ភ្នំពេញ៖ មន្ត្រីជាន់ខ្ពស់ក្រសួងផែនការ បានលើកឡើងថា ការខិតខំប្រឹងប្រែងរបស់រាជរដ្ឋាភិបាល ក្នុងការគ្រប់គ្រងការរីករាលដាលជំងឺកូវីដ-១៩ ការដាក់ចេញនូវវិធានការនានា និងយុទ្ធសាស្ត្រ​អភិវឌ្ឍន៍​សេដ្ឋកិច្ច បានធ្វើឲ្យសេដ្ឋកិច្ចកម្ពុជា​ កំពុងកើនឡើងជាបណ្ដើរៗ ​និងជាបន្តបន្ទាប់ ។

ឯកឧត្តម ទួន ថាវរៈ រដ្ឋលេខាធិការក្រសួងផែន ​ក្នុងសិក្ខាសាលាផ្សព្វផ្សាយរបាយការណ៍ពាក់ កណ្ដាល​អាណត្តិ ឆ្នាំ២០២១ ​នៃការអនុវត្តផែនការយុទ្ធសាស្ត្រអភិវឌ្ឍន៍ជាតិ​ (២០១៩-២០២៣) ដែលបាន​ធ្វើឡើង​ នៅព្រឹកថ្ងៃទី២១ ខែធ្នូនេះ ​បានមានប្រសាសន៍ថា​ កម្ពុជា បានជួបប្រទះនូវ​កំណើន​សេដ្ឋកិច្ច ​អវិជ្ជមាន​លើកដំបូង ​ក្នុងរយៈពេលមួយទសវត្សរ៍ចុងក្រោយ ក្នុងកម្រិត-៣,១ភាគរយ ​ក្នុងឆ្នាំ២០២០ ​ដោយ​សារបញ្ហាការឆ្លងរីករាលដាលនៃជំងឺកូវីដ-១៩ និងកើនឡើង​បន្តិចវិញ ​នៅឆ្នាំ២០២១ ត្រឹម២,៤ភាគរយ ។

ឯកឧត្តម ​បានបន្តថា តាមរយៈកិច្ចខិតខំប្រឹងប្រែង និងរួមទាំងការដាក់ចេញ​ និងអនុវត្តយុទ្ធ សាស្ត្រស្ដារសេដ្ឋកិច្ចក្រោយជំងឺកូវីដ-១៩ ​ធនាគារអភិវឌ្ឍន៍អាស៊ី ​បានព្យាករថា ​សេដ្ឋកិច្ចកម្ពុជា អាចនឹងកើនឡើងដល់៥,៥ភាគរយ ​នៅឆ្នាំ២០២២។

ការគ្រប់គ្រង​បាននូវការរីករាលដាលជំងឺកូវីដ-១៩ រួមទាំង​ ការដាក់ចេញនូវវិធានការនានា បាន​ធ្វើឲ្យសេដ្ឋកិច្ចកម្ពុជា ​កំពុងកើនឡើងជាបណ្ដើរៗ ​និងជាបន្តបន្ទាប់ ។

ឯកឧត្តម ​បានបន្ថែមថា តែទោះជាយ៉ាងណា ការងារចំពោះមុខរបស់កម្ពុជា ​គឺផ្ដោតការយកចិត្ត ទុកដាក់​លើការអនុវត្តនូវវិធានការគោលនយោបាយ ​ដែលត្រូវបានកែសម្រួល ​ឬបន្តអនុវត្ត និង​វិធានការគោលនយោបាយថ្មីៗ ​ដែលត្រូវបានលើកឡើង ​ដើម្បីដោះស្រាយបញ្ហាប្រឈមនានា ពីឆ្នាំ២០២១ ដល់ឆ្នាំ២០២៣ ។

ឯកឧត្តម ទួន ថាវរៈ ​បានបញ្ជាក់ថា​ នៅពេល​បញ្ចប់​អាណត្តិផែនការ​យុទ្ធសាស្ត្រអភិវឌ្ឍន៍ជាតិ ២០១៩-២០២៣​ រំពឹងថា ​ផលិតផលក្នុងស្រុកសរុបកម្ពុជា ​នឹងកើនឡើងក្នុងកម្រិតប្រមាណ ៦,២ភាគ រយ ។

ឯកឧត្តម ថេង បញ្ញាធន ប្រតិភូរាជរដ្ឋាភិបាល ​ទទួលបន្ទុកអគ្គនាយកផែនការ​ បានឲ្យដឹងថា ផែន ការយុទ្ធសាស្ត្រអភិវឌ្ឍន៍ជាតិ ​២០១៩-២០២៣ ​ក៏ត្រូវបានកែសម្រួល រួមទាំងប្រមូលធាតុផ្សំ​បន្ថែម​ទៀត ពីគ្រប់ភាគី ដើម្បីអនុវត្តសម្រេចតាមផែនការ ​ខណៈគម្រោងនេះ ក៏បានរងការ​ប៉ះពាល់​ដោយសារបញ្ហាការ ​ឆ្លងរីករាលដាលនៃជំងឺកូវីដ-១៩ ។​ នៅដើមឆ្នាំ២០២៣ ក្រសួងផែនការ នឹងដឹកនាំ​សម្របសម្រួលរៀបចំ ​ផែនការជាតិថ្មី ​សម្រាប់អាណត្តិ ឆ្នាំ២០២២៤-២០២៨ ៕ អត្ថបទ៖ បាន សុខរិទ្ធិ