សៀមរាប៖ ក្រុមអ្នកលក់ដូរវត្ថុអនុវស្សាវរីយ៍ នៅខេត្ដសៀមរាប បានសម្ដែងការរីករាយ និង​សប្បាយ​ចិត្ដ បន្ទាប់ពីទីផ្សារនេះ បានចាប់ផ្ដើមកម្រើកឡើងវិញ ​ខណៈមានវត្តមានទេសចរបរទេស។

អ្នកលក់ដូរវត្ថុអនុស្សាវរីយ៍ នៅក្នុងផ្សារ​ផលិតផល​កម្ពុជា ​ក្នុង​ក្រុងសៀមរាប ​បាន​ឱ្យដឹងថា ​ក្នុង រយៈពេល៣ខែ​ចុងក្រោយនេះ​ ការលក់វត្ថុអនុស្សាវរីយ៍ ​ដែលជាផលិតផលកូនខ្មែរ​ មាដំណើរការល្អ ដោយមាន​អ្នកទេសចរទិញច្រើន ​បើធៀបជាមួយឆ្នាំមុនៗ ​ដែល​បានរាត្បាតដោយសារជំងឺកូវីដ-១៩ ។

ពួកគេ បានឱ្យដឹងថា ​រាល់ថ្ងៃនេះ មានអ្នកទេសចររាប់រយនាក់ចូលផ្សារផលិតផលកម្ពុជា​ ដើម្បីរក ទិញវត្ថុអនុស្សាវរីយ៍ ​តែភាគច្រើនជាអ្នកទេសចរអន្ដរជាតិ ។

លោក អ៊ុន សាវ៉ាន់ អ្នកគ្រប់គ្រងផ្សារផលិតផលកម្ពុជា ​បានឱ្យដឹងថា ​កន្លែងលក់វត្ថុអនុស្សាវរីយ៍ នេះ បានចាប់ផ្ដើមបើកឡើងវិញ​ កាលពីខែមករា ឆ្នាំ២០២២ ​និងមានដំណើរការរហូតដល់ពេលនេះ បន្ទាប់ពី​បានបិទមួយរយៈ​ ដោយសារការរាត្បាតសកលនៃជំងឺកូវីដ-១៩ ។

លោក បានឱ្យដឹងថា ​មានភ្ញៀវទេសចរអន្ដរជាតិច្រើន ​បានូលស្វែងរកវត្ថុអនុស្សាវរីយ៍ ​ពិសេសនៅ ពេលយប់ ​ដែលនៅក្នុងផ្សារនេះ គឺដាក់តាំងលក់ផលិតផល​វត្ថុអនុស្សាវរីយ៍ស្នាដៃ​កូនខ្មែរ​សុទ្ធសាធ។

ផ្សារផលិតផលកម្ពុជា មានទីតាំងនៅជិតសាលារៀន១០មករា ក្នុងក្រុងសៀមរាប​ ដែលមានលក់ សម្ភារអនុស្សាវរីយ៍​៩០ភាគរយ។ ​ការបើកដំណើរការផ្សារនេះ ​មានគោលបំណងចង់ឱ្យ​ប្រជាពលរដ្ឋ​ទទួល ​បានប្រាក់ចំណូលពីការលក់ផលិតផលឱ្យអ្នកកទេសចរ។

វាក៏ជាកន្លែងបង្រៀនអំពីរបៀបធ្វើអាជីវកម្មខ្នាត តូច ​ដែលអាចឱ្យប្រជាពលរដ្ឋខ្មែរ ក្លាយខ្លួនជា​ម្ចាស់​អាវជីកម្មខ្នាតធំ​ និងមានកម្មសិទ្ធិបញ្ញាត្រឹមត្រូវ ​មានគំនិតច្ឆៃប្រឌិតវត្ថុអនុស្សាវរីយ៍ ដែលមាន​ការ​ទទួលស្គាល់ស្នារដៃរបស់ខ្លួនលើពិភពកលោក។

ផ្សារផលិតផលកម្ពុជា ​ប្រមូលផ្តុំផលិតផល ​ស្នាដៃរបស់កូនខ្មែរ ​ដែលមានទេពកោសល្យ មក​ពី​សិប្បកម្ម និងតាមសហគមន៍មួយចំនួន ក្នុងខេត្តសៀមរាប ៕អត្ថបទ៖ ឈិត សាវី