណាស់ គឺចំថ្ងៃខួបចម្រើន​ជន្មាយុរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន ​ហើយអំណោយទាំងនេះ កាក​បាទក្រហមកម្ពុជា ថ្នាក់កណ្តាល និងយកទៅចែកជូនដល់ដៃប្រជាពលរដ្ឋ ដែលត្រូវការជំនួយ​ជា​ចាំបាច់នាពេលឆាប់ៗខាងមុខនេះ។

សប្បុរសជនទាំងពីរក្រុមខាងលើ បានថ្លែងអំណរគុណយ៉ាងជ្រាវជ្រៅចំពោះសម្តេចកិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា​ ដែលបានអនុញ្ញាតឱ្យក្រុមហ៊ុនរបស់ពួកគាត់ បានចូលរួមចែករំលែកការងារមនុស្សធម៌ជាមួយប្រជាជនកម្ពុជា ​និងសូមកោតសសើរយ៉ាងខ្លាំងក្លា ចំពោះ​កាកបាទក្រហមកម្ពុជា ​ដែលតែងតែធ្វើឱ្យប្រជាពលរដ្ឋគ្រប់ទីកន្លែង មានស្នា​មញញឹម​ពេញចិត្ត​យ៉ាងខ្លាំង ក្នុងការជួយទៅដល់ពួកគាត់ ​ដែលត្រូវការជំនួយជាចាំបាច់ក្នុងជីវភាពគ្រួសារ ទីណាមានទុក្ខលំបាក ​ទីនោះមានកាកបាទក្រហមកម្ពុជា។

នៅចំពោះមុខ សប្បុរសទាំងពីរក្រុមខាងលើនេះបានសន្យាថា ​នៅពេលបន្តបន្ទាប់ទៀត ក្រុមការងារ​និងចូលរួម បរិច្ចាគអំណោយមនុស្សធម៌ជាមួយ ​កាកបាទក្រហមកម្ពុជា ​ជាបន្តបន្ទាប់ទៀត ដើម្បីជា​ការរួមចំណែក ជួយទៅដល់ប្រជាពលរដ្ឋ ដែលជីវភាពខ្សត់ខ្សោយនៅក្នុងសង្គម។

ចុងបញ្ជប់ក្នុងឱកាសខួបចម្រើនជន្មាយុ របស់សម្តេចកិត្តិព្រឹទ្ធបណ្ឌិត សប្បុរសជនទាំងពីរ​ក្រុមខាង​លើ សូមបួងសួងដល់គុណបារមី​ ទេវតាគ្រប់ព្រះអង្គ ​គុណបុណ្យព្រះរតនត្រ័យ គុណបារមីវត្ថុ​ស័ក្ដិសិទ្ធិ​នានាក្នុងលោក សូមព្រះមេត្តាប្រោសព្រះរាជទាន ​ប្រោះព្រំនូវទឹកអម្រឹត ​ប្រសិទ្ធពរជ័យ សិរីមង្គល​ មហាប្រសើរ ចំពោះសម្តេចកិត្តិព្រឹទ្ធបណ្ឌិត​ សូមបានប្រកបតែ ​នឹងព្រះពុទ្ធពរគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ​ និងសូមសម្រេចបានជោគជ័យថ្មីៗទៀត ក្នុងភារកិច្ច​ដ៏​ឧត្តុង្គឧត្តម ក្នុងការបម្រើជាតិ ​មាតុភូមិ ​និងប្រជាជន ​នៅទូទាំងព្រះរាជាណាចក្រកម្ពុជាតរៀងទៅ៕

អត្ថបទ៖ សំ ងីម