ភ្នំពេញ៖ ប្រទេសកម្ពុជា និងប្រទេសចិន បានសន្យាបន្តរួមគ្នា ដើម្បីប្រយុទ្ធប្រឆាំងនឹងការឆ្លង រីករាលដាលនៃជំងឺកូវីដ-១៩ តាមរយៈការផ្ដល់ជំនួយវេជ្ជសាស្ត្រ ការផ្លាស់ប្ដូរបទពិសោធន៍ លើការគ្រប់គ្រងកូវីដ-១៩ជាដើម ។

ក្នុងសិក្ខាសាលាស្ដីពីកម្ពុជា-ចិន រួមជោគវាសនាប្រយុទ្ធប្រឆាំងនឹងកូវីដ-១៩ កាលពីថ្ងៃទី២១ ខែធ្នូ ឆ្នាំ២០២២ ឯកឧត្តមកិត្តិសង្គហបណ្ឌិត ទេព ងន អនុប្រធានទី២ព្រឹទ្ធសភា ​មានប្រសាសន៍ថា ការ​ប្រយុទ្ធប្រឆាំងជំងឺកូវីដ-១៩ ​ចិនបានជួយកម្ពុជាជាច្រើន ក្នុងនោះ​មានការចាត់​បញ្ជូន​ក្រុមគ្រូពេទ្យ​ប្រយុទ្ធប្រឆាំងជំងឺឆ្លងជាច្រើនលើក ​មកជួយដល់កម្ពុជា ​ព្រមទាំង​បរិច្ចាគ​សម្ភារ​វេជ្ជសាស្ត្រជាច្រើន ក៏ដូចជាវ៉ាក់សាំងជាច្រើនដូស ​និងច្រើនលើក ដោយជួយឱ្យកម្ពុជាទទួល​បានលទ្ធផល​ល្អក្នុងការ​ប្រយុទ្ធប្រឆាំងជំងឺកូវីដ-១៩ ។

ឯកឧត្តម បានបន្តថា រដ្ឋាភិបាលក៏ដូចជាប្រជាជន ​នៃប្រទេសទាំងពីរ​កម្ពុជា-ចិន នៅតែបន្តការជួយ​យកអាសារគ្នាទៅវិញទៅមក​ រួមសុខរួមទុក្ខជាមួយគ្នាជំរុញ ​និងចូលរួមចំណែក​យ៉ាងសកម្មក្នុង​កិច្ច​សហប្រតិបត្តិការប្រយុទ្ធប្រឆាំង នឹងជំងឺមួយនេះ ​ហើយថ្មីៗ​នេះប្រទេសចិន​បានកែ​សម្រួល​វិធាន​ការបង្ការ ​និងគ្រប់គ្រងជំងឺ​រាតត្បាតម្ដងទៀត​ ដែល​នេះ​គឺជាការសម្របខ្លួនតាមស្ថានភាព​ជាក់ស្ដែង និង​ជាសកម្មភាពខ្លួនផ្ទាល់​ ដើម្បីបង្កើនភាពត្រឹមត្រូវនៃការបង្ការ និងគ្រប់គ្រងជំងឺរាតត្បាត ដើម្បី​អនុវត្តវិធានការមានប្រសិទ្ធភាព ​ក្នុងការសម្របសម្រួល​សុវត្ថិភាព​សុខភាព និងស្ដារឡើងវិញ​ជីវភាព​រស់នៅជាប្រក្រតីរបស់ប្រជាជន ។

ក្នុងសិក្ខាសាលានោះ ឯកឧត្ដម វ៉ាង វិនធាន ​ឯកអគ្គរដ្ឋទូតចិនប្រចាំនៅកម្ពុជា​ បានថ្លែងថា ការកែ​សម្រួល​គោលនយោបាយបង្ការ ​និងគ្រប់គ្រងជំងឺរាតត្បាត​ របស់ប្រទេសចិន​ ឆ្លុះបញ្ចាំង​ពី​ជំហររបស់ប្រជាជន​ និងស្មារតីនៃការស្វែងរកការពិត​ និងជឿនលឿន​ទៅតាមសម័យកាល ។

ឯកឧត្តមអគ្គរដ្ឋទូត ​បានបន្ថែមថា រដ្ឋាភិបាលចិនបានបង្កើន​ប្រសិទ្ធភាព និងកែសម្រួល​វិធាន​ការ​បង្ការ និងគ្រប់គ្រងជំងឺរាតត្បាតទៅតាមពេលវេលា​ និងស្ថានភាព ក្នុងគោលបំណង កាត់​បន្ថយ​ផលប៉ះពាល់ ​នៃការរាតត្បាតរបស់មេរោគមកលើជីវភាពរស់នៅរបស់ប្រជាជន និងការអភិវឌ្ឍ​សេដ្ឋកិច្ច និងសង្គម ​ការពារយ៉ាងមានប្រសិទ្ធភាព ​និងប្រកបដោយវិទ្យាសាស្រ្ត នូវ​សុវត្ថិភាព​អាយុជីវិត​ប្រជាជន ​និងធានាឱ្យបាននូវដំណើរការប្រកបដោយសណ្តាប់ធ្នាប់​ នៃសេដ្ឋកិច្ច ​និងសង្គម ។ ស្របពេលជាមួយគ្នានេះ​ ការកែសម្រួលគោលនយោបាយបង្ការ និងគ្រប់គ្រងជំងឺរាតត្បាតរបស់​ប្រទេសចិន ​គឺអំណោយផលដល់ការផ្លាស់ប្ដូរស៊ីជម្រៅ​ ជាមួយពិភពខាងក្រៅ និង​ការ​ចាក់បញ្ចូល​ថាមពលវិជ្ជមាន ​ចូលទៅក្នុងការងើបឡើងវិញ​ នៃសេដ្ឋកិច្ចពិភពលោក ។

គួរបញ្ជាក់ថា ​នៅក្នុងសិក្ខាសាលានេះ ​មូលនិធិចិនដើម្បីសន្តិភាព​ និងការអភិវឌ្ឍ ក៏បាន​ឧបត្ថម្ភ​ឧបករណ៍​តេស្តរហ័សពិនិត្យរកជំងឺកូវីដ-១៩ ​ចំនួន៧០ម៉ឺនតេស្ត ​ជូនដល់ព្រឹទ្ធសភាកម្ពុជាផងដែរ ៕ អត្ថបទ បាន សុខរិទ្ធិ