ភ្នំពេញ៖ ក្រសួងចំនួន២រួមមាន៖ ក្រសួងទេសចរណ៍ និងក្រសួងកសិកម្មរុក្ខាប្រមាញ់ និងនេសាទ បាននិងកំពុងរួមគ្នាអភិវឌ្ឍន៍​វិស័យទេសចរណ៍​ និងយកវិស័យទេសចរណ៍ ជាទីផ្សារសំខាន់​មួយទៀត​របស់កសិករ ​និងបណ្តាអ្នកផលិតនានា ដែលត្រូវរួមគ្នាជំរុញបង្កើនការផលិត​ផលិត​ផលនានា ដើម្បី​ផ្គត់ផ្គង់​ភ្ញៀវទេសចរក្នុងស្រុក និងការនាំចេញនៅនឹងកន្លែង ។

បើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្មរុក្ខាប្រមាញ់​ និងនេសាទ បាន​ថ្លែងប្រាប់BTV នៅថ្ងៃទី១៥ ខែធ្នូនេះថា ​បច្ចុប្បន្ន​ក្រសួងកសិកម្ម កំពុងសហការ​ជាមួយ​ក្រសួងទេសចរណ៍ ​និងស្ថាប័នពាក់ព័ន្ធនានាទៀត​ដើម្បីជំរុញកសិករ​ និងបណ្តាអ្នកផលិត ឲ្យ​បង្កើន​ការផលិត ​ហើយក្រសួងកសិកម្មគាំទ្រ​ការផលិតផលកសិកម្មទាំងឡាយ​ណាដែលមាន​តម្លៃ​សមរម្យ​អាចទទួលយកបាន ​និងធានាការផ្តល់នូវសន្តិសុខស្បៀង និង ​អាហារូបត្ថម្ភ សម្រាប់​ពលរដ្ឋក្នុង​ស្រុក​ និងភ្ញៀវទេសចរអន្តរជាតិទាំងអស់គ្នា។

ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ​បានថ្លែងថា​ ជាក់ស្តែងការងារនេះ យើងបាន​ធ្វើតាំង​ពីយូរមកហើយ ​ហើយសម្តេចតេជោ នាយករដ្ឋមន្ត្រី​ គឺបានជំរុញឲ្យក្រសួង​ទាំង​ពីរខិតខំ​ធ្វើបន្ថែម​ទៀត​ដើម្បីធ្វើយ៉ាងណាឲ្យវិស័យទេសចរណ៍ក្លាយជាទីផ្សាររបស់កសិករ និងអ្នក​ផលិត​ផលិតផល​នានាទៀត។

ឯកឧត្តមរដ្ឋមន្ត្រី បញ្ជាក់ថា ​នៅវិស័យទេសចរណ៍បច្ចុប្បន្ន បានបង្កើនមុខរបរជូនប្រជាពលរដ្ឋ​ក្នុង​ស្រុកបានប្រមាណជាង ​២៧០មុខរបរ ​ហើយ​វារួម​ចំណែកដ៏សំខាន់​ ក្នុងការជម្រុញកំណើនសេដ្ឋកិច្ច​កម្ពុជា ​ប្រជាពលរដ្ឋមានការរីកចំរើន។

សូមបញ្ជាក់ថា នៅក្នុងព្រឹត្តិការណ៍បើកបុណ្យសមុទ្រនៅខេត្តព្រះសីហនុ ​សម្តេចតេជោ ហ៊ុន សែន នាយករដ្ឋមន្ត្រីកម្ពុជា ​បានអំពាវនាវឲ្យវិស័យទេសចរណ៍​ទាំង​មូលក្លាយជាទីផ្សាររបស់កសិករ និង​អ្នកផលិតនានា ខណៈទេសចរក្នុងស្រុកចេញដើរកម្សាន្ត​នៅក្នុងឆ្នា២០២២នេះ មានកំណើន​ប្រមាណជាង ១០លាននាក់​ និងទេសចរអន្តរជាតិ​ នឹងមានកើនរហូតដល់ ២លាននាក់ ហើយ​ទេសចរ​អន្តរជាតិ នឹងមានកំណើនដល់៦ទៅ៧លាននាក់ នៅឆ្នាំបន្តបន្ទាប់ទៀតនេះ៕អត្ថបទ ស៊ុម សុខជា