​បាល់ទាត់៖ ​ម្ចាស់​ជ័យលាភី​បាល់ទាត់​ពិភពលោក​ថ្មី Lionel Messi បាន​ឈានដល់​កិច្ចព្រមព្រៀង​ហើយ​ក្នុង​ការបន្ត​កិច្ចសន្យា​ជាមួយ​ក្លិប​ជើងឯក​បារាំង Paris Saint Germain ដែល​នឹងមាន​សុពលភាព​ដល់​បញ្ចប់រ​ដូ​វ​កាល ២០២៣-២៤ នេះ​បើតាម​ការចុះផ្សាយ​របស់​សារព័ត៌​មានបារាំង Le Parisien កាលពី​ថ្ងៃ​ពុធ​ម្សិលមិញ​។

​​ខ្សែប្រយុទ្ធ​វ័យ ៣៥ឆ្នាំ ម្ចាស់​ជ័យលាភី Ballon d’Or ៧លើក​ទើបតែ​ជួយ​ក្រុម​ជំរើសជាតិ​អា​ហ្ស​ង់​ទីន​លើក​ពានបាល់ទាត់​ពិភពលោក​ជា​លើក​ទី៣ ក្នុង​ប្រវត្តិសាស្ត្រ ជា​លើកដំបូង​ក្នុង​រយៈពេល ៣៦ឆ្នាំ និង​ជា​លើក​ទី១ ក្នុង​អាជីព​របស់ Messi​។ ​សារព័ត៌មាន​ដដែល​នេះ​បានសរសេរថា កិច្ចព្រមព្រៀង​រវាង Messi និង PSG ក្នុង​ការបន្ត​កិច្ចសន្យា​នោះ​ត្រូវរ៉ូវ​គ្នា​តាំងពីដើម​ខែធ្នូ​ អំឡុង​ព្រឹត្តិការណ៍​បាល់ទាត់​ពិភពលោក​ម្ល៉េះ​។ ​​ជាមួយគ្នា​នោះដែរ​ប្រធាន​ក្លិប PSG លោក Nasser Al-Khelaifi ធ្លាប់​និយាយ​ដែរ​ថា Messi សប្បាយ​ចិត្តនឹង​រស់នៅ​ទឹកដី​បារាំង ហើយ​រឿង​បន្ត​កិច្ចសន្យា​នឹង​និយាយ​ក្រោយ​ចប់ World Cup​។

​​មិនមាន​ការឆ្លើយតប​ណាមួយ​ពី​ភាគី​ក្លិប PSG និង Messi ឡើយ​ ខណៈដែល​អតីត​ខ្សែប្រយុទ្ធ Barcelona រូបនេះកំពុង​ចំណាយពេល​អបអរសាទ​រ​ពានរង្វាន់​បាល់ទាត់​ពិភពលោក​របស់ខ្លួន ​នៅ​ទឹកដី​កំណើត​នៅឡើយ​។ ​​រំលឹកថា Messi ដែល​ស៊ុត​បញ្ចូល​ទី​បាន ១២គ្រាប់ ១៤ បាល់​បញ្ជូន​ឱ្យ PSG រដូវ​កាល​នេះបាន​ផ្លាស់​មកកាន់ PSG ពី Barcelona កាលពី​ឆ្នាំ២០២១ ជាមួយនឹង​កិច្ចសន្យា ២ឆ្នាំ​ដែល​នឹង​អស់​សុពលភាព​ត្រឹម​ដំណាច់​រដូវ​កាល​នេះ​៕

​អត្ថបទ​៖​នាង សុភា​វុ​ធ