កំពង់ចាម៖ ឆ្នេរខ្សាច់កោះប៉ែននិងស្ពានឬស្សី នឹងរៀបចំតុបតែង ឲ្យហើយមុនថ្ងៃឆ្លងឆ្នាំសកល ដើម្បីទទួល ភ្ញៀវទេសចរក្នុងប្រទេសនិងក្រៅប្រទេស មកលេងកម្សាន្តលើទឹកដីខេត្តកំពង់ចាម ខណៈបច្ចុប្បន្ន ក្រុមការងារកំពុងមមាញឹកកសាងស្ពានឬស្សីនេះឡើងវិញ ។

ជារៀងរាល់ឆ្នាំស្ពានឬស្សីកោះប៉ែននេះ ត្រូវបានកសាងរួចតាំងពីខែវិចិ្ឆកាមកម្ល៉េះ ប៉ុន្តែដោយសារ ទឹកទន្លេមេគង្គមានការស្រក់យឺត ទើបគេចាប់ផ្តើមកសាងនៅក្នុងដើមខែធ្នូនេះដែលមាន ប្រវែងជាង ៨០០ម៉ែត្រ ​ដោយមានទទឹង២ម៉ែត្រកន្លះដែលចំណាយឬស្សីជាង២ម៉ីនដើម។

បើតាមការបញ្ជាក់ពីលោក ប៊ុន ដារ៉ា ដែលជាម្ចាស់អភិរក្សស្ពានឬស្សី បានប្រាប់ឲ្យដឹងថា ស្ពានឬស្សីកោះប៉ែនគឺកំពុងតែបានកសាងជាបណ្តើរៗ ​ខណៈបច្ចុប្បន្ន ​បាន៧០%ហើយ បើទោះបី​ទឹកទន្លេមេគង្គមានការស្រកចុះយឺតយ៉ាវ។

លោក បញ្ជាក់ទៀតថា ​ក្រុមការងារនឹងសម្រុកធ្វើឲ្យរួចរាល់មុនថ្ងៃចូលឆ្នាំសកល ដើម្បីទទួល​ភ្ញៀវទេសចរណ៍។

លោក ប៊ុន ដារ៉ា បានបន្ថែមទៀតថា ឆ្នាំនេះ ​ការកសាងរមណីយដ្ឋានឆ្នេរខ្សាច់កោះប៉ែនឡើងវិញ គឺ​មានការខុសប្លែកជាងរាល់ឆ្នាំពោលគឺ ​មានផ្លូវចេញចូលធំទូលាយ ​ទាំងកន្លែងចំណតរថយន្តម៉ូតូ មាន​បង្គន់អនាម័យចល័ត ​មានពោងទឹកខ្នាតមធ្យមសម្រាប់ក្មេងលេង​ និង​មានការរៀបចំ​គ្រែ​លំហែកាយ​ ដោយមានការកំណត់តារាងមុខម្ហូប ​និងសេវាកម្មផងដែរ។

ស្ពានឬស្សីកោះប៉ែននេះ ​គឺបានបង្ហាញភាពទាក់ទាញ និងសក្កានុពលយ៉ាងសំខាន់ លើវិស័យ​ទេសចរណ៍​ក្នុងខេត្តកំពង់ចាម ហើយក្នុងឆ្នាំនេះ​មានលក្ខណៈប្លែកជាងរាល់ឆ្នាំគឺមានការពង្រីង​ឆ្នេរខ្សាច់ ​និងផ្លូវចេញចូលធំជាងមុន ​ដើម្បី​សម្រួល​ចរាចរ​កុំមានការកក់ស្ទះនាពេលបុណ្យទាន និង​មួយវិញទៀតនោះគឺខាងឆ្នេរខ្សាច់កោះប៉ែន មាន​បង្កើតស្តង់​សម្រាប់​ឲ្យ​អ្នកភូមិលើកោះនេះ​បាន​លក់​នំ​ចំណី​ខ្មែរដែលផលិតផ្ទាល់តែម្តង។ស្ពានឬស្សីកោះប៉ែន នឹងអាចទាញយកភ្ញៀវទេសចរណ៍​កាន់តែកើនឡើងក្នុង ឆ្នាំថ្មីនេះ ​និងបង្ហាញពីអត្តសញ្ញាណ​របស់ខេត្តកំពង់ចាម ហើយអ្វីដែល​យើង​រង់ចាំមិនភ្លេចនោះតំបន់មួយនេះ​ល្បីក្នុងបទចំរៀងរបស់អធិរាជសំឡេងមាស ស៊ុន ស៊ីសាមុត ផងដែរ៕អត្ថបទ៖ ថុង​ សីហា