ត្បូងឃ្មុំ៖ នាព្រឹក ថ្ងៃទី២២ ខែធ្នូ ឆ្នាំ២០២២ ឯកឧត្តម វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី និង​ជាប្រធានក្រុមការងារគណបក្សថ្នាក់កណ្តាលចុះមូលដ្ឋានស្រុកតំបែរខេត្តត្បូងឃ្មុំ និង​ស្រុកកំពង់សៀម ខេត្តកំពង់ចាម និងលោកជំទាវ អញ្ជើញសម្ពោធដាក់ឱ្យ​ប្រើប្រាស់​ជាផ្លូវការ​នូវអគារមណ្ឌលសុខភាព​ ខ្លោងទ្វារ របង និងសមិទ្ធផលនានានៃមណ្ឌល​សុខភាព​ត្រពាំងព្រីង ស្ថិតភូមិត្រពាំងព្រីង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។

ក្នុងឱកាសនោះ ឯកឧត្តម វេង សាខុន បានពាំនាំនូវការផ្តាំផ្ញើសាកសួរសុខទុក្ខ និងសេចក្តីនឹករលឹក​ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត​មកជូនបងប្អូន​ប្រជាពលរដ្ឋទាំងអស់នៅឃុំត្រពាំងព្រីង ​និងទូទាំងស្រុកតំបែរ និងបានជូនពរឱ្យបងប្អូន​ជួប​តែពុទ្ធពរទាំង ៤ប្រការ។

ឯកឧត្តម ក៏បានកោតសរសើរ និងថ្លែងអំណរគុណយ៉ាងជ្រាលជ្រៅជូនចំពោះបងប្អូនប្រជាជនខ្មែរ​យើង​កំពុងរស់នៅប្រទេសអាឡឺម៉ង់​ ដែលបានរួមគ្នាលះបង់ថវិកាផ្ទាល់ខ្លួនសរុប ៨០ ០០០ ដុល្លារ​អាមេរិក ដើម្បីសាងសងអគារមណ្ឌលសុខភាពត្រពាំងព្រីងនេះឡើងយ៉ាងល្អប្រណិត។

ឯកឧត្តម បន្ថែមថា សកម្មភាពនេះ​គឺពិតជាបានចូលរួមចំណែកយ៉ាងសំខាន់ជាមួយ​រាជរដ្ឋាភិបាល​ដើម្បីលើកស្ទួយវិស័យសុខាភិបាល ​ការផ្តល់សេវាពិនិត្យ ​ព្យាបាល និងថែទាំសុខភាពជូនបងប្អូន​ប្រជាជន​នៅ​មូលដ្ឋាន ​ជាពិសេសសម្រាប់ស្ត្រីមានផ្ទៃពោះ ​និងទារក។

ឆ្លៀតយកឱកាសនេះផងដែរ​ ឯកឧត្តមក៏បានវាយតម្លៃខ្ពស់ចំពោះឯកឧត្តមអនុប្រធាន​ក្រុមការងារ​ចុះមូលដ្ឋានស្រុកតំបែរ ឯកឧត្តម លោកជំទាវប្រធាន ​និងអនុប្រធានក្រុមការងារចុះមូលដ្ឋានឃុំ និង​ក្រុមការងារពាក់ព័ន្ធទាំងអស់ ដែលបានខិតខំប្រឹងប្រែងអស់កំលាំង​កាយចិត្តដោះស្រាយ​រាល់​កង្វះខាតទុក្ខលំបាក​ និងបញ្ហារបស់ប្រជាជនយើងជាប្រចាំ។ ជាក់ស្តែង មណ្ឌលសុខភាព​ត្រពាំង​ព្រីង​ដែល​បានដាក់​សម្ពោធឱ្យប្រើប្រាស់នាព្រឹកនេះ ​គឺមិនអាចដំណើរការបាន​នោះទេ​បើមិនមាន​ថ្នាក់ដឹកនាំ​ មន្ត្រីរាជការ សប្បុរសជន ​និងក្រុមការងារចុះមូលដ្ឋានទាំងអស់​ចូលរួម​បរិច្ចាគ​ជាដី ជាគ្រឿង​ចក្រ ខ្លោងទ្វារ របង និងសម្ភារៈបរិក្ខារពេទ្យនានាសរុប ៣១ ២១៥ ដុល្លារអាមេរិក​បន្ថែមទៀត។ កាន់តែពិសេសនោះ មណ្ឌលសុខភាពពីរបន្ថែមទៀត គឺនៅឃុំនាងទើត និងឃុំគោកស្រុក​ ស្រុកតំបែរនឹងចាប់ផ្តើមដំណើរការសាងសងនាពេលឆាប់ៗខាងមុខនេះផងដែរ។ សមិទ្ធផលទាំងអស់នេះ បាននិងកំពុងផ្តល់ជូនមកនូវការថែទាំសុខភាពយ៉ាង​ល្អប្រពៃជូន​ប្រជាជនយើងទាំងអស់ ​ហើយការងារនេះគឺជាការងារស្នូលរបស់រាជ រដ្ឋាភិបាល និង​គណបក្សប្រជាជនកម្ពុជា​ដែលដឹកនាំដោយសម្តេចតេជោ ហើយសម្តេចតេជោនឹងបន្តរួមសុខរួម​ទុក្ខជាមួយប្រជាជនយើងជារៀងរហូត។

ក្នុងឱកាសនោះដែរ ឯកឧត្តមក៏បានព្រះគេននូវថវិកាចំនួន ៥លានរៀលជូនដល់វត្តស្រែកក និង៥លានរៀលបន្ថែមទៀតជូនដល់វត្តបង្ហើរខ្លែង។ សម្រាប់វត្តត្រពាំងព្រីង ឯកឧត្តម​ក៏បាន​ព្រះគេន​នូវថវិកាចំនួន ៣០លានរៀលផងដែរ ​ក្នុងនោះ ថវិការបស់ឯកឧត្តមផ្ទាល់ចំនួន ១០លានរៀល ថវិការបស់​ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ ​និងនេសាទចំនួន ១០លាន​រៀល​ និងថវិការបស់ក្រុមការងារចុះមូលដ្ឋានឃុំត្រពាំងព្រីងចំនួន​ ១០លានរៀល។ ឧបត្ថម្ភ​កុំព្យូទ័រសម្រាប់​ប្រជាការពារឃុំចំនួន ​​១គ្រឿង និងថវិកា​ជូនដល់ប្រជាពលរដ្ឋដែលបាន​ចូលរួម​នាព្រឹកនេះ គឺក្នុងម្នាក់ៗទទួលបាន ២០ ០០០រៀល។

សូមជម្រាបជូនថា មណ្ឌលសុខភាពត្រពាំងព្រីងមានផ្ទៃដី ៥ ៤៦៩ម៉ែត្រការ៉េ​ មានអគារ ២ខ្នង គឺអគារមួយខ្នងបណ្តោយ ១៤ម៉ែត្រ និងទទឹង ៨,៨ម៉ែត្រសម្រាប់ទទួលពិនិត្យជំងឺទូទៅ​ ផ្តល់ថ្នាំបង្ការ ពិនិត្យផ្ទៃពោះ​ ឃ្លាំងឱសថ ​និងអគារមួយទៀតទំហំបណ្តោយ ​៨ម៉ែត្រ និងទទឹង ៥,៤ម៉ែត្រ​សម្រាប់ស្ត្រីរង់ចាំសម្រាល​ សរុបថវិកាចំនួន ១១១ ២១៥ ដុល្លារអាមេរិក៕