ភ្នំពេញ៖ នៅវិមានសន្តិភាព កាលពីល្ងាចថ្ងៃទី១៧ ខែធ្នូ ឆ្នាំ២០២២ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឱ្យឯកឧត្តម ង្វៀន វ៉ាន់នេន សមាជិកការិយាល័យនយោបាយមជ្ឈិមបក្សកុម្មុយនីស្ដវៀតណាម និងជាលេខាបក្សក្រុងហូជីមិញ ចូលជួបសម្តែងការគួរសម និងពិភាក្សាការងារ។

ឯកឧត្តម អ៊ាង សុផល្លែត ជំនួយការផ្ទាល់សម្តេចតេជោ ហ៊ុន សែន បានមានប្រសាសន៍ឲ្យដឹងនៅក្រោយជំនួបនោះថា ឯកឧត្តម ង្វៀន វ៉ាន់នេន បានគោរពជម្រាបជូនសម្ដេចតេជោថា កន្លងមកទីក្រុងហូជីមិញ និងរាជធានីភ្នំពេញ បានធ្វើកិច្ចសហប្រតិបត្តិការទប់ស្កាត់ការរីករាលដាលជំងឺកូវីដ-១៩ ជំរុញការគ្រប់គ្រង និងបើកសេដ្ឋកិច្ចឡើងវិញ ហើយធ្វើកិច្ចសហប្រតិបត្តិការលើវិស័យដទៃទៀត ព្រមទាំងវិស័យទេសចរណ៍ក៏មានការតភ្ជាប់ទាំងហេដ្ឋារចនាសម្ព័ន្ធ រវាងប្រជាជននិងប្រជាជន យុវជននិងយុវជនផងដែរ។

ជាការឆ្លើយតប សម្ដេចតេជោ ហ៊ុន សែន នាយករដ្ឋមន្ត្រី បានថ្លែងនូវការគាំទ្រចំពោះកិច្ចសហប្រតិបត្តិការរវាងរាជធានីភ្នំពេញ និងទីក្រុងហូជីមិញ និហលើកទឹកចិត្តឲ្យមានការយកចិត្តទុកដាក់ ជំរុញវិស័យទេសចរណ៍ តាមផ្លូវគោក ផ្លូវទឹក និងផ្លូវអាកាស និងយកចិត្តទុកដាក់ជំរុញកំណើនពាណិជ្ជកម្ម រវាងប្រទេសទាំងពីរ៕