ភ្នំពេញ៖ នៅព្រឹកថ្ងៃទី១៩ ខែធ្នូ ឆ្នាំ២០២២នេះ នៅមជ្ឈមណ្ឌលជាតិរក្សាសន្តិភាព​ លោក TANINAI Ichitomo ​អនុប្រធានបេសកកម្មនៃស្ថានទូតជប៉ុនប្រចាំកម្ពុជា​បានចូលជួប នាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិរក្សាសន្តិភាព ​ដែលក្នុងជំនួបនេះ ភាគីជប៉ុនបាន​សន្យាផ្តល់​ជាច្រើន​ដល់ទ័ពមួកខៀវកម្ពុជា ​ដើម្បីគាំទ្រការ​ហ្វឹកហ្វឺន និងត្រៀមធ្វើជាម្ចាស់​ផ្ទះ​រៀប​ចំ​ហ្វឹកហ្វឺន​ក្របខ័ណ្ឌ​អង្គការសហប្រជាជាតិUN ជប៉ុន-កម្ពុជា​ ស្តីពីការប្រើប្រាស់គ្រឿងចក្រវិស្វកម្មUN ឆ្នាំ២០២៧។

លោក TANINAI Ichitomo បានថ្លែងថា ជប៉ុន នឹងផ្តល់ការបណ្តុះបណ្តាលដល់កង​កម្លាំងមួក​ខៀវកម្ពុជា​ និង​បញ្ជូនក្រុមការងារដែលមានជំនាញ​ខាងវិស្វកម្មមកកម្ពុជា ដើម្បីពិភាក្សាការ​រៀបចំ​វគ្គ​ហ្វឹកហ្វឺន​ដល់កងកម្លាំងមួកខៀវកម្ពុជា នានា ​ដែលបំរើឲ្យការត្រៀមធ្វើជាម្ចាស់ផ្ទះរៀបចំ​ហ្វឹកហ្វឺន​ត្រីភាគី ស្តីពីការប្រើប្រាស់គ្រឿងចក្រវិស្វកម្មធុនធ្ងន់នាឆ្នាំ២០២៧។

លោក TANINAI Ichitomo រំពឹងថា នឹងមានកិច្ចសហប្រតិបត្តិការកាន់តែច្រើនក្នុងវិស័យរក្សា​សន្តិភាព ជាពិសេស ​ការបង្កើនកិច្ចសហប្រតិបត្តិការវិស័យបោសសំអាត​មីននៅកម្ពុជា។

លោក TANINAI Ichitomo ​បានកោតសរសើរកម្ពុជា ក្នុងការបញ្ជូន​កងទ័ព​មួកខៀវទៅបំពេញ​បេស​កកម្ម​នៅក្រៅប្រទេស ​រួមទាំងសកម្មភាពបោសសំអាតមីនយ៉ាង​សកម្មរបស់កម្ពុជា។

តាមការបញ្ជាក់ពី ​ឯកឧត្តម នាយឧត្តមសេនីយ៍ សែម សុវណ្ណនី ៖ កម្ពុជា ​នឹងធ្វើជាម្ចាស់ផ្ទះ​នៃ​គម្រោង​ត្រីភាគី ជប៉ុន UN និងកម្ពុជា ​ស្តីពីការ​ហ្វឹកហ្វឺន​ប្រើប្រាស់គ្រឿងចក្រវិស្វកម្ម​ធុនធ្ងន់​នាឆ្នាំ២០២៧​ ដែលមានការចូលរួមពីបណ្តាប្រទេសអាស៊ាន​ និងក្នុងតំបន់ ។

ឯកឧត្តម ថា គម្រោងនេះ រៀបចំឡើងក្នុងគោលបំណងផ្តល់ការ​គាំទ្រដល់ប្រទេសបរិច្ចាគកង​កម្លាំង​ឱ្យធ្វើការចល័ត​បានយ៉ាងឆាប់រហ័ស ​និងមានគុណភាពខ្ពស់។ ​

គម្រោងនេះផងដែរ ​ត្រូវ​បាន​ផ្តួចផ្តើម​ឡើងដោយ​ ឯកឧត្តម Shinzo ABE នាយករដ្ឋមន្រ្តីនៃប្រទេស​ជប៉ុន នា​កិច្ចប្រជុំកំពូលស្តីពីការរក្សាសន្តិភាពនៅទីបញ្ជាការ អ.ស.ប. ​កាលពីខែកញ្ញា ឆ្នាំ២០១៤ កន្លងទៅ ។

ឯកឧត្តម នាយឧត្តមសេនីយ៍ ​ក៏បានស្នើដល់ភាគីជប៉ុន ជួយផ្តល់ការងារហ្វឹកហ្វឺនរយៈពេលវែង​ឱ្យបាន​ច្រើនទាំងគ្រូបង្គោល​ និងសិក្ខាកាមឆ្នើម ​ដើម្បីពង្រឹងសមត្ថភាព​ ចំណេះ និងជំនាញ ដើម្បីចូលរួម​បំពេញបេសកកម្មសន្តិភាព​ ក្រោមឆត្ររបស់អង្គការ​សហប្រជាជាតិ អោយកាន់​តែ​ល្អប្រសើរថែមទៀត ៕ អត្ថបទ ស៊ុម សុខជា