ស្វាយរៀង៖ ផ្លូវក្រាលកៅស៊ូ ផ្លូវថ្នល់ក្រាលថ្មជាច្រើនខ្សែ នៅក្នុងស្រុកកំពង់រោទិ៍ ខេត្តស្វាយរៀង ដែលជាអំណោយរបស់សម្តេចតេជោ ហ៊ុន សែន ត្រូវបានដាក់ជូនពលរដ្ឋប្រើប្រាស់ ក្រោយ​ពី​មន្ទីរសាធារណការដឹកជញ្ជូន និងមន្ទីរអភិវឌ្ឍន៍ជនបទខេត្ត បានធ្វើការស្ថាបនា និងជួសជុល​កែលម្អរួចរាល់។

ប្រជាពលរដ្ឋក្នុងឃុំញរ ស្រុកកំពង់រោទិ៍ ខេត្តស្វាយរៀង បានសំដែងនូវការសប្បាយរីករាយ និង គោរព​ថ្លែងអំណរគុណចំពោះសម្តេចតេជោ ​ហ៊ុន សែន ដែលតែងតែបានគិតគូរស្ថាបនា​ផ្លូវជា​ច្រើនខ្សែ តភ្ជាប់ពីតំបន់មួយទៅតំបន់មួយទៀត ​ពិសេសតំបន់ជនបទ ​ដើម្បីតភ្ជាប់ជាមួយទីប្រជុំជន និងទីក្រុង ដើម្បីសម្រួលដល់ការធ្វើដំណើរប្រកបរបរ ​លើកស្ទួយកម្រិតជីវភាពល្អប្រសើរ ក្នុងរយៈពេល​ចុងក្រោយនេះ។

របាយការណ៍របស់រដ្ឋាបាលស្រុកកំពង់រោទិ៍ បានឱ្យដឹងថា នៅឆ្នាំ២០២២ ស្រុកកំពង់រោទិ៍ ផ្លូវជា ច្រើនខ្សែ ត្រូវបានស្ថាបនា ជួសជុល សម្រាប់បម្រើផលប្រយោជន៍ប្រជាពលរដ្ឋ ពិសេសបម្រើឱ្យ​ការដឹកជញ្ជូន​ផ្លាស់ប្តូរ​ទំនិញពីតំបន់មួយទៅតំបន់មួយ ​បានទាន់ពេលវេលា​ ពិសេសកាត់បន្ថយសេវា ដឹកជញ្ជូនផងដែរ ។ ផ្លូវទាំងនោះ ត្រូវបានស្ថាបនាដោយមន្ទីរសាធារណការ ​មន្ទីរអភិវឌ្ឍន៍ជនបទ និងការប្រើប្រាស់ថវិកាមូលនិធិ ឃុំ ស្រុក ៕អត្ថបទ៖ ភា សារិត