ភ្នំពេញ៖ ឯកឧត្តម សោម សូរីដា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត អះអាងថា ការផ្តល់ឯកសារបញ្ជាក់អត្តសញ្ញាណជាការគោរព​សិទ្ធិរបស់​ប្រជាពលរដ្ឋ​ចំពោះ​ដំណើរការបោះឆ្នោត។

នៅថ្ងៃទី១៦ខែធ្នូ ឆ្នាំ២០២២នេះ ឯកឧត្តម ម៉ៅ សុភារិទ្ធ ​អគ្គលេខាធិការរងនៃគណៈកម្មាធិការ​ជាតិ​រៀបចំ​ការបោះឆ្នោត (គ.ជ.ប) ​បាន​អញ្ជើញ​ដឹកនាំ​កិច្ចប្រជុំពិគ្រោះយោបល់ស្តីពី សេចក្តីព្រាង​បទបញ្ជា និងនីតិវិធីសម្រាប់ការបោះឆ្នោតជ្រើសតាំង​តំណាង​រាស្រ្ត ​នីតិកាលទី៧ ជាមួយ​តំណាង​គណបក្សនយោបាយ សមាគម ​និងអង្គការមិនមែនរដ្ឋាភិបាល ​នៅទីស្តីការ គ.ជ.ប។

ជាក់ស្តែងក្នុងកិច្ចប្រជុំពិគ្រោះយោបល់ ​នាថ្ងៃនេះ ​មានតំណាងគណបក្សនយោបាយបានលើកឡើង ដោយស្នើកំណត់កាលបរិច្ឆេទជាក់លាក់អំពីការស្នើសុំឯកសារបញ្ជាក់អត្តសញ្ញាណពី១៥ថ្ងៃ ទៅ​៣០ថ្ងៃ​មុនការបោះឆ្នោត ​ប៉ុន្តែត្រូវបានឯកឧត្តម សោម សូរីដា អគ្គលេខាធិការរង គ.ជ.ប អះអាង​ថា​ ទាក់ទងនឹងសំណើនេះមិនអាចកែសម្រួលបានឡើយ ដោយសារការផ្តល់ឯកសារ​បញ្ជាក់​អត្តសញ្ញាណ​ត្រូវអនុវត្តរហូត​ដល់មួយ​ថ្ងៃមុន​ការបោះឆ្នោត​ និងឈរលើគោលការណ៍​ការគោរព​សិទ្ធិរបស់​ប្រជាពលរដ្ឋចំពោះអញ្ជើញ​ចូលរួមការបោះឆ្នោត។

ក្រៅពីនោះ​ឯកឧត្តម សោម សូរីដា បញ្ជាក់ថា ​ពាក់ព័ន្ធនឹងការស្នើសុំផ្ទេរសិទ្ធិនៃការផ្តល់ឯកសារ​អត្តសញ្ញាណ​បម្រើ​ឲ្យការបោះឆ្នោតពីអាជ្ញាធរ ​ឃុំ-សង្កាត់ ឲ្យ គ.ជ.បវិញ​ គឺពុំអាចកែសម្រួល​បាន​ឡើយ​ដោយសារការ​គ្រប់គ្រង​អត្តសញ្ញាណរបស់ប្រជាពលរដ្ឋ ​ជាការទទួលខុសត្រូវដោយស្ថាប័ន​ជំនាញ​ដែលមាន​ទិន្នន័យ​លម្អិត​របស់​សាមី​​ខ្លួនតែប៉ុណ្ណោះ។

គួរបញ្ជាក់ថា ​តាមច្បាប់ស្តីពីការបោះឆ្នោត ​ដើម្បីចូលរួមការបោះឆ្នោតបាន ប្រជាពលរដ្ឋតម្រូវ​ឲ្យ​មានអត្តសញ្ញាណប័ណ្ណសញ្ជាតិខ្មែរតែមួយគត់ ​ប៉ុន្តែក្នុងករណីអត្តសញ្ញាណប័ណ្ណ​របស់បងប្អូន​ប្រជាពលរដ្ឋ​ហួសសុពលភាព បាត់បង់ ឬខូច ប្រជាពលរដ្ឋអាចស្នើសុំឯកសារ​បញ្ជាក់អត្តសញ្ញាណ​ពី​អាជ្ញាធរឃុំ-សង្កាត់ដែលខ្លួនរស់នៅ ដើម្បីទទួលបានឯកសារបញ្ជាក់​អត្តសញ្ញាណ​បម្រើ​ដល់ការបោះឆ្នោត៕ អត្ថបទ សេក ឧត្តម