ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី បានអនុញ្ញាតឲ្យឯកឧត្តម Pablo Kang ឯកអគ្គរដ្ឋទូតអូស្ត្រាលី ចូលជួបសំដែងការគួរសម និងជម្រាបលា នៅវិមានសន្តិភាព នារសៀលថ្ងៃទី១៩ ធ្នូ​ ខណៈឯកឧត្តម បានបញ្ចប់បេសកកម្មការទូតនៅកម្ពុជា។​

ឯកឧត្តម Pablo Kang បានសម្ដែងនូវសេចក្តីរីករាយ ដែលបានមកបំពេញបេសកកម្ម ការទូតនៅកម្ពុជា។ ឯកឧត្តមបាន មានប្រសាសន៍ថា៖ទោះបីបេសកកម្មរបស់ឯកឧត្តម ក្នុងកំឡុងពេលជំងឺកូវីដ១៩ ក៏ដោយ ឯកឧត្តម បានចូលរួមចំណែកធ្វើការមួយចំនួនដើម្បីពង្រឹងកិច្ចសហប្រតិបត្តិការ និងទំនាក់ទំនងរវាងប្រទេសទាំងពីរ តាម​រយៈការជំរុញការផ្ដល់វ៉ាក់សាំង ឧបករណ៍រក្សាវ៉ាក់សាំង ជួយលើវិស័យដោះមីន ការបង្កើតអាហារូបករណ៍ សម្រាប់​និស្សិត​កម្ពុជា​ទៅបន្ត ការសិក្សានៅអូស្ត្រាលី ជួយលើវិស័យការពារជាតិ ការជំរុញកិច្ចព្រមព្រៀង ពាណិជ្ជកម្ម​សេរី រវាង អាស៊ាន អូស្ត្រាលី ហើយក្នុងឱកាសនោះដែរ ឯកឧត្តម ក៏បានសូមគោរពសម្ដែង​នូវការអបអរសាទរ ជូន​ចំពោះ​សម្ដេច​តេជោ ចំពោះរាជរដ្ឋាភិបាលកម្ពុជា ដែលបានរៀបចំនិងដឹកនាំ កិច្ចប្រជុំកំពូលអាស៊ាននិងកិច្ចប្រជុំកំពូលពាក់ព័ន្ធ បាន​យ៉ាង​ជោគជ័យ។

ជាការឆ្លើយតប សម្ដេចតេជោបានថ្លែងអំណរគុណ ជូនចំពោះរដ្ឋាភិបាលអូស្ត្រាលី ដែលបាន​គាំទ្រ​កម្ពុជា​ក្នុង​ភាព​ជា​ប្រធាន​អាស៊ាន ហើយក៏បានថ្លែងអំណរគុណផងដែរ ចំពោះឯកឧត្តម Pablo Kang ដែ លបានប្រឹង​ប្រែងអស់ពី​ក​ម្លាំ​ង​កាយចិត្ត ជំរុញទំនាក់ទំនងរវាងប្រទេសទាំងពីរ និងកិច្ចសហប្រតិបត្តិការរវាងប្រទេសទាំងពីរ តាមរយៈ​អ្វីដែល​បាន​លើក​ឡើង រួមទាំងលើវិស័យកសិកម្មផងដែរ។

សម្ដេចតេជោក៏បានថ្លែងអំណរគុណជូនចំពោះ រដ្ឋាភិបាលអូស្ត្រាលីដែលបានជួយផ្ដល់ទាំងវ៉ាក់សាំង ទាំងឧបករណ៍ ថែ​រក្សាវ៉ាក់សាំង ដល់កម្ពុជា។ សម្ដេចបានមានប្រសាសន៍បន្ថែមថា ជំនួយនេះសំខាន់ណាស់ក្នុងការទប់ស្កាត់ជំងឺ កូវីដ១៩ ដែលជាឃាតករកំបាំងមុខ មិនឱ្យសម្លាប់ប្រជាជនកម្ពុជា។

សម្តេចបន្ថែមថា សិទ្ធិរស់រានមានជីវិតគឺសំខាន់បំផុតសម្រាប់កម្ពុជា បើគ្មានសិទ្ធិរស់រានមានជីវិតទេ នោះក៏ពុំចាំ​បាច់​និយាយ ពីសិទ្ធិអ្វីផ្សេងទៀតផងដែរ។ ការអនុញ្ញាតឲ្យចូលចតកប៉ាល់វេស្ទើដាម ជាសក្ខីភាពដែលកម្ពុជា បាន​ចាត់​ទុក​សិទ្ធិរស់រានមានជីវិត សំខាន់ជាងអ្វីៗទាំងអស់ ប្រសិនបើកម្ពុជាមិនអនុញ្ញាតឱ្យកប៉ាល់វេស្ទើដាម ចូលចតទេ នោះមិន​ដឹង​ជាវាសនាប្រជាជននៅលើកប៉ាល់នោះ ទៅជាយ៉ាងណា នៅពេលដែលប្រទេស ជា​ច្រើន​មិនឱ្យ​កប៉ាល់​នោះចូលចត។

ជាទីបញ្ចប់ សម្ដេចតេជោបានជូនពរ ឯកឧត្តម Pablo Kang សូមឱ្យទទួលបានជោគជ័យ​ជាបន្តទៀតក្នុង​បេសកកម្ម​របស់​ឯកឧត្តម នាថ្ងៃអនាគត៕អត្ថបទ៖ មុត សុទ្ធ