ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ជាមួយនឹង​មោទនភាព នៃ​សមិទ្ធផល​ដែល​សម្រេច​បាន​រហូតមកដល់បច្ចុប្បន្ន ជាពិសេស​សុខសន្តិភាព​ដែល​រក​បាន​ដោយ​លំបាក​បំផុត​នោះ​សម្តេច​នៅតែក្រើនរំលឹក និងសង្ឃឹមថា អ្នកបន្តវេនជំនាន់ក្រោយនឹងបន្ត​ស្មារតីរួបរួមគ្នា​ដើម្បី​ថែ​រក្សា​សុខសន្តិភាពលើកស្ទួយដល់ការអភិវឌ្ឍ។

សម្តេចតេជោប្រមុខរាជរដ្ឋាភិបាល​កម្ពុជានៅតែរម្លឹក​អំពី​កត្តា​សុខសន្តិភាព​ដែល​ជា​មូលដ្ឋាន​គ្រឹះ​ នៃ​ការ​អភិវឌ្ឍបែបនេះត្រូវបានធ្វើឡើង ខណៈ សម្តេចបានអញ្ជើញទទួល​ពាន​រង្វាន់​សមិទ្ធផល​ពេញ​មួយជី​វិតរបស់មេដឹកនាំឆ្នើមពិភពលោក ប្រគល់ជូនដោយ វិទ្យាស្ថានយុទ្ធសាស្ត្រ សម្រាប់​អាស៊ី​ប៉ាស៊ីហ្វិក (KSI) ស្ដីពី “ការបង្កើនទំនាក់ទំនងអាស៊ាន-ចិន”នៅ វិមានសន្តិភាពនាព្រឹកថ្ងៃទី ១៩ ខែធ្នូ ឆ្នាំ២០២២ ក្រោមវត្តមានចូលរួមអបអរសាទរពីសម្តេចកិត្តិព្រឹទ្ធបណ្ឌិត ភរិយា​ដ៏​ឧត្តម​របស់​សម្តេច និង​ថ្នាក់ដឹកនាំជា ឥស្សរជនក្នុងរាជរដ្ឋាភិបាល មន្ត្រីអ្នកមុខអ្នក​ការ​ និង​ក្រុម​គ្រួសារ​ផង​ដែរ។

សម្តេចបានថ្លែងថា ពិតណាស់ថា ការទទួលបាននូវពានរង្វាន់ដ៏វិសេសវិសាលនេះ គឺជា​សក្ខីកម្ម​ នៃភាពជោគជ័យដ៏ត្រចះត្រចង់ នៃការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ជាពិសេស​តាមរយៈ ការអនុវត្ត “គោលនយោបាយឈ្នះ-ឈ្នះ»ដែលបាននាំមកនូវការបង្រួបបង្រួមជាតិ, សន្តិភាព និង ស្ថិរភាពនយោ បាយ ។ ការណ៍នេះ បានក្លាយជាចលករ និង ចន្ទល់ដ៏រឹងមាំ ក្នុង​ការ​ជំរុញកំណើន សេដ្ឋកិច្ចកម្ពុជាឱ្យសម្រេចបានក្នុងអត្រា ៧ ភាគរយ ជាមធ្យមប្រចាំឆ្នាំ រហូត​ធ្វើ​ឱ្យ​កម្ពុជា​ក្លាយ​ជា ប្រទេសមានចំណូលមធ្យមកម្រិតទាបនៅក្នុងឆ្នាំ ២០១៥ និង កំពុងបោះ​ជំហ៊ាន​ឆ្ពោះ​ទៅ​ជា​ប្រទេស មានចំណូលមធ្យមកម្រិតខ្ពស់នៅឆ្នាំ ២០៣០ និង ប្រទេសមាន​ចំណូល​ខ្ពស់​នៅ​ឆ្នាំ២០៥០ ។ ជាមួយនឹងការរំពឹងទុកបែបនេះ សម្តេចក៏​នៅ​តែ​រំលឹក​ដល់​អ្នក​ជំនាន់​ក្រោយ​ត្រូវ​រួប​រួមគ្នាថែរក្សាសុខសន្តិភាព ។

សម្តេចថ្លែងថា ចាប់តាំងពីកម្ពុជាបានក្លាយជាសមាជិកទី ១០ នៃសមាគមប្រជាជាតិអាស៊ីអាគ្នេយ៍ (អាស៊ាន) ក្នុងឆ្នាំ ១៩៩៩, កម្ពុជាត្រូវបានទទួលស្គាល់ថា ជាប្រទេសមួយ ដែល​បាន​ធ្វើ​សមាហរណកម្ម​យ៉ាងសកម្មទៅក្នុងតំបន់ និង ពិភពលោក, បានកសាងចំណងមិត្តភាព និង សហប្រតិបត្តិការ​ល្អ​ប្រសើរជាមួយបណ្តាប្រទេសនានា ហើយបានកំពុងចូល​រួម​បំពេញ​តួនាទី​យ៉ាង​សកម្ម ដោយស្មើសិទ្ធិ និង ស្មើភាព ក្នុងគ្រប់កិច្ចការអន្តរជាតិ ទាំងក្នុងក្របខណ្ឌតំបន់ និង ពិភ​ព​លោក ។ ជាក់ស្តែង កិច្ចខិតខំប្រឹងប្រែងក្នុងការដឹកនាំ និង រៀបចំកិច្ចប្រជុំ​កំពូល​អាស៊ាន​ដោយ​ជោគជ័យ នៅឆ្នាំ ២០០២, ២០១២ និង ២០២២ គឺជាមោទនភាពជាតិសម្រាប់កម្ពុជា នៅ​លើ​ឆាកអន្តរជាតិ ដែលបង្ហាញ​ដល់​ពិភព​លោក​អំពី​ស្មារតី​រួម​ចំណែក​ដល់​ការ​កសាង​សហគមន៍​អាស៊ាន និងពង្រឹងកិច្ចសហប្រតិបត្តិការពហុភាគី ដើម្បីសន្តិភាព, ស្ថិរភាព, សន្តិសុខ និង ការអភិវឌ្ឍ ប្រកបដោយចីរភាព នៅក្នុងសកលលោក និងតំបន់៕ អត្ថបទ៖ មុត សុទ្ធ