ព្រះសីហនុ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅតែបញ្ជាក់អំពីគម្រោងអភិវឌ្ឍន៍​ហេដ្ឋា​រចនាសម្ព័ន្ធដែលជាអាទិភាពនៅតែបន្ត ​សាងសង់ជាច្រើនទៀត ។

ក្នុងពិធីដែលធ្វើនៅថ្ងៃទី២២ ខែធ្នូ ឆ្នាំ២០២២ សម្តេចតេជោ មានប្រសាសន៍ថា​ យើង​សម្ពោធ សមិទ្ធផល​នៅថ្ងៃនេះ​ បន្ថែមទៅលើផ្លូវចំនួន៣៧ខ្សែ ​សម្ពោធ​ដាក់ឲ្យប្រើប្រាស់កាលពីឆ្នាំទៅ ដែល​ប្រើប្រាស់ប្រាក់សន្សំរបស់យើង ​ហើយថ្មីៗបានសម្ពោធផ្លូវល្បឿនលឿនភ្នំពេញ ខេត្តព្រះសីហនុ។បើទោះបីមានផ្លូវ ៣៧ ខ្សែក្នុងខេត្តនិងផ្លូវល្បឿនលឿន ​ប៉ុន្តែបើពុំមានផ្លូវទាំង២ខ្សែនេះទៀត​ទេ​ការលំបាករបស់ពលរដ្ឋក៏នៅតែមាន។

សម្ដេចតេជោ បានបញ្ជាក់ថា ការវិយោគទៅលើហេដ្ឋារចនាសម្ព័ន្ធនេះហើយ ​គឺជាការបែងចែក ផ្លែផ្កា​នៃ​កំណើនសេដ្ឋកិច្ចជូនប្រជាពលរដ្ឋប្រកបដោយសមធម៌។

សម្តេច បន្តថា ប្រាក់សន្សំ​ដែល​បាន​បញ្ចុះ​មកខេត្តព្រះសីហនុ ​មានប្រមាណជា៤០០ ​លានដុល្លាររួម​ទាំង​ថ្ងៃនេះ​ដែលបានចំណាយប្រមាណ ​៧០លានដុល្លារ។

សម្តេចថា តើនេះយើងបានមើលឃើញអ្វី?ពោល​គឺបានមើលឃើញថា​ជា​សម្បត្តិរួម​សម្រាប់​ប្រជាជន​កម្ពុជា​ទាំងអស់មិនថាអ្នកមាន ឬអ្នកក្រទេគឺទទួលផលប្រើប្រាស់​បានទាំងអស់។សម្តេច ក៏បាន​បង្ហាញពីនយោបាយ​ជាអាទិភាព​ក្នុងការបន្តកសាងហេដ្ឋារចនា ​សម្ព័ន្ធតភ្ជាប់ ក្នុងនោះគឺមាន​គម្រោង​ការតភ្ជាប់ដែលត្រូវតែធ្វើបន្តទៀត​ដោយ​វិភាជ​ថវិកា​ឲ្យកាន់តែច្រើនហើយធ្វើឲ្យមាំ។សម្តេចថា ​គម្រោងកសាង​នឹងបើកជាបន្តបន្ទាប់ទៀត មានដូចជាគម្រោងថ្មីៗដែលត្រូវ​បន្តការ​ស្តារឡើងវិញ​នូវផ្លូវជាតិលេខ៤១ តភ្ជាប់ទៅខេត្ត កំពត ,ផ្លូវលេខ៣៣, ៣១, នៅ​ខេត្ត​កំពត,ផ្លូវលេខ៧នៅខេត្តកំពង់ចាម ស្គន់ ដែលត្រូវពង្រីកឱ្យធំ,ស្ពានឆ្លង​ទន្លេនៅខេត្តក្រចេះ ជាមួយការតភ្ជាប់ផ្លូវទៅខេត្តកំពង់ធំ។

ក្រៅពីនោះនៅទីក្រុងភ្នំពេញ​មានស្ពានឆ្លងទន្លេមេគង្គទន្លេសាប ដែលជាស្ពានមិត្តភាពកម្ពុជាកូរ៉េ កសាងចេញពីផ្សារចាស់​ទៅជ្រោយចង្វា ​និងតទៅ​អរិយក្សត្រ,និងស្ពាន១ទៀតគឺស្ពានផ្លូវ​ល្បឿនលឿន​ដ៏ធំដែលគ្រោង​ចំណាយ ​២០០លានដុល្លារ​សម្រាប់ការ​តភ្ជាប់​ពីភ្នំពេញ​ទៅល្វាឯម និងឆ្ពោះទៅព្រំដែនវៀតណាម។

ក្រៅពីនោះនៅមានស្ពាន១ទៀតឆ្លងទន្លេបាសាក់ ម្តុំចាក់អង្រែ​បន្ថែមទៀត ដើម្បី​បញ្ចៀស​ចរាចរណ៍។

សម្តេចថា មិនទាន់អស់ទេគឺនៅមានគម្រោងផ្លូវ​តភ្ជាប់ស្ពាន​ពី​កំពង់ឆ្នាំង​ទៅកំពង់ធំ និង​កំពុង​សិក្សាធ្វើផ្លូវតភ្ជាប់ពីបាត់ដំបង​ទៅសៀមរាប ,កំពុងសិក្សាផ្លូវល្បឿនលឿន​ពីភ្នំពេញ​ទៅសៀមរាប និងកំពុងសិក្សាធ្វើផ្លូវដែកល្បឿនលឿនពីភ្នំពេញទៅកំពង់សោម និងតភ្ជាប់ទៅព្រំដែនថៃផងដែរ៕