ភ្នំពេញ៖ មន្រ្តីឃុំ-សង្កាត់ បាននឹងកំពុងបន្តចុះសម្ភាសន៍កំណត់គ្រួសារ ងាយ​រងហានិភ័យ​ដែលកំពុងរស់​នៅក្នុងមូលដ្ឋានរបស់ខ្លួន។ ​ការចុះសម្ភាសន៍នេះ គឺដើម្បីស្វែងរកពលរដ្ឋ​ដែល​ស្ថិតក្បែរបន្ទាត់ភាពក្រីក្រ​ ជាក្រុមគោលដៅថ្មី ​សម្រាប់ការអនុវត្តកម្មវិធី​ឧបត្ថម្ភសាច់ប្រាក់​ជូនគ្រួសារ​ងាយរងហានិភ័យ ក្នុងអំឡុងពេលមានសម្ពាធអតិផរណា។

ឈានមកដល់ពេលនេះ ​ការស្វែងរកគ្រួសារគោលដៅ​សម្រាប់ការអនុវត្តកម្មវិធីឧបត្ថម្ភ​សាច់ប្រាក់​ជូនគ្រួសារងាយរងហានិភ័យ​ ក្នុងអំឡុងពេលមានសម្ពាធអតិផរណា គឺនៅតែបន្តនៅតាម​មូលដ្ឋាន​ឃុំ-សង្កាត់។​

ជាក់ស្ដែងលោក ជា សម្បត្តិ ជាមន្រ្តីសង្កាត់ ដង្កោ ខណ្ឌដង្កោ ​ដោយភ្ជាប់ជាមួយ TABLET បាន​បន្តចុះសម្ភាសន៍ គ្រួសារមានភាពលំបាក ​នៅតាមផ្ទះដោយផ្ទាល់។

លោកបញ្ជាក់ថា នេះជាការចុះសម្ភាសន៍វគ្គទី ២ ​ដើម្បីបន្តស្វែងរកគ្រួសារដែលមានជីវភាពខ្វះខាត ឱ្យពួកគេអាចទទួលបានការជួយជាថវិកា​ពីរាជរដ្ឋាភិបាល។ ​

លោកបន្តថា សម្រាប់ពលរដ្ឋដែលជាប់ក្នុងការ​សម្ភាសន៍វគ្គទី ១ ​ភាគច្រើនក៏បានទៅ​បើក​សាច់ប្រាក់​រួចរាល់ផងដែរ គិតចាប់ពីថ្ងៃចាប់ផ្ដើមអនុវត្តកម្មវិធីសឧបត្ថម្ភសាច់ប្រាក់​ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា ​កាលពីថ្ងៃទី ១០ ​ខែធ្នូ ​កន្លងទៅនេះ។

ចំពោះពលរដ្ឋទទួលបានការសម្ភាសន៍នៅថ្ងៃនេះ ​លើកឡើង​ពីការមើលឃើញពីភាពប្រសើរជាខ្លាំង ដែលរាជរដ្ឋាភិបាល ​ដាក់ចេញកម្មវិធីជំនួយសង្គមជាច្រើន ​ដើម្បីជួយដល់ប្រជាពលរដ្ឋ ជាពិសេស​សម្រាប់អ្នកមានភាពលំបាក។ពួកគេក៏សង្ឃឹមថា ​នឹងអាចជាប់ក្នុងការសម្ភាសន៍ និងអាចទទួល​បានថវិកា​ដូចគ្រួសារដទៃផងដែរ។

កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ​ ក្នុងអំឡុងពេលមានសម្ពាធអតិផរណា ជា​កម្មវិធីឧបត្ថម្ភសាច់ប្រាក់ថ្មី ​ដែលរាជរដ្ឋាភិបាលកម្ពុជាសម្រេចដាក់អនុវត្តនៅថ្ងៃទី ​១០ ខែធ្នូ ឆ្នាំ ២០២២ ​ស្របគ្នាជាមួយនឹង កម្មវិធីជំនួយសង្គមជាសាច់ប្រាក់ជួយ​ដល់គ្រួសារងផល​ប៉ះពាល់​ដោយសារទឹកជំនន់។

កម្មវិធីឧបត្ថម្ភសាច់ប្រាក់ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា ជា​កម្មវិធីមិនអចិន្ត្រៃយ៍ ​ដោយដំណាក់កាលដំបូងនេះ​ រាជរដ្ឋាភិបាលសម្រេចឱ្យអនុវត្តចំនួន​ ៣លើក។ ការផ្ដល់សាច់ប្រាក់លើកទី ១ គឺថ្ងៃទី ១០ ខែធ្នូ ឆ្នាំ ២០២២ លើកទី ២ថ្ងៃទី ១០ មេសា ឆ្នាំ ២០២៣ និងការផ្ដល់សាច់ប្រាក់លើកទី ៣ថ្ងៃទី ១០ ខែកក្កដា ២០២៣។ ចំពោះថវិកាទទួលបាន គឺមានភាពផ្សេងគ្នា ដោយអាស្រ័យលើទីតាំងតំបន់រស់នៅ និងអាស្រ័យលើចំនួនសមាជិក​គ្រួសារ​នីមួយៗ​ផងដែរ៕ អត្ថបទ៖ គឹមហុក