ភ្នំពេញ៖ ឯកឧត្តមកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានថ្លែងថា រាជរដ្ឋាភិបាលកម្ពុជា កំពុងអនុវត្តយ៉ាងមុតមាំ លើសន្និសីទអន្តរជាតិ ស្តីពីប្រជាជន និងអភិវឌ្ឍន៍ ក្នុងនាមជាប្រទេសហត្ថលេខី និងក្នុងចំណោមសមាជិកចំនួន ១៧៩ប្រទេស។

​ក្នុងកិច្ចប្រជុំលើកទី១ គណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជន និងអភិវឌ្ឍន៍ នៅថ្ងៃទី១៥ ខែធ្នូ ឆ្នាំ២០២២ ឯកឧត្តមកិត្តិសេដ្ឋាបណ្ឌិត មានប្រសាសន៍ថា កម្ពុជាបានអនុវត្តនូវសន្និសីទអន្តរជាតិនេះ តាមរយៈការដាក់បញ្ចូលបញ្ហាប្រជាជន និងកត្តាឌីណាមិកប្រជាសាស្ត្រ ទៅក្នុងដំណើរការ នៃការរៀបចំផែនការអភិវឌ្ឍន៍ គោលនយោបាយ និងយុទ្ធសាស្ត្រជាតិសំខាន់ៗជាច្រើន។

ឯកឧត្តមបានបន្តថា ក្នុងនោះ មានដាក់បញ្ចូលទៅក្នុងយុទ្ធសាស្ត្រចតុកោណ, ផែនការយុទ្ធសាស្ត្រអភិវឌ្ឍន៍ជាតិ, គោលនយោបាយជាតិប្រជាជន, គោលនយោបាយស្តីពីមនុស្សចាស់, គោលនយោបាយយុវជន, យុទ្ធសាស្ត្រជាតិស្តីពីសិទ្ធិ និងសុខភាពផ្លូវភេទ និងសុខភាពបន្តពូជ, ផែនការសកម្មភាពជាតិស្តីពី ការទប់ស្កាត់អំពើហិង្សាលើស្ត្រី។

ឯកឧត្តមទេសរដ្ឋមន្ត្រី ឆាយ ថន បានបន្ថែមថា ក្នុងកិច្ចប្រជុំលើកទី១នេះ អ្នកពាក់ព័ន្ធរួមគ្នាពិនិត្យ និងពិភាក្សាលើការធ្វើបច្ចុប្បន្នភាពលទ្ធផលការងារ របស់គណៈកម្មាធិការនេះ ទៅលើការអនុវត្តកម្មវិធីសកម្មភាព នៃសន្និសីទអន្តរជាតិស្តីពី ប្រជាជន និងអភិវឌ្ឍន៍ ឆ្នាំ២០២១-២០២២ និងលើកទិសដៅសម្រាប់ឆ្នាំ២០២៣។

ឯកឧត្តម ជា ចាន់ទុំ ប្រធានគណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជន និងអភិវឌ្ឍន៍ បានលើកឡើងថា ឆ្នាំ២០២១-២០២២ ពាក់ព័ន្ធការអនុវត្តនូវសន្និសីទនេះ ក្រសួងផែនការបានបង្កើតគណៈកម្មការអន្តរក្រសួង, បង្កើតគណៈកម្មាធិការប្រជាជន និងអភិវឌ្ឍន៍នៅបណ្ដារាជធានី-ខេត្តទាំង២៥ រួមទាំងរៀបចំផែនការសកម្មភាពមួយចំនួនទៀត។

គួរបញ្ជាក់ថា កាលពីឆ្នាំ១៩៩៤ នៅទីក្រុងគែរ ប្រទេសអេហ្ស៊ីប អង្គការសហប្រជាជាតិ បានប្រារព្ធសន្និសីទអន្តរជាតិមួយហៅថា សន្និសីទអន្តរជាតិស្តីពីប្រជាជន និងអភិវឌ្ឍន៍ ដោយបានដាក់ចេញនូវកម្មវិធីសកម្មភាពចម្បងមួយចំនួន ក្នុងគោលបំណងលើកកម្ពស់គុណភាពជីវិត និងសិទ្ធិសេរីភាពរបស់ប្រជាជនក្នុងពិភពលោក ក្នុងនោះ រួមមានទាំងការទទួលស្គាល់អំពីទំនាក់ទំនងទៅវិញទៅមក រវាងប្រជាជន និងអភិវឌ្ឍន៍ និងអំពាវនាវឲ្យមានការយកចិត្តទុកដាក់ខ្ពស់ ចំពោះការផ្ដល់ភាពអង់អាចដល់ស្ត្រី ការលើកកម្ពស់សុខភាពបន្តពូជ និងសិទ្ធិរបស់ស្ត្រី និងការដាក់បញ្ចូលបញ្ហាទាំងនេះ ទៅក្នុងដំណើរការ នៃការអភិវឌ្ឍជាតិ តំបន់ និងសកល៕ អត្ថបទ៖ បាន សុខរិទ្ធិ