​បាល់ទាត់៖ ​ទីបំផុត​ក្លិប​ទាំង ៦ របស់ English Premier League ដែល​ពាក់ព័ន្ធ​ជាមួយ European Super League នោះបាន​ប្រកាស​ដកខ្លួន​វិញ​ហើយ​។ ​Manchester City ជា​ក្លិប​ដំបូង​ដែល​ផ្លាស់ប្តូរ​ការ​សំរេច​ចិត្ត បន្ទាប់ពី​ក៏​កំពុង​រៀបចំ​បែបបទ​ដកខ្លួន​ផងដែរ​។

​​ក្លិប​បួន​ផ្សេងទៀត​រួមមាន Arsenal, Liverpool, Manchester United និង Tottenham Hotspur សុទ្ធតែ​សំរេច​ចិត្ត​ដកខ្លួន​ដូចគ្នា​។ ​ការប្រកួត European Super League ត្រូវបាន​ប្រកាស​កាល​ពី​ថ្ងៃអាទិត្យ​ដែលមាន​សមាជិក ១២ក្លិប​ធំ​នៅ​អឺរ៉ុប​។ ​ក្លិប​បិសាច​ក្រហម Manchester United បានអោយដឹងថា ក្លិប​មើលឃើញ​ពី​ការចង់បាន​របស់​អ្នកគាំទ្រ ក៏ដូចជា​រដ្ឋាភិបាល មុននឹង​ឈានដល់​ការសំរេចចិត្ត​ដកខ្លួន​នៅពេលនេះ​។ ​ចំណែក​ក្លិប​កាំភ្លើង​ធំ Arsenal បានចេញ​សេចក្តី​ថ្លែង​សុំទោស​ជា​សាធារណៈ​ទៅកាន់​អ្នកគាំទ្រ ស្រប​ពេលដែលប្រធាន​ក្លិប Spurs លោក Daniel Levy បានបង្ហាញ​អារម្មណ៍​ស្តាយក្រោយ​ចំពោះ​រឿងនេះ​។ ​​ប្រធាន UEFA, លោក Alexander Ceferin ​ក្រោយមក​បាន​សាទរ​ចំពោះ​ការ​ត្រលប់​ក្រោយ​របស់​ក្លិប​អង់គ្លេស​ទាំង ៦ ដែល​សម្លឹង​ឃើញ​ពី​ប្រយោជន៍​រួម ក៏ដូចជា​គ្រួសារ​បាល់ទាត់​អឺរ៉ុប​ទាំងមូល​ជាង​ប្រយោជន៍​បុគ្គល​។​ ​ក្លិប​អង់គ្លេស​ទាំង ៦ ស្ថិតក្នុង​ចំណោម​ក្លិប​ទាំង ១២ ដែល​រួមគ្នា​បង្កើត European Super League នេះ​ ស្រប​ពេលដែល​នៅពេលនេះ​ត្រូវបាន​គេ​ដឹងថា​ ក្លិប​ផ្សេងៗ​ទៀត​ដែល​នៅសល់​កំពុង​ត្រលប់​ការសំរេចចិត្ត​ដូចគ្នា​។​

​​ការសំរេចចិត្ត​ដកខ្លួន​ពី European Super League របស់​ក្លិប​ទាំង ៦ បន្ទាប់ពី​ការរិះគន់​យ៉ាង​ចាស់ដៃ​ពី​សំណាក់មជ្ឈដ្ឋាន​ទូទៅ ក្លិប​បាល់ទាត់​តូចៗ កីឡាករ​បាល់ទាត់ អ្នកវិភាគ ជាពិសេស​អ្នកគាំទ្រ​ដែលជា​សសរ​ដ៏​រឹងមាំ​របស់​ក្លិប ក៏ដូចជា​មានការ​ថ្កោលទោស​ពី UEFA និង នាយករដ្ឋមន្ត្រី​អង់គ្លេស​លោក Boris Johnson ផងដែរ​។​ ​សូមបញ្ជាក់ថា ប្រធាន​ក្លឹប Real Madrid លោក Florentino Perez គឺជា​អ្នក​ផ្ដួចផ្ដើម​បង្កើត​ពានរង្វាន់​នេះ​ឡើង ​ជាមួយ​ក្លឹប​យក្ស​នៅ​អឺរ៉ុប​ផ្សេងទៀត​ដូចជា Barcelona, Atletico Madrid, AC Milan, Inter, Juventus, Arsenal, Chelsea, Liverpool, Manchester City, Manchester United និង TottenhamHotspur ដែលជា​សមាជិក​ ​មានន័យថាប្រសិន European Super League ចេញ​ជា​រូបរាង​នោះ​ក្លិប​ទាំង ១២ នេះ​នឹង​បង្ហាញ​មុខជា​អចិន្ត្រៃយ៍​៕

​អត្ថបទ​៖​នាង សុភា​វុ​ធ