កំពង់ឆ្នាំង៖ នៅព្រឹកថ្ងៃទី២០ ខែធ្នូ ឆ្នាំ២០២២នេះ មន្ទីរសាធារណការ និងដឹក​ជញ្ជូន​ខេត្ត​កំពង់ឆ្នាំង បានរៀបចំវគ្គបណ្តុះបណ្តាលស្តីពី «សុវត្ថិភាពចរាចរណ៍ផ្លូវគោក» ដល់សមាជិក សមាជិកា ស.ស.យ.ក ខេត្តកំពង់ឆ្នាំងជាង ១០០នាក់ និងមានការចូលរួមពីលោក បូរាណ សត្យា អនុ​ប្រធាននាយកដ្ឋានសុវត្ថិភាពចរាចរណ៍ផ្លូវគោក និង​ជា​សមាជិក​អចិន្តៃ្រយ៍​ផ្នែក​ដឹក​ជញ្ជូន​ ស.ស.យ.ក វិស័យសាធារណការ និងដឹកជញ្ជូន, លោក ខឹម ចាន់នឿន សមាជិកអចិន្ត្រៃយ៍ ស.ស.យ.ក ខេត្តកំពង់ឆ្នាំង ដើម្បីជួយកាត់បន្ថយគ្រោះថ្នាក់ចរាចរណ៍ និងការស្លាប់នៅតាមផ្លូវ។

លោក បូរាណ សត្យា បានថ្លែងថា ដោយសារតែប្រទេសកម្ពុជាយើងក្នុង​ ៥ម៉ោង​មាន​មនុស្ស​ម្នាក់​បាន​ស្លាប់​ដោយគ្រោះថ្នាក់ចរាចរណ៍ និង១ថ្ងៃចាប់ពី ៥ទៅ៦នាក់​គិត​ជាមធ្យម ហេតុ​ដូច​នេះ​អគ្គ​នាយកដ្ឋាន​សុវត្ថិភាព​ចរាចរណ៍ផ្លូវគោក មានគោលបំណងអប់រំផ្សព្វផ្សាយ ស្តីពី សុវត្ថិភាព​ចរាចរណ៍​ផ្លូវ​គោក ដើម្បីលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក ដល់សមាជិក​សមាជិកា ស.ស.យ.ក. និងដើម្បីយកចំណេះដឹងនេះទៅអប់រំ ផ្សព្វផ្សាយ​បន្ត​ដល់​យុវជន​ដទៃ​ទៀត​។ ទិសដៅនៃវគ្គនេះ គឺប្រគល់ភារកិច្ចជូន ស.ស.យ.ក ខេត្តកំពង់ឆ្នាំង ក្នុងការ​ចូលរួមផ្សព្វ​ផ្សាយ​សុវត្ថិភាពចរាចរណ៍ និងតម្កល់ភារកិច្ចមួយជូន ស.ស.យ.ក គ្រប់ថ្នាក់ ក្នុង​ការ​ផ្សព្វផ្សាយ​សុវត្ថិ​ភាពចរាចរណ៍ និងចូលរួមបិទចំណាំងផ្លាតលើគោយន្តកន្ត្រៃនៅតាមមូលដ្ឋាន។ លោកបានថ្លែងអំពាវនាវដល់ ស.ស.យ.ក មកពីតាមវិស័យផ្សេងៗ ដែលមានវត្តមាននៅទីនេះ ពេល​ត្រឡប់ទៅវិញត្រូវជួយផ្សព្វផ្សាយបន្ត ពិសេសពេលចុះតាមមូលដ្ឋាន ពាក់ព័ន្ធ​នឹង​ការងារ​សុវត្ថិភាព​ចរាចរណ៍នេះ។

យុវជន ស.ស.យ.ក ដែលបានចូលរួមក្នុងវគ្គបណ្តុះបណ្តាលនេះ បានអោយដឹងថា ក្រោយពី​បាន​ចូល​រួម​ជាមួយវគ្គបណ្តុះបណ្តាលនេះ ពួកគាត់ជាយុវជន ស.ស.យ.ក ខេត្ត នឹងប្តេជ្ញា​ចូល​រួម​ផ្សព្វ​ផ្សាយ​ក្នុង​កិច្ចការងារសង្គមមួយនេះអោយបានជ្រាបដល់យុវជនគ្រប់ទីកន្លែង ដើម្បីជួយ​កាត់​បន្ថយ​នូវ​អត្រា​គ្រោះថ្នាក់ និងស្លាប់ដោយគ្រោះថ្នាក់ចរាចរណ៍នៅតាមដងផ្លូវ។

ប្រធានបទដែលយកមកអប់រំផ្សព្វផ្សាយរួមមាន ស្ថានភាពទូទៅនៃគ្រោះថ្នាក់ចរាចរណ៍ផ្លូវគោក សុជីវធម៌​ក្នុងការបើកបរ ការប្រើប្រាស់ល្បឿនក្នុងការបើកបរ សិទ្ធិអាទិភាពនៅត្រង់ផ្លូវប្រសព្វ ហានិភ័យ​នៃ​ការបើកបរក្រោមឥទ្ធិពល នៃគ្រឿងស្រវឹង អត្ថប្រយោជន៍នៃមួកសុវត្ថិភាព ការត្រួត​ពិនិត្យ​ទោ​ចក្រយានយន្ត កម្មវិធីយល់ដឹងអំពីទ្រឹស្តី នៃការបើកបរលើទូរស័ព្ទដៃ និងកម្មវិធីថែទាំផ្លូវ ៕ ហុង វាស្នា