ភ្នំពេញ៖ នៅក្នុងអំឡុងពេល​អាកាសធាតុ​កំពុងធ្លាក់ខ្យល់ ​អាកាស​ធាតុចុះត្រជាក់ កត់សំគាល់​ឃើញថា ​បណ្តាពលរដ្ឋនៅក្នុងរាជធានីភ្នំពេញ​ និងក្រុងតាខ្មៅខេត្តកណ្តាល បានបង្កើនការ​ប្រុង​ប្រយ័ត្ន​ការពារខ្លួនជំងឺឆ្លងនានា ​ជាពិសេសជំងឺផ្លូវដង្ហើម ​អាល់លែកហ្ស៊ី ​នឹងអាកាសធាតុត្រជាក់ ជំងឺផ្តាសាយ ​និងកូវីដ១៩ប្រភេទអូមីក្រុង។

សម្រាប់មធ្យោបាយការពារខ្លួនពីជំងឺឆ្លងនានារបស់ពលរដ្ឋនោះ ​គឺមានដូចជា ​ការនាំគ្នាពាក់អាវរងារ រក្សាគន្លាត ពាក់ម៉ាស់ ​ឧស្សាហលាងអាកុលជែល និងការនាំគ្នា​ទៅចាក់វ៉ាក់សាំង​កូវីដ​ដូសជំរុញ​នៅតាមមូលដ្ឋានសុខាភិបាលដែលនៅជិតផ្ទះរបស់ខ្លួនជាដើម។

ពលរដ្ឋថ្លែងថា មូលហេតុដែលគេបង្កើនការប្រុងប្រយ័ត្នការពារខ្លួនកុំឲ្យឆ្លងកើតជំងឺនានា នៅក្នុង​អំឡុងពេលអាកាសធាតុកំពុងធ្លាក់ខ្យល់ត្រជាក់នេះ ​គឺដោយសារ មេរោគកូវីដ នៅមិនទាន់ទៅ​ណាឆ្ងាយ​ពីខ្លួនយើង ​ហើយគេបារម្ភខ្លាំងឆ្លងមេរោគផ្តាសសាយ ​ដែលអាចជាមេរោគកូវីដ១៩។

សូមបញ្ជាក់ថា ​តាមសេចក្តីជូនព័ត៌មានរបស់ក្រសួងសុខាភិបាល ​ស្តីពីការពារឆ្លងមេរោគកូវីដ១៩ និង​ការពារសុខភាពក្នុងអំឡុងពេលអាកាសធាតុចុះត្រជាក់នេះ ​បានឲ្យដឹងថា ជារួមគ្នានៅក្នុងអំឡុង​ពេលអាកាសធាតុចុះត្រជាក់ក្នុងចន្លោះខែធ្នូ ​ដល់ខែមករា ​តាមមូលដ្ឋានសុខាភិបាល មានការ​ជួប​ប្រទះញឹកញាប់ ​ភាគច្រើនគឺជំងឺផ្លូវដង្ហើម ​ដែលបង្កជាគ្រុនផ្តាសាយ ហូរសំបោរ រលាកបំពង់ក ក្អក និងរលាកពោះវៀនជាដើម។

តាមរយៈបញ្ហានេះក្រសួងណែនាំឲ្យពលរដ្ឋចាស់ក្មេង ​និងទារក ​ត្រូវពាក់អាវក្រាស់ៗ រុំខ្លួន ​ពាក់មួក ស្រោមដៃការពារភាពត្រជាក់ ​បង្កើនការអនុវត្តវិធានបីកុំបីការពារ ​ ហើយត្រូវស្វែងរកពេទ្យព្យាបាល​ឲ្យបាន​ត្រឹមត្រូវ ករណីមានរោគសញ្ញាពិបាកដកដង្ហើម​ ហូរសំបោរ គ្រុនក្តៅ ​ឈឺក ឈឺសាច់ដុំ ឬ​សង្ស័យថា អាចជាជំងឺកូវីដ១៩។

ក្រសួងសុខាភិបាល ប្រកាស​ហាមប្រាម​ការប្រើប្រាស់​ ឬលេប​ឱសថប្រភេទអង់ទីប៊ីយូទិច​ ឬថ្នាំផ្សះ ដោយ​គ្មានវេជ្ជបញ្ជាផងដែរ ​នៅពេលពលរដ្ឋមាន​អាការៈមិន​ស្រួលខ្លួន៕ អត្ថបទ ស៊ុម សុខជា