សៀមរាប៖ រូបសំណាកមេទ័ពពីសម័យអង្គរចំនួន១២រូប ត្រូវបានដាក់តាំងជានិមិត្ដរូប​នៅក្នុងសួនព្រះរាជដំណាក់ ក្រុងសៀមរាប ដើម្បីបង្ហាញដល់កូនខ្មែរជំនាន់ក្រោយ ឱ្យស្គាល់​ពី​មន្ដ្រីរាជការដែលខ្លាំងពូកែនាសម័យបុរាណ។

រូបចម្លាក់ចំនួន១២រូបនេះ ធ្វើពីលោហស្ពាន់សុទ្ធ មានកំពស់ជាង២ម៉ែត្រ​ រចនា​សំលៀកបំពាក់ និង​តុបតែងទៅតាមសម័យកាលនីមួយៗ។

លោកជំទាវ គង់ បញ្ញា រដ្ឋលេខាធិការក្រសួងព្រះបរមរាជវាំង ​មានប្រសាសន៍ថា រូបចម្លាក់មេទ័ព​ចំនួន​១២រូបនេះ ដែលតំណាងឱ្យនគរទាំង១២ ​នៅសម័យបាពួន សម័យអង្គរ ​និងសម័យបាយ័ន ។ការសាងសង់រូបដាក់តាំងក្នុងសួនព្រះរាជជំណាក់នេះ ​បន្ទាប់ពីក្រសួងព្រះបរមរាជវាំង ក៏​ដូចជា​ជំនាញ​ប្រវត្ដិសាស្ដ្រ នៅសាកលវិទ្យាល័យភូមិន្ទវិចិត្រសិល្បៈផ្នែកបុរាណវិទ្យា ​និងផ្នែកអក្សសាស្ដ្រ បាន​សិក្សាស្រាវជ្រាវនៅសិលាចារិកតាមប្រាសាទបុរាណ ​ដូចជា​នៅប្រាសាទ​បន្ទាយឆ្មា ប្រាសាទ​អង្គរវត្ដ ប្រាសាទបាពួន ប្រាសាទ​បាយ័ន​ ទើបសម្រេចជ្រើសរើយកមេទ័ពខ្លាំងចំនួន១២រូប ក្នុង​ចំណោមមេទ័ពជាង៣០រូប ​ដែលពួកគាត់បានកើតនិងបំរើរាជការនៅសម័យនោះយ៉ាងអង់​អាច​ខ្លាហាន ។

លោជំទាវ បានបន្ដថា ការរចនារូបចម្លាក់មេទ័ពពីសម័យមុន តម្រូវត្រូវតាមរូបរាង ​សំលៀកបំពាក់ សព្វាវុធ ​ម៉ូដសក់​ទៅតាមលំនាំសម័យកាលនៃមេទ័ពនោះ។​ រូបសំណាកទាំង១២ ត្រូវបានសាងសង់​ឡើងអំពីលោហៈស្ពាន់ រចនាឡើងជាចម្លាក់មូល គឺមានលក្ខណៈ និងទ្រង់ទ្រាយពេញលេញ និងមានទម្ងន់ពី២០០ ទៅ៣០០គីឡូ ទៅតាមរូបរាងជាលក្ខណៈខ្មែរបុរាណសុទ្ធសាធ។ ថ្វីត្បិតតែជាសមិទ្ធផលនៃស្នាដៃកូនខ្មែរសម័យថ្មី ​ប៉ុន្តែស្នាដៃដែលលេចឡើងនេះ​ ត្រូវបានរក្សា និង​អនុលោមយោងទៅតាមឯកសារប្រវត្តិសាស្ត្រជានិច្ច ដោយមិនចាកឆ្ងាយ​ពីប្រវត្តិសាស្ត្រ​នោះ​ឡើយ។

លោកជំទាវ បានបញ្ជាក់បន្ថែមថា ​ការកសាងរូបសំណាកមេទ័ពទាំងនេះ ថ្វាយព្រះករុណា ព្រះបាទ​សម្ដេចព្រះបរមនាថ នរោត្តម សីហមុនី ព្រះមហាក្សត្រ ​នៃព្រះរាជាណាចក្រកម្ពុជា ដែល​ជា​ស្នាដៃកូនខ្មែរបច្ចុប្បន្ន ​ដើម្បីទុកជូនកូនខ្មែរជំនាន់​ក្រោយៗបានដឹង ​ស្គាល់នូវមេទ័ព​ខ្មែរ​ដែល​ខ្លាំងពូកែ ពួកគាត់បានធ្វើពលីជីវិត ​លះបង់កម្លាំងកាយចិត្ត​ ដើម្បី​ការពារជាតិមាតុភូមិ ​ការពារទឹកដី ការពារមហានគរខ្មែរ៕