​​វ៉ូ​វី​ណា​ម​៖ កីឡាការិនី​ជម្រើសជាតិ​វ៉ូ​វី​ណា​ម​កម្ពុជា ពៅ សុខា តំណាង​យុវជន​កម្ពុជា​កាលពី​ថ្មីៗត្រូវបាន​អញ្ជើញ​ចូលរួម​វេទិកា​យុវជន​ថ្នាក់​តំបន់​អាស៊ាន​-​អង្គការសហប្រជាជាតិ​ (UN) ស្ដីពី​ការ​ទប់​ស្កាត់​អំពើហិង្សា​ជ្រុលនិយម​តាមរយៈ​កីឡា (ASEAN-UN Reginal Youth Forum on Prevention Violet Extremism Through Sport) ​ដែល​ធ្វើ​នៅ​ទីក្រុង​បាងកក ប្រទេស​ថៃ។ ​

​បន្ទាប់ពី​ចូលរួម​វេទិការ​អន្ដរជាតិ កញ្ញា​បានបង្ហាញ​នូវ​សេចក្ដីសោមនស្ស​រីករាយ​ក្រៃលែង ដោយ​ក្នុងចំណោម​យុវជន​អាស៊ាន​ភាគច្រើនដែលជា​អ្នកមាន​បទពិសោធន៍​ផ្នែក​ការងារ​សង្គម ឬ​អង្គការ​ក្រៅ​រាជរដ្ឋាភិបាល ផ្ទុយ​ពី​ខ្លួន​ជា​អ្នកកីឡា តែ​បានធ្វើ​បទ​បង្ហាញ​ចែករំលែក​ពី​ទិដ្ឋភាព​ជាក់ស្ដែង​នៅ​កម្ពុជា ក្រោម​ដំបូល​សន្ដិភាព ពុំមាន​ហិង្សា​អ្វី​គួរ​ឲ្យ​កត់​សម្គាល់ ដូច​បណ្ដា​ប្រទេស​មួយចំនួន។​ អ្វីដែល​ពិសេសគឺ​កីឡាការិនី​ស្រស់​សោភា​រូបនេះ បាន​លើកយក​ប្រធានបទ “​កីឡា​រស់ក្នុង​សន្ដិភាព​” ទៅ​បង្ហាញ​ក្នុង​វេទិកា​សាធារណៈ​នេះ រហូត​មានការ​ចាប់អារម្មណ៍​ពី​បណ្ដា​យុវជន​អាស៊ាន និង​មន្ដ្រី​ UN ​ដ្បិត​កញ្ញា​យល់ថា ច្បាស់​ណាស់ កីឡា​មិន​ត្រឹមតែ​នាំមុខ​សុខភាព មិត្តភាព សាមគ្គីភាព​នោះទេ ថែមទាំង​នាំមក​នូវ​កិត្តិយស​ជូន​ជាតិ និង​សុខសន្ដិភាពថែមទៀត។​

​គួរ​ដឹងថា កន្លងមក​កីឡាការិនី ពៅ សុខា ក៏​ត្រូវបាន​អន្ដរជាតិ​ជ្រើសរើស និង​អញ្ជើញ​ចូលរួម​ចែករំលែក​ពីបទ​ពិសោធន៍ និង​ចំណេះដឹង​ទូទៅ​ពាក់ព័ន្ធ​កីឡា​ក្នុង​វេទិកា​អន្ដរជាតិ ជាក់ស្ដែង​កាលពី​ចុងឆ្នាំ​២០២១ កន្លងទៅ កញ្ញា​ក៏ត្រូវ​បាន​លេខាធិការដ្ឋាន​អាស៊ាន អញ្ជើញ​ចួ​ល​រួម​កម្មវិធី​ជជែក​ពិភាក្សា​ដើម្បី​លើកកម្ពស់​ការចូលរួម​របស់​ស្ត្រី ក្នុង​វិស័យ​កីឡា​នៅ​អាស៊ាន និង​ការផ្តល់​កិត្តិយស​ដល់​ម្ចាស់​មេដាយ​អូឡាំពិក និង​ប៉ា​រ៉ា​ឡាំ​ពិ​ក​អាស៊ាន​តូ​ក្យូ ២០២០ នៅ​ទីក្រុង​ហ្សា​កាតា ប្រទេស​ឥណ្ឌូនេស៊ី តាមរយៈ​សន្និសីទ​វីដេអូ​ ​ក្នុងនាម​ជា​ទូត​សុច្ឆន្ទៈ​កីឡា​ស្ត្រី​អាស៊ាន​របស់​ប្រទេស​កម្ពុជា​ ​រួមជាមួយ​ និង​ទូត​សុច្ឆន្ទៈ​កីឡា​ស្ត្រី​អាស៊ាន​មកពី​ប្រទេស ៩​ផ្សេងទៀត​ផងដែរ៕ ​អត្ថបទ៖ លី ឈុន​ឡា