ភ្នំពេញ៖ ឯកឧត្តម ថោង ខុន រដ្ឋមន្ត្រីក្រសួងទេសចរណ៍និងក្នុងនាមជាប្រធាន​គណៈកម្មការ​អន្តរក្រសួង​ដើម្បី​សម្របសម្រួលការធ្វើដំណើរ ​ដឹក​ជញ្ជូនភ្ញៀវទេសចរ និងអ្នកដំណើរនៅតំបន់​ច្រកទ្វារព្រំដែនអន្តរជាតិទូទាំងប្រទេសហៅថា គ.អ.ច.ទ បានថ្លែងថា កម្ពុជាពុំមានគោលការណ៍​តម្រូវឲ្យភ្ញៀវទេសចរអន្តរជាតិណាត្រូវប្រកាសចំនួន​ទឹកប្រាក់មុន មុនពេលធ្វើដំណើរការ​ចូល​មកទស្សនាកម្ពុជា។

ការថ្លែងបដិសេធរបស់ឯកឧត្តម រដ្ឋមន្ត្រីថោង ខុន បានឡើងក្រោយពី​សមាគមន៍​ទីភ្នាក់ងារ​ទេសចរណ៍​កម្ពុជា CATAដែលមានបណ្តាញក្រុមហ៊ុនទេសចរណ៍ជិត៣០០ក្រុមហ៊ុន បាន​រាយការណ៍ថា មានភ្ញៀវទេសចរឥណ្ឌា​ក្រុមតូចមកពីដាណាំង​ និង​ហាណូយប្រទេសវៀតណាម ត្រូវធ្វើ​ដំណើរតាមជើងយន្តហោះកម្ពុជាអង្គរអ៊ែរ K6 ​ចូលមកកម្ពុជា នៅថ្ងៃទី១៥ ខែធ្នូឆ្នាំ២០២២ ត្រូវបានមន្ត្រីអន្តោប្រវេសន៍របស់​ប្រទេស​វៀតណាម​ ស្នើឲ្យបង្ហាញសាច់ប្រាក់ម្នាក់ៗ២០០០​ដុល្លា​អាមេរិច​ ហើយបញ្ហានេះ ឯកឧត្តម រដ្ឋមន្ត្រី ​បានស្នើឲ្យភាគីដោះស្រាយជា​បន្ទាន់​ ដើម្បីកុំ​ឲ្យ​ភ្ញៀវបរទេស​មានការ​ភ័ន្តច្រឡំ ​និង​អាក់អន់ចិត្ត។

ថ្លែងបញ្ជាក់ប្រាប់BTVនៅក្រោយកិច្ចប្រជុំកិច្ចប្រជុំវឌ្ឍនភាពការងារសម្របសម្រួលការធ្វើដំណើរ ការ​ដឹកជញ្ជូនភ្ញៀវទេសចរ និងអ្នកដំណើរនៅតំបន់ច្រកទា្វរព្រំដែនអន្តរជាតិទូទាំងប្រទេស ល្ងាច​ថ្ងៃទី២០ ខែធ្នូនេះថា ​ឯកឧត្តម ហោ សារុន រដ្ឋលេខាធិការក្រសួងទេសចរណ៍ និងជាអនុប្រធាន​គណៈកម្មការ គ.អ.ច.ទ បានថ្លែងថា ​សម្រាប់លក្ខខណ្ឌអ្នកដំណើរការបរទេសចូលមក​ក្នុង​ទឹកដីកម្ពុជា គឺជាការងារតែមួយគត់របស់មន្ត្រីអន្តោប្រវេសន៍កម្ពុជា ហើយមិនតម្រូវ​ឲ្យ​មន្ត្រីអន្តោប្រវេសន៍​បរទេសណា ​និងភាគីពាក់ព័ន្ធណា ​មកនិយាយពីលក្ខខណ្ឌនេះឡើយ។

សម្រាប់ភ្ញៀវទេសចរអន្តជាតិ ​បានថ្លែងដែរថា ​ការធ្វើដំណើរទស្សនាកម្ពុជា គឺមានភាពងាយស្រួល​ខ្លាំងណាស់ ​ហើយមិនតម្រូវឲ្យភ្ញៀវបរទេសគ្រប់ជាតិសាសន៍​ណា​ប្រកាស​ទឹកប្រាក់មុន មុនពេល​ធ្វើដំណើរកម្ពុជានោះទេ។

សូមបញ្ជាក់ថា នៅក្រោយបរិបទក្រោយកូវីដ១៩ ​ក្នុងធូរសា្រលនេះ គ្រប់ភ្ញៀវអន្តរជាតិទាំងអស់​ធ្វើ​ដំណើរចូលមកក្នុងទឹកដីកម្ពុជា ​បច្ចុប្បន្នគឺបានកាត់បន្ថយការប្រើបណ្ណចាក់វ៉ាក់សាំង ការ​ធ្វើតេស្តរហ័សពេលមកដល់កម្ពុជា​ ពោលគឺអ្នកដំណើរអន្តរជាតិទាំងអស់គ្រាន់តែ បំពេញ​សាលាកបត្រ​ចូលកម្ពុជា និងលិខិតបញ្ជាក់របស់គយ​ និងរដ្ឋាករតែប៉ុណ្ណោះ៕ អត្ថបទ ស៊ុម សុខជា