កោះកុង៖ កម្លាំងនគរបាលជំនាញនៃអធិការដ្ឋាននគរបាលស្រុកមណ្ឌលសីមា បានចុះពិនិត្យ និង​ធ្វើអត្តសញ្ញាណប័ណ្ណថ្មីជូនដល់ប្រជាពលរដ្ឋប្រុសស្រីសរុបជិត ៥៦០នាក់ អំឡុងយុទ្ធនាការ​រយៈពេល១ខែមកនេះ។

គិតចាប់ពីថ្ងៃទី១៤ ខែវិច្ឆិកា ដល់ថ្ងៃទី១៤ ខែធ្នូ ឆ្នាំ២០២២កន្លងទៅ កម្លាំងនគរបាលការិយាល័យ​អត្តសញ្ញាណកម្មស្រុកមណ្ឌលសីមា បានចុះតាមខ្នងផ្ទះដែលជាគោលដៅធ្វើ​អត្តសញ្ញាណ​ប័ណ្ណថ្មី​ជូនដល់​ប្រជាពលរដ្ឋតបតាមការណែនាំរបស់ក្រសួងមហាផ្ទៃ ​និង​ស្នងការដ្ឋានខេត្តកោះកុង។

លោក លឹម សែងច័ន្ទ ​អធិការស្រុកមណ្ឌលសីមា ​បានឱ្យដឹងនៅរសៀលថ្ងៃទី២០ ខែធ្នូនេះថា លោកបានដាក់ផែនការដល់កម្លាំងនគរបាលជំនាញចុះធ្វើអត្តសញ្ញាណប័ណ្ណ​ទៅ​តាម​កាលវិភាគ​ដែល​ដាក់​ចេញ​អនុវត្តក្នុងមូលដ្ឋានឃុំទាំង៣ ​គឺឃុំប៉ាក់ខ្លង​ ឃុំពាមក្រសោប ​និងឃុំទួលគគីរ។

លោកអធិការ បានឱ្យដឹងទៀតថា សមត្ថកិច្ចជំនាញបានចុះធ្វើ និងផ្តល់អត្តសញ្ញាណប័ណ្ណ​ជូន​ប្រជាពលរដ្ឋ ៥៥៨នាក់ ក្នុងនោះប្រុស ៣២០នាក់ ដោយមានការផ្តល់ថ្មីចំនួន២២៦ ​នាក់/ប្រុស ១៣២ ​នាក់ និង​ចុះទុតិយតា​ចំនួន ៣៣២ នាក់/ប្រុស ១៨៨ នាក់។

ក្រៅពីបញ្ចប់ផែនការធ្វើអត្តសញ្ញាណប័ណ្ណថ្មីជូនប្រជាពលរដ្ឋ កម្លាំងអធិការនគរបាល​ស្រុកមណ្ឌលសីមា បាននឹងកំពុង​សម្របសម្រួល​ការងារពាក់ព័ន្ធ​ជា​មួយស្នងការដ្ឋានខេត្ត និង​នាយកដ្ឋាន​អត្តសញ្ញាណកម្ម ​ដើម្បីផ្តល់​អត្តសញ្ញាណប័ណ្ណ​ដល់កម្មករ កម្មការិនីរោងចក្រ​នៅ​តំបន់សេដ្ឋកិច្ចពិសេសខេត្ត ខណៈពួកគេមកពីបណ្តារាជធានីខេត្តផ្សេងៗ​មិនមាន​ពេលវេលា​គ្រប់គ្រាន់​វិល​ត្រឡប់​ទៅស្រុកកំណើតធ្វើអត្តសញ្ញាណប័ណ្ណថ្មី។

យុទ្ធនាការចុះធ្វើអត្តសញ្ញាណប័ណ្ណថ្មីដល់​ពលរដ្ឋគ្រប់អាយុ ពលរដ្ឋបាត់ ហួសសុពលភាព ឬខូចអត្តសញ្ញាណ​ប័ណ្ណនេះ​ ធ្វើឡើងក្នុងគោលដៅធានា​ដល់​ការ​អនុវត្តសិទ្ធិ និងផលប្រយោជន៍​នានា​ជូនប្រជាពលរដ្ឋ ពិសេសការ​ប្រើប្រាស់​អត្តសញ្ញាណប័ណ្ណ​សញ្ជាតិខ្មែរ​សម្រាប់កាន់​ទៅ​បោះឆ្នោតជ្រើសតាំង​តំណាងរាស្ត្រ ​នីតិកាលទី៧ ឆ្នាំ២០២៣ខាងមុខនេះ៕អត្ថបទ៖ ឈឹម មករា