ឯកឧត្តម យឿន យឿត ទីប្រឹក្សារាជរដ្ឋាភិបាលកម្ពុជា និងលោកជំទាវ នៅព្រឹកថ្ងៃទី១៩ ខែធ្នូ ឆ្នាំ២០២២នេះ បានផ្ញើសារសម្តែងនូវអំណរសាទរ និងគោរពកោតសរសើរយ៉ាងជ្រាលជ្រៅបំផុត ជូនចំពោះសម្តេចអគ្គមហាសេនាបតីតតែជោ ហ៊ុន សែន នាយករដ្ឋមន្រ្តី នៃព្រះរាជា​ណា​ចក្រ​កម្ពុជា ក្នុងឱកាសដែលសម្តេចទទួលបានពានរង្វាន់ «សមិទ្ធផល​ពេញ​មួយ​ជីវិត​របស់​មេដឹកនាំ​ឆ្នើម​» ដែលប្រគល់ជូនដោយវិទ្យាស្ថានយុទ្ធសាស្ត្រ សម្រាប់តំបន់អាស៊ី-ប៉ាស៊ីហ្វិក (KSI) ដែល​មាន​មូលដ្ឋាន​នៅប្រទេសម៉ាឡេស៊ី នាថ្ងៃទី១៩ ខែធ្នូ ឆ្នាំ២០២២នេះ។

ឯកឧត្តមយឿន យឿត បានលើកឡើងថា«សូមគោរពជូនពរ និងអបរអរសាទរយ៉ាង​ស្មោះអស់​ពី​ដួង​ចិត្ត​ជូន​ចំពោះសម្ដេចតេជោនាយករដ្ឋមន្ត្រី។ ការផ្តល់ពានរង្វាន់នេះ«សមិទ្ធផលពេញមួយជីវិតរបស់មេដឹកនាំឆ្នើម»នាពេលនេះ គឺពិត​ជា​បង្ហាញ​ពី​ការផ្ដល់តម្លៃ និងមហាកិត្តិយសដ៏ឧត្ដុង្គឧត្ដម ចំពោះវីរភាព និងស្នាដៃដឹកនាំ និង​អភិវឌ្ឍន៍​ប្រទេស​ប្រកបដោយគតិបណ្ឌិតរបស់សម្ដេចតេជោនាំឲ្យប្រទេសកម្ពុជា សម្រេច​បាន​នូវ​សុខ​សន្តិភាព សុខុមាលភាពសង្គម និងការអភិវឌ្ឍសេដ្ឋកិច្ច ដែល​ត្រូវ​បាន​ទទួល​ស្គាល់​ដោយ​វិទ្យាស្ថាន​យុទ្ធ​សាស្ត្រសម្រាប់តំបន់អាស៊ី-ប៉ាស៊ីហ្វិក (KSI)នេះ»។

ជាមួយគ្នានោះដែរ ឯកឧត្តមទីប្រឹក្សា និងភរិយា សូមលើកហត្ថបួងសួងដល់គុណព្រះរតនត្រ័យ វត្ថុ​ស័ក្ដិសិទ្ធិទាំងអស់ក្នុងលោក សូមជួយប្រោះព្រំសព្វសាធុការពរបវរសួស្ដី សិរីមង្គល វិបុល​សុខ​មហា​ប្រសើរ​ជូន សម្ដេចតេជោ និងសម្ដេចកិត្តិព្រឹទ្ធបណ្ឌិត ព្រមទាំងបុត្រា-បុត្រី និងចៅៗ ជា​ទី​ស្រឡាញ់​ទាំង​អស់ ជួបតែសេចក្ដីសុខ សុភមង្គល ព្រមទាំងប្រកបដោយពុទ្ធពរទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។