​កណ្ដាល៖ នៅល្ងាចថ្ងៃទី២២ ខែធ្នូនេះ នៅតាមមណ្ឌលប្រឡងនានា នៅខេត្តកណ្តាល បាន​បិទ​ផ្សាយ​លទ្ធផល​ប្រឡង​សញ្ញា​បត្រមធ្យមសិក្សាទុតិយភូមិឆ្នាំសិក្សា២០២២។ សម្រាប់ការប្រឡងនេះ បណ្តាបេក្ខជន បេក្ខនារី បានពេញចិត្តលទ្ធផលប្រឡង ហើយគេទទួលយកបាន បើទោះលទ្ធផលស្ថិតក្នុងនិទ្ទិសណាក៏ដោយ។

​បើតាមបណ្តាបេក្ខជន បេក្ខនារី ដែលបានប្រឡងនៅមណ្ឌលវិទ្យាល័យ ហ៊ុន សែន សេរីភាព ក្រុងតាខ្មៅថ្លែងថា នៅថ្ងៃនេះ យើងមានការសប្បាយចិត្ត និងពេញចិត្តជាខ្លាំងចំពោះលទ្ធផលប្រឡង ដែលយើងធ្វើបាន នៅក្នុងអំឡុងពេលប្រឡងសញ្ញាបត្រមធ្យមទុតិយភូមិ កាលពីថ្ងៃទី៥ ខែធ្នូ ឆ្នាំ២០២២នេះ ហើយថា ការប្រឡងនោះ មានភាពសុក្រិត្យយុត្តិធម៌ ត្រឹមត្រូវបំផុត និងទទួលយកបាន ពោល គឺចេះជាប់។

យ៉ាងណាក៏ដោយ បើតាមឯកឧត្តម កិត្តិនីតិកោសលបណ្ឌិត ឱម យិនទៀង ទេសរដ្ឋមន្ត្រី ប្រធានអង្គ​ភាព​ប្រឆាំង​អំពើ​ពុក​រលួយ ACU បានថ្លែងថា អង្គភាពប្រឆាំងអំពើពុករលួយ ACU នឹងបន្តធ្វើការត្រួតពិនិត្យ ដោះស្រាយ និង​បើក​ការ​ស៊ើប​អង្កេត ប្រសិនបើមានបេក្ខជន បេក្ខនារីប្រឡងណា ដាក់ពាក្យបណ្តឹង មិន​ពេញ​ចិត្ត​នឹងលទ្ធផលប្រឡង​បាក់​ឌុប​នេះ ខណៈដែល ក្រសួងអប់រំយុវជន និងកីឡា ក៏នឹងទុកពេលប្រមាណ២ទៅ៣សប្តាហ៍ ដើម្បីទទួលការពិនិត្យ និង​ដោះ​ស្រាយពាក្យប្តឹងនានាពីបណ្តាអ្នកមិនពេញចិត្តនឹងការប្រឡង។

ឯកឧត្តម ទេសរដ្ឋមន្ត្រី ឱម យិនទៀង បន្តថា នៅក្នុងការប្រឡងនេះ ACU បានដាក់មន្ត្រី និងអ្នកសង្កេត​ការណ៍ ACU​៣០០​០នាក់ ចូលសង្កេតការណ៍តាមត្រួតពិនិត្យតាមដានការប្រឡងក្នុងដំណាក់កាលសរសេរ ហើយក្នុងដំណាក់បន្ត​បន្ទាប់​ ACU ក៏បានដាក់មន្ត្រី ACU ៣០០នាក់ បន្តតាមដានសង្កេតការណ៍នៅក្នុងដំណាក់កាលកែវិញ្ញាសារ ដំណាក់​កាល​កាត់ក្បាលវិញ្ញាសារ បូកពិន្ទុ បញ្ចូលពិន្ទុទៅក្នុងកុំព្យូទ័រ ដំណាក់កាលបោះពុម្ភលទ្ធផល រហូតដល់ដំណាក់​កាល​ប្រកា​សលទ្ធផល គឺមានរលូនល្អប្រសើរនៅគ្រប់ដំណាក់កាល។

ឯកឧត្តម ទេសរដ្ឋមន្ត្រី ឱម យិនទៀង បន្តថា ដោយឡែកសម្រាប់ការប្រកាសលទ្ធផល​មានភាពលឿនរហ័ស​មុនការ​គ្រោង​ទុកនេះ គឺ ដោយសារ ក្រសួងអប់រំ បានកែទម្រង់ទៅលើការប្រព័ន្ធកុំព្យូរទ័រ ហើយACU ក៏ពិនិត្យឃើញថា អ្នក​វាយ​បញ្ចូលពិន្ទុនៅក្នុងកុំព្យូទ័រគឺមានការពិនិត្យយ៉ាងល្អិនល្អន់បំផុត លឿន និង មិនមានកំហុស៕ អត្ថបទ៖ ស៊ុម សុខជា​