កំពង់ឆ្នាំង៖ នៅព្រឹកថ្ងៃទី២១ ខែធ្នូ ឆ្នាំ២០២២នេះ អាជ្ញាធរស្រុករលាប្អៀរ និង​កម្លាំង​នគរបាល​សណ្តាប់​ធ្នាប់​ខេត្តកំពង់ឆ្នាំង បានចុះពន្យល់ណែនាំអាជីវករ និងរៀបចំសណ្តាប់ធ្នាប់តាមផ្លូវជុំវិញផ្សារព្រៃខ្មែរ ក្រោយ​ពីអាជីវករទាំងនោះ បានយកផ្លូវសាធារណៈ មកធ្វើជាកន្លែងលក់ដូរយ៉ាងអនាធិបតេយ្យ។

លោក ស៊ីវ សារិន អភិបាលរងស្រុករលាប្អៀរ បានបញ្ជាក់ថា ក្រុមការងារអាជ្ញាធរស្រុករលាប្អៀរ និង​កម្លាំង​នគរបាលសណ្តាប់ធ្នាប់ខេត្តកំពង់ឆ្នាំង បានចុះនៅក្នុងពេលនេះ គឺចង់អោយបងប្អូនអាជីវករទាំងអស់ ស្ម័គ្រ​ចិត្ត​ចូល​រួមដោយខ្លួនឯង ក្នុងការរៀបចំសណ្តាប់ធ្នាប់ របៀបរៀប​រយ​នៅ​តាម​ផ្លូវ​ជុំវិញ​ផ្សារ​ព្រៃខ្មែរ​នេះ​តែ​ម្តង។ អាជីវករបានយកផ្លូវសាធារណៈ ដែលជាផ្លូវរបស់រដ្ឋលក់តាមចិត្ត ហើយ​អ្នក​មាន​តូប​លក់​ដូរ​នៅក្នុង​ផ្សារ​មិន​ព្រមលក់នៅក្នុងផ្សារ គឺនាំគ្នាចេញមកលក់នៅក្រៅផ្សារអស់ដែរ ដែលមើលទៅ​អនាធិបតេយ្យ​ណាស់។ កន្លងមកអាជ្ញាធរឃុំអញ្ចាញរូង ស្រុករលាប្អៀរ បានចេញថវិការឃុំ​របស់​ខ្លួន​សាង​សង់​ផ្លូវ​បេតុងជុំវិញផ្សារ ដោយទុកផ្លូវទទឹង៥ម៉ែត្រ តែដោយសារអាជីវករប្រមាណ៥០% បាននាំគ្នាចេញ​ពី​ផ្សារ​មក​លក់ដូរលើផ្លូវបេតុងនេះអស់ ធ្វើអោយស្ទះផ្លូវតែម្តង។ នៅពេលមានគ្រោះអគ្គីភ័យកើតឡើង គឺឡាន​ទឹកមិនអាចចេញចូលទៅពន្លត់បានឡើយ។

ក្នុងពេលចុះជួបអាជីវករទាំងនោះ លោក ស៊ីវ សារិន បានណែនាំ ពន្យល់ពួក​គាត់​អោយ​យល់​ពី​ហានិភ័យ​នៃ​ការកកស្ទះផ្លូវជុំវិញផ្សារព្រៃខ្មែរនេះ និងអោយ​ពួក​គាត់​ដក​គម្លាត​ពី​ចំណុច​លក់​ទៅ​តាម​ទីតាំង​ដែល​អាជ្ញាធរ​ស្រុក​រលាប្អៀរ និងកម្លាំងនគរបាលសណ្តាប់ធ្នាប់បានបាញ់ថ្នាំចំណាំ ដោយមិនអោយ​លក់​លើ​ផ្លូវ​ត​ទៅ​ទៀត​ឡើយ។ បើមិនគោរពតាមនោះទេ នៅ១សប្តាហ៍ទៀត កម្លាំងចម្រុះចុះកាត់សំយ៉ាប និងចាត់​ការ​តាម​ផ្លូវ​ច្បាប់​តែម្តង។

ការរៀបចំសណ្តាប់ធ្នាប់ផ្សារព្រៃខ្មែរ របស់កម្លាំងអាជ្ញាធរស្រុក និងកម្លាំងសណ្តាប់ធ្នាប់ គឺដូចវែកចក ព្រោះនៅពេលកម្លាំងចម្រុះចុះពេលណា អាជីវករទាំងនោះស្តាប់តែមួយភ្លែត ហើយ​លក់​យ៉ាង​អនាធិបតេយ្យ​ដដែល ។ បញ្ហានេះ អាជីវករដែលលក់ដូរនៅក្នុងផ្សារ សំណូមពរដល់ក្រុមចម្រុះ ជួយ​ចាត់​វិធាន​ការ​ក្តៅផង កុំអោយមានការលក់ដូរយកផ្លូវជាតូបអោយសោះ ៕ អត្ថបទ៖ ហុង វាស្នា