​បាល់ទាត់៖ ​ខ្សែប្រយុទ្ធ Brentford, Ivan Toney បាន​ទទួលរង​ការពិន័យ​ដោយ​សមាគម​បាល់ទាត់​អង់គ្លេស FA ក្រោយ​រកឃើញ​ពាក់ព័ន្ធ​រឿង​ភ្នាល់ ៣០ករណី​បន្ថែមទៀត​។ ​​កីឡាករ​វ័យ ២៦ឆ្នាំ​រូបនេះ​ទើបតែ​ត្រូវ​ពិន័យ​ដោយ FA កាលពី​ខែ​មុន​ពាក់ព័ន្ធ​នឹង​រឿង​ភ្នាល់​នេះ​ដែល​មាន​ដល់​ទៅ ២៣២ករណី​។

​Ivan Toney បាន​ស៊ុត​បញ្ចូល​ទី ១០គ្រាប់​រដូវ​កាល​នេះ តែ​មិន​ជាប់​ឈ្មោះ​ទៅ World Cup ជាមួយ​ក្រុម​ជម្រើសជាតិ​អង់គ្លេស​ឡើយ​។​ ​Ivan Toney មាន​ពេល​ដល់​ថ្ងៃទី៤ ខែមករា​ដើម្បី​ឆ្លើយតប​ជាមួយ FA វិញ​ចំពោះ​ការបំពានច្បាប់​របស់ FA នៅ​ចំនុច E8 ដែល​បាន​ហាម​ឃាត់​មិនឱ្យ​កីឡាករ​អាជីព​ មិនឱ្យ​ពាក់ព័ន្ធ​នឹង​ការ​ភ្នាល់​ល្បែងស៊ីសង រឺ​ផ្តល់ព័ត៌មាន​សំងាត់​របស់​ក្រុម​ទៅខាង​ក្រៅ​ក្នុង​គោលបំណង​នៃ​ការ​ភ្នាល់​។​ ​Ivan Toney ប្រឈម​នឹង​ការដាក់ពិន័យ​ច្រើន​សប្តាហ៍​មិនឱ្យ​ពាក់ព័ន្ធ​បាល់ទាត់ និង​ពិន័យ​ជា​ទឹកប្រាក់​បន្ថែមទៀត​ ប្រសិនបើ​រកឃើញថា​ពិតមែន​។

​​រំលឹកថា​ ខ្សែការពារ​អង់គ្លេស Kieran Trippier ធ្លាក់​រង​ពិន័យ ១០សប្តាហ៍​ដោយ FA កាលពី​ខែធ្នូ ​ឆ្នាំ២០២០ ដែល​បាន​ផ្តល់ព័ត៌មាន​ទៅខាង​ក្រៅ​ដើម្បី​ធ្វើការ​ភ្នាល់​ពី​ការផ្ទេរ​របស់ខ្លួន​ពី Tottenham Hotspur ទៅកាន់ Ateltico Madrid​។ កាលពី​ឆ្នាំ២០១៧ អ្នកចាត់ការ និង​ជា​អតីត​កីឡាករ​ជម្រើសជាតិ​អង់គ្លេស Joey Barton ត្រូវបាន FA ពិន័យ ៥ខែបន្ទាប់​ពី​ត្រូវបាន​គេ​រកឃើញថា​បាន​ភ្នាល់​បាល់ ១២៦០លើក​ក្នុង​រយៈពេល ១០ឆ្នាំ​ចុងក្រោយ​៕

​អត្ថបទ​៖​នាង សុភា​វុ​ធ