ភ្នំពេញ៖ ប្រជាពលរដ្ឋក្រីក្រ ចំនួន៤លាននាក់ ទទួលបានថវិកាពីរាជរដ្ឋាភិបាល ក្រោមកម្មវិធី​ឧបត្ថម្ថ​សាច់ប្រាក់​ដល់គ្រួសារក្រីក្រងាយរងគ្រោះក្នុងវិបត្តិកូវីដ១៩ ​និង​កម្មវិធី​ឧបត្ថម្ភ​សាច់ប្រាក់​សម្រាប់​គ្រួសារ​រង​ហានិភ័យ​ដោយ​អតិផរណា។

គ្រួសារក្រីក្រប្រមាណ ៧០ម៉ឺនគ្រួសារ​ រឺស្មើនឹងពលរដ្ឋប្រមាណ ​៣លាននាក់ ទទួលបានថវិកា​ពី​កម្មវិធីឧបត្ថម្ភសាច់ប្រាក់ដល់គ្រួសារក្រីក្រ​ រងគ្រោះក្នុងវិបត្តិកូវីដ១៩ ​ចាប់តាំងពីកម្មវិធីនេះ ​ពីខែ មិថុនា ឆ្នាំ ២០២០ ។ខណៈពលរដ្ឋក្បែរភាពក្រីក្រប្រមាណ ៣០ម៉ឺនគ្រួសារបន្ថែមទៀត ក៏បានទទួលថវិកាពីកម្មវិធីឧបត្ថម្ភសាច់ប្រាក់សម្រាប់គ្រួសាររងហានិភ័យដោយអតិផរណា។

នេះបើតាមការលើកឡើងរបស់ឯកឧត្តម សំហេង បុរស ប្រធានក្រុមប្រឹក្សាភិបាលមូល​និធិជាតិ​ជំនួយសង្គមក្នុងការដោះស្រាយជួយសម្រួលដល់ជីវភាពរបស់​ប្រជាពលរដ្ឋ​មានភាពក្រីក្រនេះ ឯកឧត្តម សំហេង បុរស ប្រធានក្រុមប្រឹក្សាភិបាលមូលនិធិជាតិជំនួយសង្គម​ ក្នុងមួយគ្រួសារ អាច​ទទួលបានក្នុងរង្វង់ ១ ២០០ ដុល្លារ ​ចាប់តាំងពីការអនុវត្តកម្មវិធីឧបត្ថម្ថ​សាច់ប្រាក់ដល់គ្រួសារក្រីក្រ​ងាយរងគ្រោះក្នុងវិបត្តិកូវីដ១៩ នេះមក។

ឯកឧត្តមបន្តថា ថ្មីៗនេះ រាជរដ្ឋាភិបាលកម្ពុជា ​បានសម្រេចឱ្យអនុវត្ត​ឧបត្ថម្ភ​សាច់ប្រាក់​ថ្មីមួយទៀត ជួយ​ដល់ពលរដ្ឋក្បែរភាពក្រីក្រដែលរងសម្ពាធពីបញ្ហាអតិផរណា។ កម្មវិធីឧបត្ថម្ភសាច់ប្រាក់ថ្មីនេះ គឺមានគ្រួសារទទួលផលប្រមាណ ៣០ម៉ឺនគ្រួសារ រឺស្មើនឹងប្រមាណ ១លាន់នាក់បន្ថែមទៀត។

ជាគោលដៅទៅមុខ ក្នុងការជួយឱ្យពលរដ្ឋងើបផុតពីភាពក្រីក្រ រឺទប់ស្កាត់មិនឱ្យធ្លាក់​ទៅក្នុង​ភាពក្រីក្រ ​ឯកឧត្តម សំហេង បុរស លើកឡើងពីគោលការណ៍មិនផ្ដល់​ជាសាច់ប្រាក់ទៅពលរដ្ឋ​ជា​ប្រចាំទៀតនោះទេ។ ផ្ទុយទៅវិញ ​គឺនឹងផ្ដល់ជាជំនាញ ​មុខរបរដើម្បីឱ្យពលរដ្ឋអាចទ្រទ្រង់ជីវភាព​របស់ខ្លួនឯងបាន។​ ខណៈនេះក្រុមការងារក្រសួងសង្គមកិច្ច ​ដោយមានការចូលរួម​ពី​ដៃគូ​អភិវឌ្ឍន៍ បាន​នឹងកំពុងអនុវត្តសាកល្បង ​ការផ្ដល់ជាជំនាញមុខរបរ និង​ថវិកា​ដើមទុនដល់​គ្រួសារក្នុង​ខេត្ត​គោលដៅ​ចំនួនពីរផងដែរ។

រាជរដ្ឋាភិបាលកម្ពុជា តាមរយៈក្រុមប្រឹក្សាជាតិគាំពារសង្គម បាននឹងកំពុងរៀបចំសេចក្ដីព្រាង​អនុក្រឹត្យ​ស្ដីពីកញ្ចប់គ្រួសារ ​និងកំពុងសិក្សារៀបចំគម្រោងបញ្ចប់ភាពក្រីក្រ ​ដោយ​បង្វែរការ​ផ្ដល់​សាច់ប្រាក់ជាជំនួយសង្រ្គោះទៅជាកម្មវិធីសាច់ប្រាក់សម្រាប់អភិវឌ្ឍគ្រួសារ តាមរយៈការអភិវឌ្ឍ​បង្កើតមុខរបរបង្កើនប្រាក់ចំណូលវិញ៕ អត្ថបទ៖ គឹមហុក