កណ្ដាល៖ នៅព្រឹកថ្ងៃទី២២ ខែធ្នូនេះ នៅតាមមណ្ឌលប្រឡងសញ្ញាបត្រមធ្យមសិក្សាទុតិយភូមិ ឬប្រឡងបាក់ឌុប ឆ្នាំសិក្សា២០២២ នៅខេត្តកណ្តាល មានបណ្តាសិស្សានុសិស្ស បានមកជួបជុំគ្នា រងចាំមើលលទ្ធផលការប្រឡងរបស់ខ្លួនដោយចិត្តអន្ទះសារ ខណៈលទ្ធផលការប្រឡងនោះនៅខេត្តកណ្តាល នឹងត្រូវបិទប្រកាសនៅតាមមណ្ឌលប្រឡងចាប់ពីម៉ោង៣លា្ងចនេះតទៅ។

បណ្តាសិស្សដែលបានមកមណ្ឌលប្រឡងវិទ្យាល័យហ៊ុនសែនតាខ្មៅ ខេត្តកណ្តាលបានថ្លែងថា ទោះបីជាលទ្ធផលនឹងមានប្រកាសផ្សាយនៅតាមFacebookផ្លូវការរបស់ក្រសួងអប់រំយុវជន និងកីឡាក៏ដោយ ការមើលលទ្ធផលដែលគេបិទផ្សាយនៅតាមមណ្ឌលប្រឡងនេះ គឺគេមកមើលរួមគ្នាជាមួយមិត្តភក្តិ ដើម្បីអបអរសប្បាយនឹងលទ្ធផលប្រឡងរបស់គេរួមគ្នា។

ឯកឧត្តមកិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រី ​ប្រធានអង្គភាពប្រឆាំងអំពើពុករលួយ ACU ​បានថ្លែងថា ​ការប្រឡងបាក់ឌុបឆ្នាំ២០២២ ​ក្រោមការដឹកនាំរបស់ឯកឧត្តម​ បណ្ឌិតសភាចារ្យ ហង់ ជួនណារុន ​រដ្ឋមន្ត្រីក្រសួងអប់រំយុវជន​ និងកីឡា ​បានបើកឱកាសឲ្យមន្ត្រី និងអ្នក​សង្កេត​ការណ៍​អង្គភាព​ប្រឆាំងអំពើពុករលួយជាង ​៣០០០នាក់ ចូល​សង្កេតការណ៍​តាមត្រួតពិនិត្យ​តាមដាន​ការប្រឡងក្នុងដំណាក់កាលសរសេរ ​ហើយក្នុងដំណាក់បន្តបន្ទាប់ ACU ​បានដាក់មន្ត្រីACU ៣០០នាក់​បន្តតាមដានសង្កេតការណ៍នៅក្នុង ​ដំណាក់កាលកែវិញ្ញាសារ ​ដំណាក់កាលកាត់ក្បាល​វិញ្ញាសារ​ ដំណាក់កាលបូកពិន្ទុ បញ្ចូល​ពិន្ទុទៅក្នុងកុំព្យូទ័រ ​ដំណាក់បោះពុម្ភលទ្ធផល រហូតដល់​ដំណាក់​ប្រកាសលទ្ធផល​ គឺមានរលូនល្អប្រសើរនៅគ្រប់ដំណាក់កាល។

ឯកឧត្តម ទេសរដ្ឋមន្ត្រី ឱម យិនទៀង បន្តថា ​ដោយឡែកសម្រាប់ការប្រកាសលទ្ធផលមានភាព​លឿន​រហ័ស​មុនការគ្រោងទុកនេះ ​គឺ ដោយសារ ​ក្រសួងអប់រំ បានកែទម្រង់ទៅលើការប្រព័ន្ធ​កុំព្យូរទ័រ ​ហើយACU ​ក៏ពិនិត្យឃើញថា អ្នកវាយបញ្ចូលពិន្ទុនៅក្នុងកុំព្យូទ័រគឺមានការពិនិត្យយ៉ាងល្អិន​ល្អន់បំផុត លឿន និង ​មិនមានកំហុស ​ដែលការងារធ្វើលឿនរហ័សនេះ ​គឺទាំងឯកឧត្តម រដ្ឋមន្ត្រី​ក្រសួងអប់រំ​ និងប្រធានACU​ ឯកភាពគ្នាជម្រុញឲ្យមានការប្រកាស​មុនការគ្រោងទុកនេះ ពោលគឺធ្វើហើយ​ភ្លាម ប្រកាសភ្លាម ៕ អត្ថបទ ស៊ុម សុខជា