កំពង់ឆ្នាំង៖ នៅព្រឹកថ្ងៃទី២១ ខែធ្នូ ឆ្នាំ២០២២ សមត្ថកិច្ច​ចម្រុះ​រួម​មាន​៖ មន្ត្រី​នគរបាល​ប្រឆាំង​បទ​ល្មើសសេដ្ឋកិច្ច នៃស្នងការដ្ឋាននគរបាលខេត្ត និងមន្ត្រីជលផល បាន​ចេញ​ស្រាវជ្រាវ​បង្ក្រាប​បទ​ល្មើស​នេសាទ​តាមគោលដៅដែលបានគ្រោងទុក។

សមត្ថកិច្ច បានឲ្យដឹងថា នៅវេលាម៉ោង ៩ និង ៤៥ នាទីព្រឹកថ្ងៃទី២១ ខែធ្នូនេះ​នៅចំណុច​ទន្លេ​ក្នុង​ភូមិ​ដូនវៀត ឃុំពាមឆ្កោក ស្រុកជលគិរី សមត្ថកិច្ចចម្រុះបានប្រទះ ឃើញ​កាណូត​អូស​នាម​សម័យ​ត​កន្ទុយ​ខុស​​ច្បាប់​​ចំនួន ៣គ្រឿងមានមនុស្សចំនួន ១៣ នាក់កំពុងអូសនាមសម័យ ខណៈ​នោះ​សមត្ថកិច្ច​ចម្រុះ​បាន​ចាប់​ឃាត់​អូស​យក​មករក្សាទុកនៅសង្កាត់នេសាទកំពង់ឆ្នាំង ក្រុងកំពង់ឆ្នាំង ដើម្បីសុំគោលការណ៍​ថ្នាក់​លើ​ចំណាត់ការតាមផ្លូវច្បាប់។

លោក តាតសីហៈ មន្ត្រី​ជលផល​សង្កាត់​កំពង់​ឆ្នាំង​ បាន​បញ្ជាក់​​ថា​ កាណូត​អូស​នាម​សម័យ​ខាង​លើ​នេះ ​ ២គ្រឿងមានទីលំនៅស្រុកពញាឮ ខេត្តកណ្ដាល ដោយ​ពួក​គេ​បាន​ប្រាប់​ក្រុម​សមត្ថកិច្ច​ចម្រុះ​ថា​ពួក​គេ​មាន​គ្នាសរុបចំនួន ៧គ្រឿងដោយឡែកថ្ងៃនេះមកនេសាទតែ៣ គ្រឿងនេះទេ ដែល​មាន​មេ​ការ​ឈ្មោះ​ដេប​ជា​អ្នករត់ការ ។ ដោយឡែកកាណូត ១ គ្រឿងទៀតមានរបស់ខ្មែរឥស្លាមទីលំនៅស្រុកកំពង់ត្រឡាច ខេត្តកំពង់ឆ្នាំង តាមដឹងពួកគេមានទូកចំនួន ៤គ្រឿង តែចេញមកនេសាទថ្ងៃនេះតែមួយគ្រឿងប៉ុណ្ណោះ។

កាណូតអូសនាមសម័យទាំង ៣ គ្រឿង និងអ្នកនេសាទចំនួន១៣ នាក់​ខាង​លើ​នេះ​ត្រូវ​បាន​សមត្ថកិច្ច​ជល​ផល​អូស​យក​មករក្សាទុកនៅសង្កាត់នេសាទកំពង់ឆ្នាំង ដើម្បីកសាងសំណុំរឿងឆ្លងយោបល់ថ្នាក់លើ​ចាត់​ការ​តាមនីតិវិធីច្បាប់៕ អត្ថបទ៖ ហុង វាសនា