​វាយ​កូន​បាល់៖ ​ពានរង្វាន់​នៃ​ការប្រកួត​វាយ​កូន​បាល់​ថ្មី​សន្លាង​មួយ United Cup ត្រូវ​បានដាក់​បង្ហាញ​នៅ​ទីក្រុង Perth ប្រទេស​អូស្ត្រាលី​នៅ​ថ្ងៃ​អង្គារ​ មុន​ការចាប់ផ្តើម​ការប្រកួត​ថ្មី​មួយ​នៅក្នុង​កាលវិភាគ​ របស់​ការប្រកួត​វាយ​កូន​បាល់​អន្តរជាតិ​ប្រចាំឆ្នាំ​។

​​United Cup នឹង​នឹង​ប្រមូលផ្តុំ​ជាការ​ប្រកួត​ក្រុម​តំណាងឱ្យ​ប្រទេស ​ដែលមាន​ទាំង​កីឡាករ និង​កីឡា​ការិនី​រួមបញ្ចូល​គ្នា​ជា​លើកដំបូង​។ ​កន្លងមក​ការប្រកួត​តំណាង​ប្រទេស ​ត្រូវបាន​បែងចែក​ដាច់​ដោយ​ឡែក​ពីគ្នា​រវាង​កីឡាករ និង​កីឡាការិនី​ដោយ​កីឡាករ​ត្រូវ​លេង​ពាន Davis Cup ឯ​កីឡាការិនី​ត្រូវ​លេង​ពាន Fed Cup ពីមុន និង​បច្ចុប្បន្ន​ហៅថា​ពាន Billie Jean King Cup​។

​​សម្រាប់ United Cup នឹងមាន​កីឡាករ-កីឡាការិនី​លំដាប់​កំពូល​ប្រកួត​តំណាង​ប្រទេស ​ដែល​ចូលរួម​សរុប ១៨​ប្រទេស​ដែល​មាន​កញ្ចប់​ទឹកប្រាក់​ដល់​ទៅ ១៥​លាន​ដុល្លារ​អាមេរិក​។ ​Rafael Nadal, Alexander Zverev, Casper Ruud, Iga Swiatek, Caroline Garcia និង Madison Keys សុទ្ធតែ​មានឈ្មោះ​ក្នុងការ​ប្រកួត​នេះ​។ ​United Cup នឹង​ចាប់ផ្តើម​ពីថ្ងៃ​ទី​២៩ ខែធ្នូ​ចុងឆ្នាំ​បញ្ចប់​នៅ​ថ្ងៃទី​៨ ខែមករា​ដើមឆ្នាំ​២០២៣ នៅ​ទីក្រុង Brisbane Perth និង Sydney ខណៈ​ព្រឹត្តិការណ៍ Grand Slam, Australian Open នឹង​ចាប់ផ្តើម​នៅ​ចុងខែ​មករា​៕

​អត្ថបទ​៖​នាង សុភា​វុ​ធ