ភ្នំពេញ៖ សមាគមទីភ្នាក់ងារទេសចរណ៍ CATA និងបណ្តាក្រុមហ៊ុននានាក្នុងវិស័យទេសចរណ៍​បានរួមគ្នា​រៀបចំកម្មវិធីរាត្រីជួបដៃគូអាជីវកម្មមិត្តអ្នកជំនួញប្រចាំឆ្នាំរបស់សមាគម CATA ​ដែលការ​ប្រារព្ធ​កម្មវិធីនេះ គឺធ្វើឡើងគោលបំណងថ្លែងអំណរគុណខ្លាំងក្លាទៅ​ដល់​ប្រមុខថ្នាក់​រាជរដ្ឋាភិបាល​ដែលបានគ្រប់គ្រងធ្វើឲ្យស្ថានការណ៍កូវីដ១៩ ធូរស្រាលវិញលឿន និងអំពាវនាវបុគ្គលិក​ទេសចរណ៍​ដែលព្យួរការងារសូមត្រឡប់មកធ្វើការងារវិញ។

បើតាមលោកស្រី ឆាយ សៀវលីន ប្រធានសមាគមCATA ថ្លែងប្រាប់BTVល្ងាចថ្ងៃទី២១ ខែធ្នូនេះ ថា ​តាមរយៈការរៀបចំកម្មវិធីនេះ​បណ្តា​ក្រុមហ៊ុនទេសចរណ៍ ​ពិតជា​មានបំណងខ្លាំងចង់​បង្ហាញ​ការ​ដឹងគុណ និងអរគុណជាខ្លាំងដល់សម្តេចតេជោ​ ហ៊ុន សែន ​នាយករដ្ឋមន្ត្រីកម្ពុជា ក្រសួង​សុខាភិបាល ក្រសួងទេសចរណ៍ ​និង​ស្ថាប័ន​ពាក់ព័ន្ធនានាទៀត​ ដែលបានខិតខំប្រឹងប្រែង​អនុវត្ត​យុទ្ធនា​ការទប់ស្កាត់កូវីដ១៩ ការចាក់វ៉ាក់សាំង​ក្របដណ្តប់ពេញផ្ទៃប្រទេស រហូតមានការ​បើក​ប្រទេស បើកទេសចរណ៍ ​បើកសេដ្ឋកិច្ចវិញ​បានលឿន​ ព្រមទាំងផ្តល់ប្រព័ន្ធអនុគ្រោះពន្ធ​ដល់​បណ្តា​ក្រុមហ៊ុនទេសចរណ៍ផងដែរ។

លោកស្រី ឆាយ សៀវលីន បន្តថា តាមរយៈកម្មវិធីនេះដែរ​ក្រុមហ៊ុនទេសចរណ៍​សូមអំពាវនាវបណ្តា​បុគ្គលិក និងអ្នកជំនាញទេសចរណ៍ទាំងអស់​ ដែលបានព្យួរ ខ្លះឈប់ធ្វើការងារក្នុងបរិបទកូវីដ១៩​រាតត្បាតខ្លាំង​ សូមអញ្ជើញត្រឡប់មកធ្វើការងារវិញ​ ដើម្បីរួមសហការគ្នាជំរុញវិស័យទេសចរណ៍ សេដ្ឋកិច្ចឲ្យងើបឡើងវិញឆាប់រហ័ស។

បើតាមតំណាងម្ចាស់ក្រុមហ៊ុនទេសចរណ៍ថ្លែងថា​ រហូតមកដល់ពេលនេះ សម្រាប់ក្រុមហ៊ុន​ទេសចរណ៍ដែលបានឈប់ ​ហើយខ្លះបានព្យួរការងារជាច្រើន ​នៅមិនទាន់​ត្រឡប់ចូលធ្វើការងារវិញ តាមការប្រកាសរបស់ក្រុមហ៊ុននោះទេ ​ខណៈក្នុងអំឡុងកូវីដ១៩​រាតត្បាតខ្លាំង គឺមាន​បុគ្គលិក​ទេសចរណ៍​បានផ្លាស់ប្តូរអាជីពទៅធ្វើការងារផ្សេង។

រដ្ឋមន្ត្រីក្រសួងទេសចរណ៍ ​ឯកឧត្តម ថោង ខុន ថ្លែងថា ស្ថិតក្នុងស្ថានភាព ដ៏លំបាកនៃការរាតត្បាត​កូវីដ១៩នោះ អាជីវកម្មទេសចរណ៍​ប្រមាណជាង​ ៤០%នៃអាជីកម្មទេសចរណ៍ទូទាំង​ប្រទេស​បានបិទ/ផ្អាកដំណើរការ​ ដែលធ្វើឱ្យបុគ្គលិករាប់ម៉ឺននាក់​បាន​បាត់បង់ការងារ ហើយរហូតមក​ដល់ជិតដំណាច់ឆ្នាំ២០២២នេះ បណ្តាក្រុមហ៊ុនទេសចរណ៍​ទាំងអស់​បានព្យាយាម​បើកដំណើរការ​អាជីវកម្មវិញស្ទើរតែទាំងអស់ ​ជាមួយនឹងកំណើនភ្ញៀវទេសចរអន្តរជាតិមកទស្សនាកម្ពុជា ប្រមាណ ២លាននាក់ និងកំណើនទេសចរក្នុងស្រុកប្រមាណ១១លាននាក់៕ អត្ថបទស៊ុម សុខជា