ឧត្តរមានជ័យ៖ ប្រជាពលរដ្ឋរស់នៅចំណុចភូមិខ្ទុំ សង្កាត់កូនក្រៀល ក្រុងសំរោង ខេត្តឧត្តរមានជ័យ សប្បាយត្រេកអរបន្ទាប់ពីទទួលបានផ្លូវបេតុងចំនួន១ខ្សែរប្រវែងជាង៨០០ម៉ែត្រ ទទឹង៥ម៉ែត្រ ក្នុងមូលដ្ឋាន ជាគម្រោងកញ្ចប់ថវិកាតាមរយៈការអភិវឌ្ឍ​មូលនិធិរបស់សង្កាត់កូនក្រៀល។

លោក លឿង ណុច ចៅសង្កាត់កូនក្រៀល បានឲ្យដឹងថា បច្ចុប្បន្ននេះ​សង្កាត់​បានធ្វើការអភិវឌ្ឍ​ផ្លូវក្នុងមូលដ្ឋានជាច្រើនខ្សែររួមមាន៖ ផ្លូវលំក្រួសក្រហម និងផ្លូវបេតុង ដើម្បីសម្រួល​ដល់ការ​ធ្វើដំណើរ​ពីភូមិមួយទៅភូមិមួយ​ប្រកប​ដោយភាពងាយស្រួល​ជូន​ប្រជាពលរដ្ឋក្នុងការ​ដឹក​កសិកផលទៅលក់នៅលើផ្សារ ដែល​ជាគម្រោង​កញ្ចប់ថវិកា​អភិវឌ្ឍន៍​របស់មូលនិធិ​ឃុំសង្កាត់​កូនក្រៀល។

លោក បញ្ជាក់ថា ក្នុងសង្កាត់កូនក្រៀល មានភូមិចំនួន៣៣ភូមិ ក្នុងនោះភូមិ​ឧបសម្ព័ន្ធ​មាន៣ភូមិ កសាងផ្លូវក្រាលក្រួសក្រហម បានចំនួន ៧៥៤ខ្សែរ ​ផ្លូវបេតុងមួយខ្សែរ​ និងបន្តធ្វើបន្ថែមទៀត​តាម​កញ្ចប់​ថវិកា​របស់មូលនិធិឃុំសង្កាត់ ដើម្បីបម្រើ​ផលប្រយោជន៍​ជូនពលរដ្ឋក្នុងមូលដ្ឋាន៕ អត្ថបទ៖ សារិទ្ធ