ភ្នំពេញ៖ មន្រ្តីជាន់ខ្ពស់អគ្គនាយកដ្ឋានពន្ធដារ លើកឡើងថា កិច្ចសហការល្អរវាងស្ថាប័នពាក់ព័ន្ធ នៃការស៊ើបអង្កេតបទល្មើសពន្ធដារ ​និងការសម្អាតប្រាក់ ​បានពង្រឹងនូវអនុលោមភាពសារពើពន្ធ និង​បានរួមចំណែកធ្វើឱ្យការប្រមូលចំណូលពន្ធ ​មានកំណើនល្អប្រសើរ ​ដោយលើសផែនការ ដែល​កំណត់ដោយច្បាប់ជាបន្តបន្ទាប់។

ឯកឧត្តមបណ្ឌិត ម៉ិញ បានកុសល ​អគ្គនាយករងនៃអគ្គនាយកដ្ឋានពន្ធដារ លើកឡើងនៅក្នុង​សិក្ខា​សាលាស្តីពី “ការស៊ើប អង្កេតបទល្មើសពន្ធដារ ​និងការសម្អាតប្រាក់” នៅថ្ងៃទី ១៤ ខែធ្នូ ឆ្នាំ២០២២ នេះថា ​ការ​ផ្ដួចផ្ដើម​ឱ្យមានសិក្ខាសាលានេះឡើង ​គឺដើម្បី​ផ្លាស់ប្តូរ​បទពិសោធន៍ លើការស៊ើបអង្កេត​បទល្មើស​ពន្ធដារ ​និងបទល្មើសសម្អាតប្រាក់​ រវាងអាជ្ញាធរអនុវត្តច្បាប់ពាក់ព័ន្ធនានា និង​ដើម្បី​អនុវត្តតាម​ផែនការ​សកម្មភាព​របស់​ក្រុមការងារហិរញ្ញវត្ថុ ​ឱ្យកាន់​តែមានប្រសិទ្ធភាពថែមទៀត។

ការរៀបចំសិក្ខាសាលានេះ,​ គឺមានគោលបំណងផ្តល់ការឈ្វេងយល់បន្ថែម ពីបទពិសោធន៍​ជាក់ស្ដែង​ ពាក់ព័ន្ធនឹងការស៊ើប​ អង្កេតបទល្មើសពន្ធដារ ​និងបទល្មើសសម្អាតប្រាក់ ជូនថ្នាក់ដឹកនាំ​អគ្គ​នាយកដ្ឋានពន្ធដារ ​នាយកដ្ឋានថ្នាក់កណ្តាល​ ប្រធានសាខាពន្ធដារ​ខេត្ត-ខណ្ឌ និងមន្ត្រី​ស៊ើបអង្កេត​ទាំងអស់។

កន្លងមកអគ្គនាយកដ្ឋានពន្ធដារ​ បានសហការយ៉ាងល្អ ជាមួយ ​អង្គភាពស៊ើបការណ៍ហិរញ្ញវត្ថុកម្ពុជា ធនាគារជាតិនៃកម្ពុជា ​អគ្គស្នងការដ្ឋាននគរបាលជាតិ ​អគ្គនាយកដ្ឋានគយ​ និងរដ្ឋាករកម្ពុជា អង្គភាព​ប្រឆាំងអំពើពុករលួយ ​ក្រសួងយុត្តិធម៌ ស្ថាប័នអយ្យការ ​និងស្ថាប័នដទៃទៀត ក្នុងការ​ផ្លាស់ប្តូរព័ត៌មាន ស៊ើបអង្កេត ឆែកឆេរ ឃាត់ខ្លួន នាំខ្លួន​ សួរចម្លើយ​ និង​បញ្ជូន​ទៅអយ្យការ និង​តុលាការ ដើម្បីធ្វើការចោទប្រកាន់ បង្កកទ្រព្យ និងជំនុំជម្រះ​ ចំពោះបទល្មើស ពន្ធដារ រួមទាំង​បទល្មើសសម្អាតប្រាក់ ​សំអាងបទល្មើសពន្ធដាជាដើម។

ជាលទ្ធផល ​កិច្ចសហការល្អរវាងស្ថាប័ននេះ ​បានពង្រឹង​ នូវអនុលោមភាពសារពើពន្ធ និង​បានរួមចំណែកធ្វើឱ្យការប្រមូល​ ចំណូលពន្ធឱ្យមានកំណើន​គួរឱ្យកត់សម្គាល់ ។

ទាក់ទងការស៊ើបអង្កេតបទល្មើសពន្ធដារ ​និងការសម្អាតប្រាក់នេះដែរ មាន​វាគ្មិន​កិត្តិយស​តំណាង​មក​ពីក្រសួងស្ថាប័ន្ធពាក់ព័ន្ធ ​បានធ្វើ​បទបង្ហាញពីច្បាប់ ​ស្តីពីការប្រឆាំងការសម្អាតប្រាក់ និង​ហិរញ្ញប្បទាន​ភេរវកម្ម​ ដោយ​បាន​បកស្រាយ​អំពី​បទប្បញ្ញត្តិ​ទូទៅ ​បុគ្គល​រាយការណ៍ វិធាន​ការ​ត្រូវប្រកាន់​យកដោយបុគ្គលរាយការណ៍ ​ស្ថាប័ន​ប្រឆាំង​ការសម្អាតប្រាក់ និងហិរញ្ញប្បទានភេរវកម្ម បទប្បញ្ញត្តិផ្សេងៗ ​ការបង្កក ​ការឃាត់ទុក​ ការរឹបអូស ​ទោសប្បញ្ញត្តិ ​និងអន្តរប្បញ្ញត្តិ ការចាប់ខ្លួន ការ​សួរចម្លើយ ​និងការបញ្ជូនខ្លួន​ទៅអយ្យការអមសាលា ​ដំបូងជាដើម៕ អត្ថបទ៖ សុន រ៉ាឌី