ភ្នំពេញ៖ អាជ្ញាធរជាតិប្រយុទ្ធនឹងជំងឺអេដស៍ រួមនឹងអន្តរក្រសួង ស្ថាប័ន រាជធានី-ខេត្ត និង​អង្គការ​មិនមែន​រដ្ឋាភិបាលព្រឹកថ្ងៃទី១៦ ខែធ្នូ ឆ្នាំ២០២២នេះ បាន​បើក​កិច្ច​ប្រជុំ​ក្រុម​ប្រឹក្សា​បច្ចេកទេស​ លើកទី១២ ដើម្បីបានដឹងពីលទ្ធភាពផ្តល់ប័ណ្ណសមធម៌ ឬប័ណ្ណប.ស.ស ដល់ក្រុមប្រជាជនគន្លឹះ​(ក្រុម​អ្នកបម្រើ​ផ្លូវភេទ) និងត្រូវរកតួលេខឲ្យបានច្បាស់លាស់, តាម​រយៈ​ការ​ចូល​រួមផ្ទាល់ និង​តាម​រយៈប្រព័ន្ធអនឡាញ។

ថ្លែង​ក្នុងកិច្ចប្រជុំក្រុមប្រឹក្សាបច្ចេកទេស លើកទី១២ ឯកឧត្តមទេសរដ្ឋមន្ត្រី អៀង មូលី ប្រធាន​អាជ្ញាធរ​ជាតិ​ប្រយុទ្ធនឹងជំងឺអេដស៍បានផ្តល់ជាអនុសាសន៍ថា យើង​ត្រូវ​ខិតខំ​ដោះ​ស្រាយ​យ៉ាង​ណា ដើម្បីឲ្យមានការមកធ្វើតេស្ត​ឈាមឲ្យបានច្រើន ហើយការបង្ការមេរោគអេដស៍ និង​ជំងឺ​អេដស៍ ឲ្យបានទូលំទូលាយឡើង ដើម្បីឲ្យអត្រា នៃការត្រួតពិនិត្យ ឲ្យដឹងថា​ខ្លួន​មាន​មេរោគ​អេដស៍ ឬអត់ ឲ្យឡើងពី៨៤% ទៅ៩៥% ឬទៅ៩៦%។

ឯកឧត្តម ទេសរដ្ឋមន្ត្រី អៀង មូលី ក៏អំពាវនាវដល់គ្រប់ស្ថាប័ន រាជធានី ខេត្ត ក្រុង ស្រុក ខណ្ឌ ឃុំ សង្កាត់ ធ្វើការរួមគ្នាជាពហុវិស័យ សហការយ៉ាងជិតស្និទជាមួយកាកបាទក្រហមកម្ពុជា អង្គការ​មិន​មែនរដ្ឋាភិបាល សង្គមស៊ីវិល វិស័យឯកជន អ្នកផ្ទុកមេរោគអេដស៍ ក្រុមប្រជាជនគន្លឹះ និង​សហគមន៍ ដើម្បី​លុបបំបាត់ការចម្លងមេរោគអេដស៍ និង​យក​ជ័យ​ជម្នះ​លើ​មេរោគ​អេដស៍​ឲ្យ​បាន​តាមកាលកំណត់។

សូមបញ្ជាក់ថា កិច្ចប្រជុំក្រុមប្រឹក្សាបច្ចេកទេសលើកទី១២នេះ ដើម្បីពិនិត្យមើលអោយបានច្បាស់ ពី​លទ្ធភាព​ផ្តល់​ប័ណ្ណ​សមធម៌ ឬប័ណ្ណ ប.ស.ស ដល់ក្រុមប្រជាជនគន្លឹះ ដោយត្រូវ​រក​តួលេខ​អ្នក​បម្រើ​​សេវា​​ផ្លូវភេទឱ្យបានច្បាស់លាស់។ កំណត់តើអ្នកបម្រើសេវាផ្លូវភេទ ប្រភេទណាហៅថា ក្នុង​ប្រព័ន្ធ និងប្រភេទណាហៅថា ក្រៅប្រព័ន្ធ? ចំពោះអ្នកនៅក្រៅប្រព័ន្ធ មានលក្ខណៈវិនិច្ឆ័យអ្វីខ្លះ ដើម្បី​ទទួលបានប័ណ្ណ ប.ស.ស និងនីតិវិធីអ្វីខ្លះ ដើម្បីទទួលបានប័ណ្ណសមធម៌ ឬប័ណ្ណក្រីក្រ (ID Poor) ដើម្បី​លើកទឹកចិត្តដល់ស្រ្តីបម្រើសេវាផ្លូវភេទ មកធ្វើតេស្តនិង បន្តធ្វើ​ការ​សហការ​ការងារ​ជា​មួយ​ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រុមប្រឹក្សាជាតិគាំពារសង្គម ដើម្បី​ឱ្យ​ទទួលបាននូវការគាំពារសង្គម៕ អត្ថបទ៖ រដ្ឋា