ភ្នំពេញ៖ រដ្ឋលេខាធិការដ្ឋានអាកាសចរណ៍ស៊ីវិល បានឲ្យដឹងថា ក្នុងរយៈពេលប៉ុន្មានសប្តាហ៍ចុងក្រោយនៅក្នុងខែធ្នូ ឆ្នាំ២០២២នេះ ចំនួនជើងហោះហើររបស់ក្រុមហ៊ុនអាកាសចរណ៍អន្តរជាតិនានាបានហោះហើរចេញចូលប្រទេសកម្ពុជា មានរង្វង់ប្រមាណ ៤១៥ការហើរហោះ(flight) ស្មើនឹង ៨៣០ជើង ក្នុងមួយសប្តាហ៍កើន ៤០% នៃការហោះហើរសរុបឆ្នាំ២០១៩ ហើយចំនួនបាននិងកំពុងបន្តកើនឡើងនៅក្នុងសប្តាហ៍បន្តបន្ទាប់ទៀត។
បើតាមឯកឧត្តម ជា អូន រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ថ្លែងប្រាប់BTV នៅថ្ងៃទី១៦ ខែធ្នូនេះថា ជារួមចាប់តាំងពីពាក់កណ្តាលខែឆ្នាំ២០២២ រហូតមកដល់ចុងឆ្នាំ២០២២នេះ ចំនួនការហោះហើររំលងប្រទេសកម្ពុជា គឺឈានចូលមករកភាពធម្មតាវិញអស់ហើយ ដោយឡែកការហោះហើរចុះចត និងចាកចេញពីកម្ពុជា គឺមានប្រមាណតែ ៤០% ហើយចំនួនអ្នកដំណើរចេញចូលកម្ពុជា គឺមានប្រមាណ ៣៨% នៃចំនួនជើងហោះហើរសរុប នៅក្នុងឆ្នាំ២០១៩ ។
ឯកឧត្តម ជា អូន អ្នកនាំពាក្យលេខាធិការដ្ឋានអាកាសចរណ៍ស៊ីវិលបញ្ជាក់ថា «អ្វីដែលប្លែកចុងក្រោយនេះ ប្រទេសឡាវ មីយ៉ាន់ម៉ា បច្ចុប្បន្នគឺបានបើកជើងហោះហើរឡើងវិញ ហើយបាងកក និងសឹង្ហបូរី គឺបានបង្កើនជើងហោះហើររបស់ខ្លួនលើសការរំពឹងទុក ហើយក្រុមហ៊ុនអាកាសចរណ៍ខ្លះ កាលពីដើម គឺប្រើយន្តហោះប្រភេទតូចៗតែបច្ចុប្បន្នគឺបានប្រើប្រភេទយន្តហោះខ្នាតធំៗ សម្រាប់ដឹកអ្នកដំណើរ។»
ឯកឧត្តម បន្ថែមថា សម្រាប់ការហោះហើរចេញចូលកម្ពុជា បាងកក និង កម្ពុជា សឹង្ហបូរី គឺបានត្រឡប់មករកភាពដូចដើមវិញ ហើយសប្តាហ៍ខ្លះក៏មានចំនួនជើងហោះហើរលើសភាពដើមដែរ ដោយឡែកការហោះហើរត្រង់កម្ពុជា ទៅមកប្រទេសវៀតណាម គឺមានប្រមាណ ៦០% ហើយប្រទេសហ្វីលីពីន ម៉ាឡេស៊ី កូរ៉េខាងត្បូង ភូមា ឡាវ ជាដើម គឺបាននឹងកំពុងរៀបចំបង្កើនហោះហើរទៅមកកម្ពុជាជាបន្តបន្ទាប់ផងដែរ។
ឯកឧត្តម ជា អូន ក៏បានលើកឡើងផងដែរថា ចំពោះការហោះហើរត្រង់កម្ពុជា ចិន កន្លងមកបានបើកជើងហោះត្រង់ ៣០ជើងក្នុងមួយសប្តាហ៍ ហើយបច្ចុប្បន្នស្នើបង្កើនជើងហោះហើរត្រង់ចំនួន ៦០ជើងក្នុងសប្តាហ៍វិញ។
សូមបញ្ជាក់ថា នៅក្នុងចំណោមចំនួនជើងហោះហើរពីបណ្តាប្រទេសនានាមកកាន់កម្ពុជា សរុប ៨៣០ជើង ក្នុងមួយសប្តាហ៍នោះ ក្នុងនោះ រាជធានីភ្នំពេញ បានទទួលយន្តហោះចុះចតចេញចូល មានប្រមាណ ៥៩០ជើង សៀមរាប ២១២ជើង ដោយឡែកខេត្តព្រះសីហនុ មាន២៨ជើង ក្នុងមួយសប្តាហ៍៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
