កំពត៖ មន្ត្រីជំនាញបានបញ្ជាក់ថា បន្ទាប់ពីគ្រប់គ្រងជំងឺកូវីដ-១៩ បានល្អប្រសើរាជរដ្ឋាភិបាលបានប្រកាសបើកប្រទេសឡើងវិញមក វិស័យទេសចរណ៍ខេត្តកំពត បានស្ទុះងើបឡើងវិញយ៉ាងឆាប់រហ័។ ទាំងចំនួនភ្ញៀវទេសចរ តំបន់រមណីយដ្ឋាន និងសេវាកម្មផ្សេងៗ មានការកើនឡើងច្រើន បើប្រៀបធៀបទៅនឹងមុនផ្ទុះជំងឺកូវីដ-១៩។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានប្រាប់ឲ្យដឹងថា ក្រោមកិច្ចខិតខំប្រឹងប្រែងរបស់ថ្នាក់ដឹកនាំខេត្តមន្ទីរ អង្គភាពជំនាញពាក់ព័ន្ធ បានធ្វើឲ្យដំណើរការលើវិស័យទេសចរណ៍មានភាពល្អប្រសើរឡើងវិញយ៉ាងឆាប់រហ័ស។

ក្នុងនោះ គោលដៅទេសចរណ៍បានកើនឡើងដល់ជាង ៣០កន្លែង មានរមណីយដ្ឋាន ២៣កន្លែង សហគមន៍ទេសចរណ៍ ០៤កន្លែង គោលដៅទាក់ទាញទេសចរ ០៤កន្លែង ទីតាំងបោះតង់ ០៥កន្លែង និងកន្លែងជាច្រើនទៀតកំពុងរៀបចំជាបន្តបន្ទាប់។ ខេត្តកំពតចែកចេញជាប៉ូលទេសចរណ៍សំខាន់ៗចំនួន៣ ដែលទេសចរនិយមទៅលេងច្រើន ទី១.តំបន់ទឹកឈូ ទី២.តំបន់ភ្នំបូកគោ និងទី៣.តំបន់ទំនប់ម្លិច។

លោកប្រធានមន្ទីរ បានបញ្ជាក់ថា ១១ខែ ឆ្នាំ២០២២នេះ ភ្ញៀវទេសចរមកសម្រាកកម្សាន្តខេត្តកំពត មានចំនួន ជាង ១លាន ៧សែននាក់ (ភ្ញៀវទេសចរអន្តរជាតិជាង៤ម៉ឺននាក់) បើប្រៀបធៀបឆ្នាំ២០២១ គឺកើនឡើងជាង១០០% ហើយកើនឡើងជាង៥ភាគរយ បើប្រៀបធៀបទៅនឹងឆ្នាំ២០១៩ (មុនពេលផ្ទុះជំងឺកូវីដ-១៩)។

ជាងនេះទៅទៀត លោកប្រធានមន្ទីរក៏បានបញ្ជាក់ផងដែរថា សេវាកម្មទេសចរណ៍ផ្សេងៗក៏មានការកើនឡើងផងដែរ ក្នុងនោះ សេវាស្នាក់នៅកើនឡើងដល់ទៅជាង ៤៦០០បន្ទប់ ហើយបើរួមទាំងសេវាបោះតង់ទៀតនោះ ខេត្តកំពតមិនមានបញ្ហាខ្វះខាតបន្ទប់ស្នាក់នៅនោះទេ៕ អត្ថបទ៖ អន សារឹម​