បាត់ដំបង៖ អភិបាលខេត្តបាត់ដំបង ឯកឧត្តម សុខ លូ​ បាន​អញ្ជើញ​ចុះពិនិត្យនិងវាយតម្លៃ​អំពី​វឌ្ឍនភាព​នៃការសាងសង់​មជ្ឈមណ្ឌល​បន្សាប ព្យាបាល និងស្តារនីតីសម្បទា អ្នកញៀន​គ្រឿងញៀន កែ ស៊ីនួន មានទីតាំងស្ថិតនៅភូមិស្តៅ ឃុំស្តៅ ស្រុករតនមណ្ឌល ខេត្តបាត់ដំបង ។

ឯកឧត្តម សុខ លូ បានចាត់ទុកការបង្កើតមជ្ឈមណ្ឌលនេះឡើង​ គឺជាការវិនិយោគមួយដ៏ធំ ដើម្បីជួយ​ដល់សង្គមជាតិ ខណៈមជ្ឈមណ្ឌលនេះ​គ្រោង​នឹងធ្វើការសម្ពោធបើក​ឱ្យដំណើរការ​ជាផ្លូវការ​ ក្នុងពេលដ៏ខ្លីខាងមុខនេះ។

ឯកឧត្តម បានបន្តថា សម្តេចក្រឡាហោម ស ខេង តែងតែសួរនាំអំពីវឌ្ឍនភាពនៃដំណើរការ​សាងសង់​មជ្ឈមណ្ឌលបន្សាប ព្យាបាល និងស្តារនីតីសម្បទាអ្នកញៀនគ្រឿងញៀន​ដែលនេះ​គឺជាការបង្ហាញឱ្យឃើញពីការយកចិត្តទុកដាក់ពីសម្តេចលើមជ្ឈមណ្ឌលនេះ​ ដើម្បីជួយដល់​ជនរង​គ្រោះដោយសារគ្រឿងញៀន ​និងបានស្តារនីតិសម្បទាពួកគាត់ឡើងវិញ។

លោកវេជ្ជបណ្ឌិត កែ ស៊ីនួន នាយកមជ្ឈមណ្ឌលបន្សាបព្យាបាល និងស្តារនីតីសម្បទា ​អ្នកញៀន​គ្រឿងញៀន កែ ស៊ីនួន បានបញ្ជាក់ថា ​មជ្ឈមណ្ឌលនេះ ​បានសាងសង់ឡើងនៅលើផ្ទៃដីទំហំ១៥ ហិកតា​ដោយចំណាយពេលសាងសង់រយៈពេល៦ខែ​ និងសម្រេចលទ្ធផលជិត១០០% ។

លោក ​បានបន្តថា រហូតមកដល់ពេលនេះ មជ្ឈមណ្ឌលបានសាងសង់រួចរាល់នូវអគាការិយាល័យ​រដ្ឋបាល ​អគារបន្សាប ​អគារអប់រំផ្លូវចិត្ត អគារអាហារដ្ឋាន ​អគារស្នាក់នៅរួមចំនួន២អគារ អគារស្នាក់​នៅដាច់ដោយឡែកចំនួន១អគារ ​និងមានគ្រែចំនួន៤០០ ​ហើយមាន​គម្រោង​នឹងធ្វើការពង្រីក​អគារ​បន្ថែមទៀត ក្នុងករណីជនរងគ្រោះដោយសារគ្រឿងញៀន​មានការកើនឡើង ។

លោកវេជ្ជបណ្ឌិត បានបន្តថា ដោយមានការគាំទ្រពីគ្រប់មជ្ឈដ្ឋាននានា ក៏ដូចជារដ្ឋបាល​ខេត្ត​បាត់ដំបង​ និងអង្គភាពពាក់ព័ន្ធ ពិសេសសម្តេចក្រឡាហោម ស ខេង ​ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ​និងជាប្រធានក្រុមការងាររាជរដ្ឋាភិបាលកម្ពុជា ​ចុះមូលដ្ឋានខេត្តបាត់ដំបង បាន​លើក​ទឹកចិត្ត​និង​គាំទ្រ​ឱ្យ​រៀបចំ​មជ្ឈមណ្ឌលនេះ ​ឱ្យក្លាយជា​មជ្ឈមណ្ឌល​ស្តង់ដារ​គំរូមួយរបស់​ខេត្តបាត់ដំបង​ និងទូទាំងប្រទេសកម្ពុជា ​មានប្រសិទ្ធភាពខ្ពស់ក្នុងការអប់រំ ​គ្រប់គ្រងបន្សាប និង​ស្តារនីតិសម្បទាដល់អ្នកញៀនគ្រឿងញៀន ។

លោកវេជ្ជបណ្ឌិត បានបញ្ជាក់ថា បើអាណាព្យាបាល ​ឬក្រុមគ្រួសារ ​មានកូនចៅ សាច់ញាតិ ដែល​បានប្រើប្រាស់គ្រឿងញៀន ​អាច​យកគាត់​មកផ្ញើរនៅ​មជ្ឈមណ្ឌល ដើម្បី​ទទួល​បានការអប់រំ​ផ្នែកផ្លូវ​ចិត្ត ​បន្សាប​ព្យាបាល​ អប់រំបំណិនជីវិត ​រៀនជំនាញវិជ្ជាជីវៈផ្សេងៗដូចជា ​ជាងរថយន្ត ជាងតុ ទូ ជាង​ម៉ាស៊ីនត្រជាក់ ជាងភ្លើង ទូរស័ព្ទ កាត់សក់ ផ្នែក​កសិកម្ម កុំព្យូទ័រ ​និងភាសាអង់គ្លេសជាដើម៕អត្ថបទ៖ នឿត សុភ័ក្ត្រ