ភ្នំពេញ៖ ឯកឧត្តម ឈិត សុខុន រដ្ឋមន្រ្តីក្រសួងធម្មការ និងសាសនា បានផ្ដល់អនុសាសន៍ណែនាំដល់អាចារ្យ-អាចារិនីទាំងអស់នៅទូទាំងប្រទេស ត្រូវសហការជាមួយគណៈសង្ឃនៅតាមទីវត្តអារាម និងអាជ្ញាធរពាក់ព័ន្ធ ដើម្បី​ចូលរួមទប់ស្កាត់សកម្មភាពនានា ដែលយកសាសនាធ្វើអាជីវកម្ម បណ្តាលឱ្យប៉ះពាល់ដល់​តម្លៃព្រះពុទ្ធ​សាសនា​​ដែល​ជាសាសនារបស់រដ្ឋ។

ការថ្លែងរបស់ឯកឧត្តម ឈិត សុខុន យ៉ាងដូច្នេះក្នុងពិធីសំណេះសំណាលជាមួយអាចារ្យ អាចារិនី​ទូទាំង​ប្រទេស​​លើកទី៧ ចំនួន ១,០០០នាក់ មកតាមបណ្តាលរាជធានី-ខេត្ត ដោយមានការចូលរួមពី​ថ្នាក់ដឹក​នាំតាម​បណ្ដា​ក្រសួង​ស្ថាប័នពាក់ព័ន្ធ មន្ទីរធម្មការ និងសាសនាតាមបណ្តារាជធានី-ខេត្ត នាថ្ងៃទី២២ ខែធ្នូ ឆ្នាំ២០២២ នៅសាលប្រជុំ​ក្រសួងដែនដី​ នគររូបនីយកម្ម និងសំណង់។

ឯកឧត្តមរដ្ឋមន្រី្ត បានចូលរួមចំណែកផ្តល់ជូននូវអនុសាសន៍មួយចំនួន ដើម្បី​លើកកម្ពស់ពង្រឹងការប្រតិបត្តិ​នូវ​ជំនឿសាសនា កិច្ចប្រតិបត្តិតាមលំអាន ប្រពៃណី ទំនៀម​ទម្លាប់​ខ្មែរ​ឱ្យបាន​គត់មត់ ពូនផ្តុំកម្លាំងអាចារ្យ អាចារិនី លើកស្ទួយតម្លៃវប្បធម៌ ប្រពៃណីសាសនា​ជាតិឱ្យនៅ​គង់វង្ស​ស្ថិត​ស្ថេរ​ដរាប​តទៅ​ក្នុងចរន្តសាកលភាវូបនីយកម្ម​និង​ការ​អភិវឌ្ឍលើគ្រប់វិស័យ។

អាចារ្យ-អាចារិនីទាំងអស់ ចូល​រួ​ម​​សហការ​ឱ្យ​បាន​ជិតស្និទ្ធជាមួយគណៈសង្ឃវត្ត ដើម្បី​ជួយ​រៀបចំកែលម្អទីវត្តអារាម​ឱ្យមានសោភ័ណភាព​ស្អាត មានបរិស្ថានល្អ ស័ក្តិសម ជាទីរមណីយដ្ឋាន និងជាទី​គោរព​សក្ការៈ ជាពិសេសត្រូវអនុវត្តតាម​លិខិត​បទ​​ដ្ឋានគតិយុត្តដែល​មាន​ស្រាប់ ​​​ចូលរួមទប់ស្កាត់នូវរាល់សកម្មភាព​នានាតាមរូប​ភាពយកសាសនា​ធ្វើអាជីវ​ក​ម្ម បណ្តាលឱ្យប៉ះពាល់ដល់​តម្លៃ​ព្រះ​ពុទ្ធសាសនា ដែលជា​សាសនា​របស់​រដ្ឋ។

ឯកឧត្តម ឈិត សុខុន បានបន្តណែនាំដល់អាចារ្យ-អាចារិនីខ្មែរ ត្រូវមានសាមគ្គីភាព​ល្អជាមួយ​ពុទ្ធ​បរិស័ទ គណៈសង្ឃ និងអាជ្ញាធរមូលដ្ឋាន ហើយប្រកាន់ខ្ជាប់នូវក្រមសីលធម៌របស់ខ្លួន បំពេញភារកិច្ចដើម្បី​បម្រើ​ពុទ្ធបរិស័ទ​គ្រប់មជ្ឈដ្ឋាន ដោយស្មោះត្រង់ ថែរក្សាប្រពៃណី វប្បធម៌ដ៏ល្អផូរផង់របស់ជាតិ រួមចំណែក​ផ្តល់​ការអប់រំ ​ដើម្បីយល់​ដឹងពីគុណវិបត្តិ នៃការប្រើប្រាស់គ្រឿងញៀនអំពើហិង្សាក្នុងគ្រួសារ​ព្រមទាំង​ចេះគោរព​ច្បាប់ចរាចរណ៍ជាដើម។​ទន្ទឹម​នឹងនោះ អាចារ្យ-អាចារិនី ដែលបានសិក្សារៀនសូត្រវគ្គបណ្តុះបណ្តាលត្រូវប្រកាន់ខ្ជាប់ តួនាទី ភារកិច្ច និងក្រម​សីលធម៌ ជៀសវាងការមានអំនួត មានតែឯង ត្រូវចេះសហការជាមួយ នឹងព្រះសង្ឃ គណៈ​កម្មការ អាចារ្យវត្ត ទោះក្នុងវត្តអារាម ឬតាមបណ្តាពិធីនានាត្រូវមានភាពឈ្លាសវៃ ក្នុង​ការរកនីតិ​វិធី​ដោះ​​សា្រយសម្រប​សម្រួល​គ្រប់តម្រូវការរបស់ព្រះសង្ឃ និងពុទ្ធបរិស័ទគ្រប់មជ្ឈដ្ឋាន។

អាចារ្យ-អាចារិនី ​ត្រូវ​ប​ន្ត​​​បង្កើនចំណេះដឹង ខិត​ខំ​ស្រាវ​ជ្រាវគម្ពីរដីកា ក្បួនតម្រា របៀបមង្គល និងពិធីបុណ្យផ្សេងៗ ពិសេសយក​គោល​ការណ៍រួម ដែល​បានសិក្សា​កន្លង​មកយកទៅអនុវត្ត និងផ្សព្វផ្សាយនៅមូលដ្ឋានឱ្យបានកាន់តែទូលំទូលាយ។

ជាចុងក្រោយឯកឧត្តម ឈិត សុខុន បានណែនាំបន្ថែមថា អាចារ្យ-អាចារិនី មិនត្រូវប្រកាន់បក្សពួក រើសអើងវណ្ណៈ ដែល​ជា​អំពើខ្វះគុណធម៌ ហើយបង្កឱ្យមានវិវាទ ឬអធិករណ៍កើតឡើងក្នុងវត្ត ឬក្នុងសហគមន៍ និង​អំពាវ​នាវ​សូមឱ្យ​អាចារ្យ-អាចារិនីខិតខំរួមចំណែកអនុវត្ត តាមកម្មវិធីនយោបាយរបស់រាជរដ្ឋាភិបាល ទាក់ទងទៅ​នឹង​វិ​ស័យ​សាសនា ប្រពៃណីទំនៀមទម្លាប់ និងស្វែងយល់ពីការវិវឌ្ឍរីកចម្រើនរបស់សង្គមជាតិដោយយក​ទៅ​អប់​រំ និងបន្តផ្សព្វផ្សាយ​ដល់​ពុទ្ធ​បរិស័ទនៅគ្រប់មជ្ឈដ្ឋាន និង​ជួយទប់ស្កាត់​ការហូរចូល​នូវវប្បធម៌​ពាលាអាវា​សែនា​នា​​៕ អត្ថបទ៖ រដ្ឋា