វាយសី៖ កីឡាករថ្នាលនៃក្រុមជម្រើសថ្នាលកីឡាវាយសីកម្ពុជាម្នាក់ គឺកីឡាករ សុខ រីករាយ បាននឹងកំពុងសំងំហ្វឹកហាត់នៅប្រទេសថៃ ដើម្បីពង្រឹងសមត្ថភាពត្រៀមការប្រកួតអន្តរជាតិនានា ពិសេសត្រៀមស៊ីហ្គេមឆ្នាំ២០២៣ នៅកម្ពុជាតែម្ដង។
ឯកឧត្ដម ជាម សុភា អគ្គលេខាធិការសហព័ន្ធកីឡាវាយសីកម្ពុជាបានបង្ហើបថា មកទល់ពេលនេះ សុខ រីករាយ បានហ្វឹកហាត់នៅថៃរយៈពេល ៣ឆ្នាំហើយ។ រីឯសមត្ថភាពគួរមានការរីកចម្រើនគួរឲ្យកត់សម្គាល់ដែរ តែបើធៀបនឹងយុវជនថ្នាលដែលប្រមូលផ្ដុំក្នុងស្រុក ក៏មិនលើសខ្វះគ្នាប៉ុន្មានដែរ។ ដូច្នេះពួកគេនឹងក្លាយជាធនធានបន្ដវេនដ៏សំខាន់ សម្រាប់ត្រៀមការប្រកួតកីឡាស៊ីហ្គេមនាពេលខាងមុខ។ គួរដឹងថា កីឡាករ សុខ រីករាយ បានចាប់ផ្ដើមលេងកីឡាវាយសីតាំងក្មេង អំឡុងពេលទៅរស់នៅជាមួយឪពុក-ម្តាយដែលធ្វើការនៅថៃ។ ដោយសារមើលឃើញពីទេពកោសល្យ និងសមត្ថភាពដ៏ល្អរបស់គេ សហព័ន្ធក៏ជ្រើសរើសរូបគេបញ្ចូលក្នុងក្រុមជម្រើសជាតិថ្នាល ហើយបានបញ្ជូនទៅហ្វឹកហាត់នៅថៃវិញកាលពីឆ្នាំ២០១៧។ ជាមួយគ្នានោះ សុខ រីករាយ ក៏បានចូលរួមប្រកួត និងដណ្ដើមពានរង្វាន់ជាច្រើននៅថៃផងដែរ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
