ភ្នំពេញ៖ សម្តេចពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា មាន​ប្រសាសន៍​ថា ជោគជ័យអំឡុងធ្វើជាម្ចាស់ផ្ទះនៃមហាសន្និបាត​អន្តរសភាអាស៊ានអាយប៉ា​ (AIPA-43) ជាកិត្យានុភាពរបស់កម្ពុជា​លើឆាកអន្តរជាតិ។

បើតាមសេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភា បានឲ្យដឹងថា ​ក្នុងពេលដឹកនាំកិច្ច​ប្រជុំគណៈកម្មាធិការអចិន្រ្តៃយ៍រដ្ឋសភា ​នៅថ្ងៃទី២០ ខែធ្នូ ឆ្នាំ២០២២ ស្តីពីរបៀបវារៈបូក​សរុប​លទ្ធផល និងវាយតម្លៃការងាររៀបចំមហាសន្និបាតអន្តរសភាអាស៊ាន ​លើកទី៤៣ (AIPA3) កន្លងទៅ សម្តេចពញាចក្រី ​ហេង សំរិន ប្រធានរដ្ឋសភា មានប្រសាសន៍ថា ជោគជ័យយ៉ាងធំធេង​នៃ​ការដឹកនាំ​មហា​សន្និបាត​នាពេលកន្លងទៅ​ ដែលនាំមកនូវកិត្យានុភាពជូនជាតិមាតុភូមិនៅលើឆាក​អន្តរជាតិ ​ជាពិសេសការពង្រឹងវិស័យការទូតសភាកម្ពុជា​លើឆាកអន្តរជាតិ​ ក្នុងការពង្រឹងពង្រីក កិច្ច​សហប្រតិបត្តិការជាមួយសភានានា ​ទាំងកម្រិតទ្វេភាគី​ និងពហុភាគី ឱ្យកាន់តែទូលំទូលាយ​គ្រប់ជ្រុង​ជ្រោយឡើង។

សម្ដេចប្រធានរដ្ឋសភា និងជាប្រធានមហាសន្និបាតអាយប៉ាលើកទី៤៣ បានថ្លែងអំណរព្រះ​គុណ​យ៉ាង​ជ្រាលជ្រៅបំផុតថ្វាយ​ ព្រះករុណា ​ព្រះបាទសម្ដេចព្រះបរមនាថ ​នរោត្ដម ​សីហមុនី ព្រះមហាក្សត្រ​នៃព្រះរាជាណាចក្រកម្ពុជា ​និងបានថ្លែងអរគុណយ៉ាងជ្រាល​ជ្រៅជូនចំពោះ សម្តេចវិបុល​សេនាភក្តី សាយ ឈុំ ប្រធានព្រឹទ្ធសភា​ សម្តេចអគ្គមហាសេនាបតីតេជោ ​ហ៊ុន សែន នាយករដ្ឋមន្ត្រីរួមទាំង​ថ្នាក់ដឹកនាំរដ្ឋសភា​ អគ្គលេខាធិការរដ្ឋសភា មន្ត្រីរាជការ ព្រមទាំងអ្នកព័ន្ធទាំង​អស់​ដែលបានខិតខំបំពេញការងារ ​លះបង់កម្លាំងកាយចិត្ត បំពេញតួនាទីបម្រើដល់មហាសន្និបាត​ឱ្យទទួល​បានជោគជ័យយ៉ាង​ត្រចេះត្រចង់។

សេចក្តីប្រកាសព័ត៌មាន នេះបន្តថា ​ជោគជ័យនេះ​ពិតជាបានរួមវិភាគទានបន្ថែម​ទៅលើការ​ប្រជុំកំពូល​អាស៊ាន លើកទី៤០ ​និងទី៤១​ និងកិច្ចប្រជុំកំពូលពាក់ព័ន្ធ ក្នុងការលើកកម្ពស់កិត្យានុភាព​កម្ពុជាក្នុងតំបន់ ​និងសកលលោក ​ក៏ដូចជាបានជួយក្នុងកម្រិតណាមួយដល់ការប្រឹងប្រែង​ការទូត​របស់កម្ពុជា។

គួរបញ្ជាក់ថា មហាសន្និបាតអាយប៉ាលើកទី៤៣ ដែលសភាកម្ពុជាធ្វើជាម្ចាស់ផ្ទះបានធ្វើឡើង​ពីថ្ងៃទី២០ ​ដល់ថ្ងៃទី២៥ ខែវិច្ឆិកា ឆ្នាំ២០២២ ក្រោមមូលបទ “បោះជំហានជាមួយគ្ន ​ដើម្បីចីរភាព បរិយាប័ន្ន ​និងភាពធន់" ដែលជាមូលបទឆ្លើយតប​ សភាពការណ៍ជាក់ស្តែងនៅក្នុងតំបន់ និងសកលលោក​ ក្រោយការរាតត្បាតពីជំងឺកូវីដ-១៩៕អត្ថបទ៖ ឧត្តម