សៀមរាប៖ នៅថ្ងៃទី១៦ខែធ្នូឆ្នាំ២០២២ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងក្រុមការងារ បានអញ្ជើញចុះបើកការដ្ឋានស្ថាបនាផ្លូវចាក់កៅស៊ូ ប្រភេទDBST បន្ថែមប្រវែង ៣ពាន់ម៉ែត្រ នៃគម្រោងសរុបជាង ១១គីឡូម៉ែត្រ តភ្ជាប់ពីផ្លូវជាតិលេខ៦៨ ឆ្ពោះទៅកាន់តផ្លូវជាតិលេខ៦ ក្នុងស្រុកក្រឡាញ់ ខេត្តសៀមរាប ។ផ្លូវកៅស៊ូថ្មីនេះជាអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជាតាមរយៈឯកឧត្ដមសៀង ណាំ។

ឯកឧត្តម សៀង ណាំ មានប្រសាសន៍ថា ប្រជាពលរដ្ឋនៅក្នុងភូមិ/ឃុំទាំងអស់ ដែលតែងតែគាំទ្រ និងបានបោះឆ្នោតជូនប្រមុខរាជរដ្ឋាភិបាលដែលដឹកនាំដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ជានិច្ចកាលសម្ដេចតែងតែគិតគូរ យកចិត្តទុកដាក់ខ្ពស់ចំពោះសុខទុក្ខ របស់ប្រជាពលរដ្ឋគ្រប់ពេលវេលា ជាក់ស្ដែងដូចជាសមិទ្ធផលផ្លូវមួយខ្សែនេះ គឺជាអំណោយ​ដ៏ថ្លៃថ្លា​របស់សម្ដេចតេជោសែន នាយករដ្ឋមន្ត្រី ។

ឯកឧត្តម បានបន្ដថា បច្ចុប្បន្ននេះ កម្ពុជា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រី កម្ពុជាពិតជាមានមោទកភាព និងកិត្យានុភាពជាតិ ជាបន្តបន្ទាប់ ជាក់ស្ដែងនាពេលថ្មីៗនេះ កម្ពុជាបានទទួលជោគជ័យ ក្នុងការរៀបចំកិច្ចប្រជុំកំពូលអាស៊ាន និងអាស៊ានបូក ហើយពិសេសនោះ គឺសម្ដេចតេជោសែនដឹកនាំប្រទេសកម្ពុជា ប្រកបដោយសុខ សន្តិភាព និងការអភិវឌ្ឍលើគ្រប់វិស័យ មានទាំងផ្លូវ ថ្នល់ ទឹក ភ្លើង, និងហេដ្ឋារចនាសម្ព័ន្ធនានា មន្ទីរពេទ្យ/មណ្ឌលសុខភាព សាលារៀន វត្តអារ៉ាម ជាដើម ។

លោក សុខ ណារ៉េត អភិបាលស្ដីទីស្រុកក្រឡាញ់ បានមានប្រសាសន៍ថា ឯកឧត្តម សៀង ណាំ បានបន្តជួយស្ថាបនាផ្លូវចាក់កៅស៊ូ DBST បន្តប្រវែង ៣,០០០ម៉ែត្រ នៃប្រវែងផ្លូវសរុប ១១,២០០ម៉ែត្រ តភ្ជាប់ពីផ្លូវជាតិលេខ៦៨ ពីភូមិចន្លាស់ដៃ ក្នុងឃុំចន្លាស់ដៃ មកជាប់ផ្លូវជាតិលេខ៦ ត្រង់ចំណុចភូមិគោកត្រុំ ឃុំស្រណាល ស្រុកក្រឡាញ់ ដែលបានស្ថាបនាកាលពីឆ្នាំ២០១៩កន្លងទៅ បានប្រវែងជាង ៨គីឡូម៉ែត្ររួចរាល់ហើយ ដែលផ្លូវមួយខ្សែនេះ ជាអំណោយដ៏ថ្លៃថ្លាបំផុតរបស់ សម្ដេចតេជោ ហ៊ុន សែន នាយករដ្ឋមន្ត្រី ផ្តល់តាមរយៈឯកឧត្តម សៀង ណាំ ។

នៅក្នុងពិធីនោះផងដែរ ឯកឧត្តម បានផ្តល់ជូនដល់លោកយាយ លោកតា និងបងប្អូនប្រជាពលរដ្ឋ ៧៧០នាក់ ក្នុងម្នាក់ៗទទួលបានត្រីខ និងសារុង ។ដោយឡែកក្មេងមានពិការភាពមួយនាក់ ទទួលបានរទេះជនពិការមួយគ្រឿង និងក្រុមការងារធ្វើផ្លូវ ទទួលបានថវិកាចំនួន ១លានរៀល ផងដែរ ៕