កំពត៖ កាលពីថ្ងៃទី១៨ ខែធ្នូ ឆ្នាំ២០២២ ស្រុកក្រុងចំនួនបីក្នុងខេត្តកំពត បាន​ទទួល​រង​នូវ​ឥទ្ធិពល​ខ្យល់​កន្ត្រាក់​បណ្តាល ឲ្យសាលារៀន កុដិព្រះសង្ឃ និងលំនៅស្ថានប្រជាពលរដ្ឋ១២៣៣ខ្នងរងការខូចខាត។

 តាមរបាយការណ៍បឋមដែលទទួលបានពីគណៈកម្មាធិការសាខាកាកបាទក្រហមកម្ពុជា ខេត្តកំពត​បាន​ឲ្យ​ដឹង​ថា កាលពីល្ងាចថ្ងៃទី១៨ ខែធ្នូ ឆ្នាំ២០២២ ក្រុងស្រុកចំនួន៣ របស់ខេត្តកំពត បាន​ទទួលរ​ង​ឥទ្ធិពល​ នៃ​ខ្យល់​កន្ត្រាក់ បង្កឲ្យលំនៅស្ថានប្រជាពលរដ្ឋ សាលារៀន កុដិព្រះសង្ឃ​ក្នុង​ស្រុក​ក្រុង​ចំនួន​បី​រង​ការ​ខូច​ខាត​យ៉ាង​ច្រើនសន្ធឹកសន្ធាប់។ ក្នុងនោះ ក្រុងបូកគោប៉ះពាល់ផ្ទះប្រជាពលរដ្ឋចំនួន១.១៦៧ខ្នង ក្នុង​នោះ​ខូច​ខាត​ធ្ងន់ធ្ងរ ៤ខ្នង ខូចខាតមធ្យម២៩៧ខ្នង និងប៉ះពាល់បន្តិចបន្តួចចំនួន៨៤០ខ្នង។ ជាមួយ​នេះក៏​មាន​ការ​ខូចខាតសាលាចំនួន៩ខ្នង កុដិព្រះសង្ឃមួយខ្នង និងលិចទូកនេសាទចំនួនបួនគ្រឿងផងដែរ។

ចំណែក​នៅស្រុកបន្ទាយមាសមានការប៉ះពាល់ផ្ទះប្រជាពលរដ្ឋ៥៨ខ្នង ពោលគឺ​ខូច​ខាត​កម្រិត​ធ្ងន់​ចំនួន​បី​ខ្នង​។ ស្រុកកំពង់ត្រាចរងការខូចខាតផ្ទះប្រជាពលរដ្ឋកម្រិតធ្ងន់ មធ្យម និងស្រាលចំនួនប្រាំបីខ្នង៕