សៀមរាប៖ ការបោះជំរំជាសាកល ក្រោមគំនិត​ផ្តួចផ្តើម​សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឱ្យក្រសួងអប់រំ យុវជននិងកីឡា ជាអ្នកអនុវត្តផ្ទាល់ ។ នៅឆ្នាំ២០២២នេះ ការ​បោះជំរំសាកលលើកទី៨ ​រៀបចំឡើងនៅ ស្រុកបន្ទាយស្រី ​នៃខេត្តសៀមរាប ដែលមានយុវជន​មកពីតាមបណ្តាសាកលវិទ្យាល័យទំាង២៥រាជធានី-ខេត្ត ​មកជួបជុំគ្នា ដើម្បីបង្រៀន​ពួកគេ​ឱ្យចេះ​ធ្វើអ្វីៗដោយខ្លួនឯង។

លោក ស៊ីវ ឧត្តម គណៈកម្មការជំរំ និងជាប្រធានក្រុមយុវជនស្ម័គ្រចិត្ត បានប្រាប់ថា ការបោះជំរំ​ជា​សាកលលើកទី៨ នាឆ្នាំនេះ ចាប់ផ្តើមពីថ្ងៃទី១៩ធ្នូនេះ​ រហូតដល់ថ្ងៃទី២៤ធ្នូ ដែលមាន​រយៈពេល​មួយសប្តាហ៍ ​នៅលើទឹកដីស្រុកបន្ទាយស្រី​ នៃខេត្តសៀមរាប។

លោក ប្រាប់បន្តថា កម្មវិធីនេះរៀបចំដោយក្រសួងអប់រំ ​តាមរយៈអគ្គនាយកយុវជន ក្នុង​គោល​បំណង​ប្រមូលយុវជន​ ដែលជាសិស្សនិស្សិត នៅតាមសាកលវិទ្យាល័យ​នានាទូទំាង​២៥រាជធានី-ខេត្ត ​ដែល​មានគ្នា​រាប់រយនាក់ ដើម្បីចេញទៅបោះជំរំនៅតំបន់ដាច់ស្រយាលមួយ ក្នុងទិសដៅ​បង្រៀនយុវជនឱ្យចេះរៀនរស់ដោយខ្លួនឯង ​ពិសេសដើម្បីប្រមូលយុវជន​ ពីគ្រប់ទិសទី ដែល​ពុំធ្លាប់ស្គាល់គ្នាសោះ ឱ្យមកជួបជុំគ្នា ​និងចាប់ដៃគូរស់នៅជាក្រុម ​ក្នុងនាមជាកូនខ្មែរដូចគ្នា។ លោកបន្តថា កម្មវិធីនេះ​ ត្រូវតម្រូវឱ្យយុវជនរស់នៅក្នុងតង់​ និងតម្រូវឱ្យយុវជន ​ត្រូវចេះដាំបាយ ដាំស្ល ​និងការប្រឡ​ងប្រណាំងស្នាដៃផ្សេងៗ ​ក្រៅពីនេះ ​នឹងធ្វើដំណើរទស្សនកិច្ច​ទៅតាមតំបន់​រស់នៅមួយចំនួនរបស់បងប្អូន​ប្រជាពលរដ្ឋ ​ដើម្បីឱ្យយុវជន​បានដឹងពីការរស់នៅ​ រួមនឹង ទំនៀម​ទម្លាប់​ក្នុងការរស់នៅរបស់ពលរដ្ឋខ្មែរនៅខេត្តសៀមរាបផង។

គួរបញ្ជាក់ថា​ ការបោះជំរំយុវជនសាកល​ បានដំណើរការអស់រយៈពេល៧ឆ្នាំមកហើយ ហើយ​យុវជន​ដែលបានចូលរួមកម្មវិធីនេះ ​ពិតជាទទួលស្គាល់ពីតម្លៃ ​និង​បទពិសោធន៍ ដែលងាយ​នឹងធ្វើឱ្យជីវិតពួកគេជោគជ័យ ​នៅថ្ងៃអនាគត ​ព្រោះកម្មវិធីនេះ​ ក្រៅពីបង្រៀនយុវជនឱ្យចេះធ្វើអ្វីៗ ដោយខ្លួនឯង ​​នៅមាន​សកម្មភាព​លោតដុំ​យុវជន​ឱ្យមានទម្លាប់រស់នៅល្អក្នុងសង្គមទៀតផង៕