បាត់ដំបង៖ ប្រធានអង្គភាពរដ្ឋាករទឹកបាត់ដំបង បានត្អូញត្អែរពីការបំពុលទឹកស្ទឹងសង្កែ ដោយ​ក្រុមអ្នកចិញ្ចឹមត្រី ​និងការចោលសំរាម ដែលបានធ្វើឱ្យប៉ះពាល់​ដល់ដំណើរការផលិតទឹកស្អាត​ផ្គត់ផ្គង់​ជូនប្រជាពលរដ្ឋ ក្នុងក្រុងបាត់ដំបង និងផ្នែកខ្លះនៃស្រុកមួយចំនួន ។

អភិបាលខេត្តបាត់ដំបងឯកឧត្តម សុខ លូ បានដឹកនាំមន្រ្តីជំនាញចុះពិនិត្យបញ្ហាអនាម័យបរិស្ថាន ក្នុងស្ទឹងសង្កែ ​ខណៈនៅរដូវប្រាំងឆ្នាំនេះ ​ទឹកស្ទឹងសង្កែ ​នឹងត្រូវតម្កល់ទុកចាប់ពីកម្ពស់១០ម៉ែត្រឡើង​ទៅ ដើម្បីលើកកម្ពស់​សោភ័ណភាព​ទីក្រុងបាត់ដំបង សំដៅទាក់ទាញអ្នកទេសចរគ្រប់ទិសទី ។

លោក អ៊ុត ក្លឹង ប្រធានអង្គភាពរដ្ឋាករទឹកបាត់ដំបង ​បានឱ្យដឹងថា ស្របពេល ដែលចរន្ត​ទឹកស្ទឹងសង្កែ មិនត្រូវបានហូរដោយសារតែការ​ទប់ស្ទាក់ ដើម្បីរក្សាទឹកទុកនៅទំនប់សាលាតាអន និង​ការចិញ្ចឹមត្រី បានបង្កឱ្យមានការបំពុលទឹកគួរឱ្យព្រួយបារម្ភ ហើយអាច​នឹងជះឥទ្ធិពល​មិនល្អ​ដល់គុណភាពទឹកស្ទឹង ក្នុងការ ផលិតទឹកស្អាត ​ដើម្បីផ្គត់ផ្គង់ជូនប្រជាពលរដ្ឋ ។

លោក បានបញ្ជាក់ថា ដោយពិនិត្យឃើញគុណភាពទឹកកំពុងមានការប្រែប្រួលធ្លាក់ចុះ ​ជាពិសេស ទឹកមាន​ក្លិនមិនល្អ ប្រធានអង្គភាពរដ្ឋាករទឹកបាត់ដំបង បានចាត់តាំងក្រុមការងារ​ឱ្យចុះធ្វើការ​ត្រួតពិនិត្យ មើលពីស្ថានភាពបរិស្ថានទឹកស្ទឹងសង្កែ នៅផ្នែកខាងលើស្ថានីយបូមទឹក ដោយរក​ឃើញថា ទឹកស្ទឹងសង្កែ​ នៅផ្នែកខាងលើពេលនេះ កំពុងតែប្រឈមនូវការបំពុល​ទឹកយ៉ាងខ្លាំង តាមរយៈការចិញ្ចឹមត្រីជាលក្ខណៈ គ្រួសារ ​មានចំនួនប្រមាណ៣០បែត្រី ព្រមទាំង​មានការដាក់​សម្រាស់​មួយចំនួន ​នៅខ្សែទឹកខាងលើ​ ចាប់ពី ភូមិចិន ក្នុងសង្កាត់ព្រែកព្រះស្តេច​ ក្រុងបាត់ដំបង ដល់​ភូមិកំពង់អំពិល ក្នុងឃុំអូរដំបង១ ស្រុកសង្កែ ។

ឯកឧត្តម សុខ លូ បានពិនិត្យឃើញថា ​ស្ថានភាពតាមបណ្ដោយដងស្ទឹងសង្កែបច្ចុប្បន្ន ​កំពុងមាន ការ​បំពុលបរិស្ថានយ៉ាងខ្លាំង ​ដែលទាមទារឱ្យមានការដោះស្រាយបន្ទាន់ ព្រោះ​ផ្នែកខាង​ក្រោម​សម្បូរ​សំរាម ​និងផ្នែកខាងលើចិញ្ចឹមត្រីច្រើន ។

ឯកឧត្តម បានជំរុញឱ្យមន្ទីរបរិស្ថាន មន្ទីរកសិកម្ម ​និងអង្គភាពរដ្ឋាករទឹក ធ្វើរបាយការណ៍​ផល​ប៉ះពាល់ដាក់មករដ្ឋបាលខេត្ត ​ដើម្បីបន្តពិនិត្យចាត់វិធានការដោះស្រាយបន្ទាន់ ៕អត្ថបទ៖ នឿត សុភក្ត្រ